Перейти к содержимому
 

Бо ибтикори Сарраёсати  маорифи шаҳри Душанбе бо мақсади  санҷидани маҳоратии касбии мураббияҳои  4-ноҳияи пойтахт даври  шаҳрии озмуни «Мураббии сол-2023» оғоз гардид. Озмуни мазкур бо иштироки ҳакамони он дар Муассисаи томактабии рақами 45-уми ноҳияи Исмоили Сомонӣ шуруъ гардида, дар он мураббияи Кӯдакистони мазкур Манзура Исмоилова дар гуруҳи калони томактабӣ машғулиятро доир намуд. Бояд қайд кард, ки озмуни мазкур аз ду қисм иборат буда, дар он донишҳои назариявӣ ва  фаъолияти амалии довталабон ҳаматарафа аз ҷониби аъзои ҳакамон санҷида мешавад. Сипас аз рӯи ба даст овардани холҳои зиёд аз миёни 4 нафар довталаб аз 4 ноҳия ғолиби озмун муайян  мегардад. Мавриди зикри хос аст, ки дар ин тадбири ақлонию зеҳнӣ довталабон аз рӯи 7 шарт сабқати зеҳнӣ менамоянд.

Намоиш-фурӯши маҳсулоти  кишоварзӣ, ҳунарҳои мардумӣ ва таомҳои миллӣ, бахшида ба 32-юмин солгарди Истиқлолияти давлатии ҶТ аз санаи 9-уми  моҳи  сентябри  соли равон оғоз ёфта то санаи  15-уми моҳи ҷорӣ  дар боғҳои фарҳангӣ-фароғатии шаҳри Душанбе бо иштироки намояндагони ноҳияҳо ва шаҳрҳои мухталифи ҷумҳурӣ баргузор мегардад. Дар боғи  фарҳангӣ фароғатии ба номи Садриддин Айнӣ бо ширкати намояндагони ноҳияи Шаҳринав ва шаҳри Турсунзода намоиш ва фурӯши маҳсулоти кишоварзию саноатӣ ва ҳунарҳои мардумӣ баргузор гардид. Мавриди қайд аст, ки нархи маҳсулоти пешниҳод гардида, нисбати  нархи маҳсулоти бозорҳои пойтахт 20-30 фоиз арзон буда, инчунин сифати маҳсулот тибқи талабот  ба роҳ монда шудааст.

ДУШАНБЕ, 12.09.2023 /АМИТ «Ховар»/. Дастаи мунтахаби Тоҷикистон бори нахуст дар таърихи худ дар Бозиҳои тобистонаи Осиёӣ, ки дар шаҳри Ханжоуи Ҷумҳурии Мардумии Чин баргузор мегардад, беш аз 100 варзишгарро ҷалб намуд. Варзишгарони тоҷик аз 40 намуди дар барномаи Бозиҳои Осиёӣ пешбинишуда дар 18 намуди он иштирок менамоянд. Дар ин хусус ноиби президенти Кумитаи миллии олимпии Тоҷикистон Дилшод Назаров ба шореҳи варзиши АМИТ «Ховар» хабар дод.

Аксари федератсияҳои Тоҷикистон аллакай ҳайати дастаҳои мунтахаби Тоҷикистонро оид ба намудҳои худ, аз ҷумла ҷудо, бокс, ҷиу-ҷитсу ва ғайра эълон намудаанд. Ба ин тартиб, ба ҳайати дастаи мунтахаби бокси Тоҷикистон 13 варзишгар шомил шуд. Ин бори аввал аст, ки даста бо маҷмуи пурра – дар ҳамаи 13 вазн ба Бозиҳои Осиёӣ меравад.

Варзишгарони тоҷик аз рӯи намудҳои шиноварӣ, варзиши сабук, камонварӣ, қаиқронӣ ва каноэ, ҷиу-ҷитсу, таэквондо WT, каратэ-до, ушу, кураш, тирандозӣ, волейболи соҳилӣ, теннис ва тенниси рӯи миз низ дар Бозиҳои Осиёӣ дар шаҳри Ханжоу баромад менамоянд. Бори нахуст дастаҳои мунтахаби Тоҷикистон дар киберспорт ва брейк данс дар арсаи байналмилалӣ муаррифӣ мешаванд.

