Дар Консерваторияи миллии Тоҷикистон маросими ҷамъбасти озмуни ҷумҳуриявии «Рассомони наврас» баргузор гардид. Соли ҷорӣ дар озмун 200 нафар довталабон ширкат намуда, зиёда аз 322 асарҳои эҷодкардаи худро пешкаши ҳакамон гардониданд,ки аз ин теъдод 33 нафар соҳиби диплом ва 12 нафари дигар ғолиби озмун шуданд. Ёдовар мешавем, ки баргузории озмуни истеъдодҳои наврас таҳти унвони «Рассомони наврас» бахшида ба 30 солагии Иҷлосияи 16-уми Шӯрои Олии Тоҷикистон, ки аз соли 2016 инҷониб доир мегардад,роҳандозӣ шуд.
Раздел: Хабарҳо
Оғози Намоишгоҳи даҳуми байналмилалии «Китоби Душанбе».
Дар Театри давлатии академии опера ва балети Тоҷикистон ба номи С. Айнӣ Намоишгоҳи даҳуми байналмилалии «Китоби Душанбе» баргузор гардид, ки он то 16 декабр идома меёбад. Намоишгоҳи мазкур бо ташаббуси Вазорати фарҳанги Ҷумҳурии Тоҷикистон доир гардида, дар он ноширони дохилу хориҷи кишвар, ба монанди Комбинати полиграфии шаҳри Душанбе, Муассисаи давлатии нашриёти «Адиб», Муассисаи давлатии нашриёти «Ирфон», «Нашриёти муосир», Пажӯҳишгоҳи фарҳанг ва иттилоот, Комплекси табъу нашри «Шарқи озод», намояндагони Россия, Ҳиндустон, Туркия, Беларус, Эрон, Қазоқистон иштирок намуданд ва китобҳои тозанашри худро ба намоиш гузоштанд. Намоишгоҳи байналмилалии китоб то 16 декабр идома меёбад.
Маросими қадрдонии ғолибони даври ноҳиявии олимпиада.
Дар Муассисаи таҳсилоти миёнаи умумии №31 шаҳри Душанбе маросими ҷоизасупории ғолибони даври дуюми Олимпиадаи фаннии хонандагони муассисаҳои таълимии н. Шоҳмансур баргузор гардид. Олимпиадаи мазкур аз рӯйи 13 фанни таълимӣ баргузор шуд. Бояд тазаккур дод, ки шумораи иштироккунандагони даври ноҳиявии имсола ба 3953 нафар рост меояд,ки дар қиёс ба соли гузашта 587 нафар хонанда зиёд мебошад. Акнун ғолибони даври ноҳиявӣ ба даври шаҳрӣ роҳхат гирифтанд.
Идомаи даври ниҳоии озмуни «Фурӯғи субҳи доноӣ китоб аст».
Дар рӯзи 9-уми даври ниҳоии озмуни «Фурӯғи субҳи доноӣ китоб аст» довталабони номинатсияи адабиёти классик фаъол буданд. Ин аз он гувоҳӣ медиҳад, ки иштирокдорон пурра аз талаботи озмун бархурдор буда, ба даври ҳалкунанда тайёрии ҷиддӣ дидаанд. Тибқи иттилоъ 95 нафар довталаб дар номинатсияи адабиёти классик ширкат менамоянд. Аз ин шумора 72 нафарашон аллакай баромад намуда, маҳорати худро нишон доданд. Аз 13 то 15-уми декабр бошад маҳорати 23 нафар мавриди санҷиш қарор мегирад.
Баргузории озмунҳои касбии соҳаи маориф.
Имрӯзҳо дар шаҳри Душанбе даври шаҳрии озмунҳои касбии соҳаи маориф идома дорад . Аз ҷумла, даври шаҳрии озмуни «Мураббии сол-2022» то 14 -уми декабр, «Омӯзгори сол-2022» рӯзҳои 15-17 декабр ва «Хонандаи сол-2022» рӯзҳои 19-20 декабр доир мешаванд. Гузаронидани машғулиятҳо бо хурдсолон, саволу ҷавоб оид ба ихтисос, санадҳои меъёрӣ-ҳуқуқии соҳа, кор бо компютер аз шартҳои асосии озмуни «Мураббии сол» ба ҳисоб меравад, ки ҳамасола дар ҷумҳурӣ дар сатҳи баланди ташкилӣ роҳандозӣ мегардад.
Рӯзи чоруми даври ниҳоии озмуни ҷумҳуриявии «Фурӯғи субҳи доноӣ китоб аст».
