Раздел: Хабарҳо

Соҳаи тандурустӣ низ дар замони соҳибистиқлолӣ рушд намуда, дар ин замина имкониятҳои нав ба вуҷуд омаданд. Бунёди Марказҳои саломатӣ ва таъмин  бо таҷҳизоту лабараторияҳои муосир гувоҳи он аст, ки соҳаи тандурустӣ яке аз самтҳои муҳими ҷомеа дониста мешавад. Дар шаҳри Нораки  вилояти Хатлон ба ин самт таваҷҷуҳи хоса зоҳир гардида, баҳри ҳифзи саломатии аҳолӣ тамоми тадбирҳо андешида мешавад. Зимни суҳбат масъулини Муассисаҳои кӯмаки аввалияи тиббию санитарии шаҳр иброз доштанд, ки айни замон дар сохтори Муассиса 15 бунгоҳи тиббӣ фаъолият дорад ва тибқи нақша сохтмону азнавсозии 2 бунгоҳи дигар дар деҳотҳои  шаҳр ҷараён дорад. Инчунин дар ин давра Муассиса бо 4 адад мошини ёрии таъҷилӣ таъмин карда шуд, ки ин ҳам дастгирӣ ва таваҷҷуҳи бевосита ба соҳаи тандурустӣ мебошад.

Мусобиқаи кушодаи шаҳрӣ оид ба муҳорибаи ғайрикасбии унифайт дар толори барҳавои Крокус фитнес баргузор гардид. Дар маросими ифтитоҳи сабқат  қайд карда шуд, ки соҳаи варзиш дар даврони соҳибистиқлолӣ рушду нумуъ ёфта ширкати варзишгарони ватанӣ дар мусобиқаҳои бурунмарзӣ ҳам бештар гардид. Бо мақсади фароҳам овардани машқу тамринҳо сол ба сол бунёди иншооти варзишӣ низ вусъати тозаро касб кардааст. Яке аз чунин толорҳо, толори Крокус фитнес мебошад. Мусобиқаи кушодаи шаҳрӣ  дастаҳоро аз шаҳри Душанбе ва ноҳияи Ёвон ҷамъ овард. Аслан дар мусобиқаи мазкур ғолибону љоизадорони мусобиқаҳои шаҳрӣ, ноҳиявӣ ва вилоятӣ  ширкат варзиданд. Дар натиҷа Мирамин Набиев, Сабрина Раҳимова, Муҳаммадшукур Солеҳов, Мунис Талбаков,Умар Саидов ғолиб омаданд.

ДУШАНБЕ, 20.06.2023 /АМИТ «Ховар»/. Дар рӯзҳои таътили тобистона Театри давлатии ҷумҳуриявии «Лӯхтак»-и шаҳри Душанбе тасмим гирифтааст, ки ба истироҳатгоҳҳо сафар намуда, намоишҳои гуногун, аз ҷумла «Чӯҷаи тиллоӣ», «Бутчаи шодмонӣ» ва «Маликаи бадбахт» — ро пешкаши тамошобинон намояд. Дар ин хусус ба мухбири АМИТ «Ховар» роҳбари бадеии театри мазкур Наргис Розиқзода иттилоъ додааст.

Ҳунармандони театр барои кӯдакон инчунин намоиш-консертҳо ташкил мекунанд, мактаббачагон метавонанд бо қаҳрамонони саҳнаҳо аз наздик шинос шуда, хушҳолӣ кунанд.

«Чӣ тавре маълум аст, намоиш-консертҳо ба наврасон шодию сурур ва лаҳзаҳои зиёди хотирмон мебахшад. Мактаббачагон ва кӯдакони хурдсол тамошобинони хеле нозуканд, онҳо махсусан зуд ба эҳсосот дода мешаванд. Намоишномаҳои Театри лӯхтак ба онҳо хушҳолӣ бахшида, барояшон аҳамияти тарбиявӣ ва маърифатӣ доранд. Ин намоишномаҳо тавассути каҳрамонҳои асар ба кӯдакон дар бораи дӯстӣ, меҳрубонӣ, ростқавлӣ, меҳнатдӯстӣ қисса намуда, онҳоро ба роҳи дурусти зиндагӣ ҳидоят месозанд», — гуфт Наргис Розиқзода.

Айни замон дар Театри давлатии ҷумҳуриявии «Лӯхтак»-и шаҳри Душанбе мавсими 38 — уми интихобӣ баргузор гашта истодааст. Ба гуфтаи роҳбари бадеии Театри лӯхтак, имсол ҳунармандони театр пешниҳоди намоишҳои бисёр ва сафарҳоро ба нақша гирифтаанд.