Хотиррасон мешавем, ки Бозиҳои Осиёии соли 2023 дар шаҳри Ханжоуи Ҷумҳурии Мардумии Чин аз 23 сентябр то 8 октябри соли равон баргузор мешаванд. Дар ин мусобиқа 481 маҷмуи медалҳо аз рӯи 40 намуди варзиш ба роҳ монда шудааст.

Мусобиқаҳо дар 54 майдони варзишӣ дар Ханжоу ва 5 шаҳри музофоти Чжетсзян — Нинбо, Вэнчжоу, Тсзинхуа, Шаосине ва Хучжоу доир мегарданд.

Бозиҳои Осиёӣ шуруъ аз соли 1951 ҳар чор сол таҳти сарпарастии Шурои олимпии Осиё баргузор мешаванд. Тоҷикистон аз соли 1994 дар ин бозиҳо иштирок намуда, то ин дам 27 медал ба даст овардааст, ки 4 –тои он медали тилло, 6 нуқра ва 17 биринҷӣ мебошад.

ДУШАНБЕ, 12.09.2023. /АМИТ «Ховар»/. Имрӯз дар боғҳои Душанбе намоиш-фурӯши маҳсулоти кишоварзӣ, ҳунарҳои мардумӣ ва барномаҳои фарҳангӣ доир мегарданд, хабар медиҳад АМИТ «Ховар».

Намоиш-фурӯши маҳсулоти кишоварзӣ то 15 сентябр дар боғҳои фарҳангу фароғатии шаҳри Душанбе аз ҷониби вилоятҳо ва шаҳру ноҳияҳо намоиши маҳсулоти кишоварзӣ, ҳунарҳои мардумӣ ва барномаҳои фарҳангӣ гузаронида мешаванд.

Намоиш-фурӯши маҳсулоти кишоварзӣ ҳамарӯза соати 08:00 оғоз ёфта, қисмати намоиши ҳунарҳои мардумӣ ва барномаҳои фарҳангӣ аз ҷониби вилоятҳо ва шаҳру ноҳияҳо бегоҳирӯзӣ доир мешавад.

Барои ташкили намоиш ва фурӯши маҳсулоти кишоварзӣ ва ҳунарҳои мардумӣ дар боғҳои фарҳангу фароғатии пойтахт вазорату идораҳо, вилоятҳо ва шаҳру ноҳияҳо вобаста шудаанд. Аз ҷумла,

— дар Боғи фарҳангу фароғати ба номи Абулқосим Фирдавсӣ намоиш-фурӯши вилояти Суғд ва шаҳру ноҳияҳои он,

— дар Боғи Ирам намоиш-фурӯши вилояти Хатлон ва шаҳру ноҳияҳои он,

— дар Боғи Куруши Кабир намоиш-фурӯши Агентии захираҳои моддии давлатӣ ва ноҳияҳои водии Рашт,

— дар Боғи фарҳангу фароғати ба номи Садриддин Айнӣ намоиш-фурӯши шаҳри Турсунзода ва ноҳияи Шаҳринав,

— дар Боғи Наврӯзгоҳ намоиш-фурӯши шаҳри Ҳисор ва ноҳияи Рӯдакӣ,

— дар Боғи фарҳангу фароғати ба номи Алишер Навоӣ намоиш-фурӯши шаҳри Ваҳдат,

— дар Боғи Кӯли Ҷавонон намоиш-фурӯши ноҳияҳои Варзоб ва Сино доир мегардад.

Ҳамзамон 14 сентябр дар Боғи фарҳангу фароғати ба номи Абулқосим Фирдавсӣ намоиши таомҳои миллӣ, идҳои тарбуз, харбуза, каду, себ, ангур ва Фестивали оши палав дар сатҳи ҷумҳуриявӣ ташкил мешавад.