Давоми 4 рӯз аст, ки дар Китобхонаи миллии Тоҷикистон даври ниҳоии озмуни ҷумҳуриявии «Фурӯғи субҳи доноӣ китоб аст» идома дорад. Бар асоси низомномаи озмун дар рӯзи чорум хонандагони муассисаҳои таҳсилоти умумӣ синфҳои 5-11 ва ибтидоии касбӣ синфҳои 10-11 иштирок намуданд, ки он то 10 декабр ҷараён мегирад. Тибқи иттилоъ дар номинатсияи хондан ва аз ёд кардани осори адибони муосири тоҷик 92 нафар довталаб иштирок менамоянд.
Роҳандозии олимпиадаи шоҳмот дар ш. Душанбе.
Бо мақсади рушди шоҳмот дар байни ҷавонону наврасон дар доираи дастуру ҳидоятҳои Пешвои миллат дар кишвар айни замон даври ноҳиявии мусобиқаи ҷумҳуриявии шоҳмот миёни ҷавонону наврасон идома дорад. Ба ин хотир дар Гимназияи ба номи Асадулло Ғуломови ноҳияи Исмоили Сомонӣ бо ташаббуси Маркази дарёфт ва рушди истеъдодҳои ноҳия даври ноҳиявии мусобиқа миёни хонандагон ҷараён гирифт, ки дар он муҳассилини тамоми муассисаҳои ҳудуди ноҳия иштирок намуданд. Ёдовар мешавем, ки даври шаҳрии олимпиадаи шоҳмот дар таътили зимистонаи мактаббачаҳо гузаронида мешавад.
Оғози даври ноҳиявии олимпиадаи «Spelling-Bee».
Дар Литсейи барои хонандагони болаёқати равияи иқтисодӣ дар шаҳри Душанбе даври ноҳиявии олимпиадаи забони англисӣ, таҳти унвони «Spelling-Bee» доир гардид. Дар тадбири мазкур намояндагони Маркази дарёфт ва рушди истеъдодҳои назди шуъбаи маорифи ноҳияи Фирдавсӣ ва омӯзгорони соҳибтаҷриба ширкат варзиданд. Дар олимпиадаи даври ноҳиявӣ хонандагони синфҳои 5 ва 7 аз 40 таълимгоҳи ҳудуди ноҳия иштирок доштанд.
Рӯзи дуюм номинатсияи эҷоди назму наср.
Дар рӯзи дуввуми озмуни мазкур довталабон аз рӯи номинатсияи эҷодиёти назму наср бо чеҳраи болида дар назди ҳакамон ҳозир шуда, шеъру ғазал, достон, рубоӣ ва муханнасҳои аз худ намудаи хешро пешниҳод намуданд. Тибқи иттилоъ дар номинатсияи эҷодиёти назму наср 90 нафар довталаб - 50 нафар аз бахши наср ва 40 нафари дигар дар бахши назм ширкат дошта, ҳунару маҳорат ва малакаи зеҳнии худро нишон медиҳанд. Аз рӯи номинатсияи зикршуда, дар бахши назм 26 нафар хонандагони аз синфи 1 то 11 инчунин 24 нафар донишҷуён, омӯзгорон ва калонсолон иштирок мекунанд. Дар бахши наср 20 нафар хонандагони аз синфи 1 то 11, 20 нафар донишҷӯ, омӯзгор ва калонсолон номнавис гардидааст, ки шумораи умумии онҳо 90 нафарро ташкил медиҳад.
Ифтитоҳи даври ниҳоии озмуни ҷумҳуриявии «Фурӯғи субҳи доноӣ китоб аст».
Дар Китобхонаи миллии Тоҷикистон даври ниҳоии озмуни ҷумҳуриявии «Фурӯғи субҳи доноӣ китоб аст» оғоз гардид. Иштирокчиёни даври ниҳоии озмун аз рӯйи 5 номина – адабиёти кӯдакону наврасон ва осори шифоҳӣ, адабиёти классикии тоҷик, адабиёти муосири тоҷик, адабиёти ҷаҳон ва эҷоди назму наср маҳорат меозмоянд. Дар маросими ифтитоҳи озмун муовини сарвазири ҶТ Матлубахон Сатториён суханронӣ карда, ба тамоми довталабон муваффақиятҳо таманно намуд. Гуфта шуд, ки дар даври ниҳоии озмуни ҷумҳуриявии «Фурӯғи субҳи доноӣ китоб аст», 442 нафар довталаб ширкат менамояд, ки аз он 229 нафар хонандагони муассисаҳои таҳсилоти миёнаи умумӣ ва ибтидоии касбӣ, 83 нафар донишҷуёни муассисаҳои таҳсилоти миёна ва олии касбӣ ва баъдидипломӣ, 130 омўзгорони ҳамаи зинаҳои таҳсилот, калонсолон ва намояндагони касбу кори гуногун мебошанд.