«Имсол мо 3 намоиши навро ба саҳна гузоштем, ду спектакл ба анҷом расид, сеюмӣ то охири мавсими театрӣ – то охири моҳи июн идома хоҳад кард. Дар олами лӯхтакҳо усулҳои гуногун мавҷуданд, ҳоло мо аз шоу — барномаҳо истифода мебарем — инҳо рақамҳои консертӣ мебошанд, ки бо лӯхтакҳо доир мегарданд. Мо кӯшиш мекунем, ки дар бораи дустӣ, мехрубонӣ, садоқат ва вафодорӣ намоишҳоро ба саҳна гузорем, бинобар ин ба театри мо кӯдакон ва падару модарони онҳо бо камоли мамнуният меоянд. Мо саъй мекунем, ки асарҳоро бо ду забон намоиш диҳем ва дар таътили зимистона бо мактаббачагон кор кунем. Моҳи феврал мо намоиши нави «Саргузашти харгӯш»-ро омода кардем. Муаллифи ин асар Шамсӣ Қиёмов мебошад. Ба тамошобинон намоишнома, достони табибон, дӯстӣ, баробарӣ хеле писанд омад», — гуфт номбурда.

Ҳамсуҳбати мо илова кард, ки «моҳи март ҳунармандони театр бо намоишномаи «Маликаи нозанин» дар Бухоро сафари ҳунарӣ доштанд. Намоиш ба ду забон: тоҷикӣ ва русӣ баргузор гардида буд. Дар ҷашни Наврӯз мо ин намоишномаро ба кӯдакону наврасони Бухоро ва атрофи он пешкаш намудем. Ҳоло дар театри мо 12 нафарҳунармандони дорои таҷрибаи калон фаъолият мекунанд. Студияи бачагонаи «Исмоил» соли 1996 таъсис ёфтааст. Дар студия фарзандони оилаҳои камтаъмин таҳсил мекунанд. Мо ба кӯдакон ҳунармандӣ, сурудхонӣ, рақс, лӯхтакбозиро меомӯзем. Маҳорати актёриро ба онҳо устодони пуртаҷрибаи санъат меомўзонанд. Ҳама машғулиятҳо пас аз дарс дар театр доир мешаванд».

Бояд гуфт, ки Театри лӯхтак аввалин театри бачагона мебошад.

«Мо бо театрҳои Узбекистон, Қазоқистон, Туркманистон, Русия ҳамкории зич дорем. Аксар вақт коргардонҳоро аз Узбекистон ва Русия даъват мекунем, ки ба намоиш шаклҳои гуногун диҳанд, ҳунармандон аз таҷрибаи ҳамкасбони хориҷии худ омӯхта, маҳорати худро такмил диҳанд. Боиси хушнудист, ки студияи мо бори нахуст бо дастгирии Вазорати фарҳанги Тоҷикистон дар Фестивали байналмилалии театрии «Лӯхтак дар дасти кӯдакон», ки дар шаҳри Новокузнетски Федератсияи Русия баргузор гардид, иштирок намуд.

Студияи бачагонаи мо дар ин фестивал бо намоиши «Робия бо муйҳои ранга» баромад кард. Ба тамошобинон асар хеле маъқул шуд, он аз ҷониби онҳо баҳои хуб гирифт. Созмондиҳандагон хоҳиш карданд, ки ин намоишномаро соли оянда аз 1 то 5 июн бахшида ба Рӯзи байналмилалии ҳифзи кӯдакон намоиш диҳем, то ки суннат ва фарҳанги мардуми тоҷикро муаррифӣ намоем», — шарҳ дод Наргис Розиқзода.

Бояд ишора кард, ки чанде пеш ҳунармандони театр дар деҳаҳои дурдасти Кӯлоб, Шаҳритус ва Носири Хусрав тамошобинони хурдакаки худро бо намоишҳои шавқовар шод гардонданд.

САНГВОР, 20.06.2023 /АМИТ «Ховар»/. Тибқи нақшаи тасдиқшуда, дар ноҳияи Сангвор бояд аз ҷониби Ҷамъияти дорои масъулияти маҳдуди «Зарринк» сохтмони Муассисаи томактабии замонавии «Калидчаи заррин» оғоз мегардид. Аммо бо сабабҳои маълум, аз ҷумла тағйирот даровардан дар лоиҳаи он то ба ҳол сохтмони кўдакистон оғоз нагардидааст. Дар маркази ноҳияи Сангвор мушкилии набудани кӯдакистон барои қариб сад кӯдак то ҳол боқӣ мондааст. Мухбири минтақавии АМИТ «Ховар» ин мавзуъро шарҳ медиҳад.

Соли 2019 бо мақсади рушди таҳсилоти томактабӣ Ҷумҳурии Тоҷикистон, Ҳукумати мамлакат «Барномаи давлатии рушди таҳсилоти томактабӣ дар Ҷумҳурии Тоҷикистон барои солҳои 2020-2025»-ро қабул намуд, ки вобаста ба иҷрои ин барномаи давлатӣ дар шаҳру навоҳии ҷумҳурӣ даҳҳо кӯдакистонҳои наву замонавӣ мавриди баҳрабардорӣ қарор дода шуданд.

Ноҳияи Сангвор яке аз дурдастарини ноҳияҳои кӯҳистони мамлакат ба ҳисоб рафта, дар маркази он як кӯдакистон бо фарогирии 50 нафар хурдсол фаъолият дорад.

Тибқи иттилои масъулини ин кӯдакистон, имрӯзҳо барои дар муассисаи томактабии маркази ноҳия таълиму тарбия гирифтан қариб 100 нафар кӯдак дар навбат истодаанд. Онҳо аз ин шумора дар соли 2023 дар ҷойи кӯдаконе, ки барои таҳсил ба синфи якум рафтанд зиёда аз 7 нафар кӯдакони дар навбат истодаро қабул менамоянд.

Хушбахтона, барои бартараф гардидани ин мушкилии ноҳия ва амалишавии «Барномаи давлатии рушди таҳсилоти томактабӣ дар Ҷумҳурии Тоҷикистон барои солҳои 2020-2025» Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 20 сентябри соли 2021 дар идомаи сафари корӣ дар ноҳияи Сангвор ба бунёди муассисаи томактабии замонавии «Калидчаи заррин» оғози расмӣ бахшиданд.

Дар ин чорабинӣ ба Пешвои муаззами миллат муҳтарам Эмомалӣ Раҳмон ваъда доданд, ки кӯдакистони мазкур барои 100 нафар дӯстрӯяк бо иқдоми Ҷамъияти дорои масъулияти маҳдуди «Зарринк» бунёд карда мешавад. Фармоишгари муассисаи нави томактабӣ Мақомоти иҷроияи ҳокимияти давлатии ноҳияи Сангвор буда, лоиҳаи иншооти зебо аз ҷониби Ҷамъияти саҳҳомии кушодаи «Меъморӣ ва шаҳрсозӣ»-и шаҳри Душанбе таҳия гардидааст.

Тибқи иттилои масъулини Мақомоти иҷроияи ҳокимияти давлатии ноҳияи Сангвор, ҳарчанд ҳуҷҷатгузории замини ин муассиса ба талабот ҷавобгў буда, он бо беҳтарин лоиҳаи замонавӣ таъмин гардида бошад ҳам, мутаассифона, бо баҳонаҳои тағйирот даровардан дар лоиҳаи он сохтмони муассисаи томактабии замонавии «Калидчаи заррин» то имрӯз аз ҷониби Ҷамъияти дорои масъулияти маҳдуди «Зарринк» дар ноҳияи Сангвор оғоз нагардидааст.

Масъулини ҶДММ «Зарринк»-ро зарур аст, ки ба ғамхориҳои Пешвои муаззами миллат муҳтарам Эмомалӣ Раҳмон сазовор буда, муассисаи томактабии замонавии «Калидчаи заррин»-ро дар маркази ноҳияи Сангвор аз рўи лоиҳаи замонавии барои 100 кӯдак бунёд намуда, ба ифтихори 35-солагии Истиқлоли давлатӣ мавриди баҳрабардорӣ қарор диҳанду ба ваъдаи додаи хеш вафо намоянд.

Дар ноҳияи Сангвор айни замон се кӯдакистон бо фарогирии 150 кӯдак фаъолият дорад, ки онҳо дар ҷамоатҳои деҳоти Заршуён, Чилдара ва маркази ноҳия ҷойгир мебошанд.

Дар ноҳия талабот ба фаро гирифтани кӯдакон дар муассисаҳои томактабӣ хеле зиёд мебошад. Аз ин рӯ бо ташаббуси Мақомоти иҷроияи ҳокимияти давлатии ноҳияи Сангвор дар назди 21 муассисаи таълимӣ 21 гурӯҳи маркази инкишофи кӯдакро бо фарогирии 277 нафар хурдсолон ташкил намудаанд. Дар ин гурўҳҳо беҳтарин мураббияҳо ба хурдсолон таълиму тарбия медиҳанд.

ГУЛИСТОН, 20.06.2023. /АМИТ «Ховар»/. Дар шаҳри Гулистон аз ҷониби собиқ футболбози дастаи  мунтахаби мамлакат ва сарбони ҳозираи дастаи «Хуҷанд»-и шаҳри Хуҷанд Ҷаҳонгир Эргашев Академияи футболи «Сомониён» таъсис дода шуд. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Гулистон хабар доданд.

«Сомониён» бо чорабинии тантанавии идона дар варзишгоҳи марказии шаҳр ба фаъолият оғоз намуд. Дар кушодашавии он аъзои академия, мураббиён ва  волидайн иштирок намуданд.

Мудири шуъбаи рушди иҷтимоӣ ва робита бо ҷомеаи дастгоҳи Раиси шаҳр Фаридуншоҳ Абдуллоев  изҳор дошт, ки солҳои охир дар ҷумҳурӣ ҷиҳати рушди варзиши рақами 1-и ҷаҳон – футбол тадбирҳои муассир андешида шудааст. Натиҷаи ҳамин тадбирҳо ва барномаву ҳадафҳо буд, ки тими мунтахаби мамлакат дар таърих аввалин маротиба ба Чемпионати Осиё, ки соли 2023 дар давлати арабии Қатар баргузор мегардад, роҳхат гирифт.

Дар шаҳри Гулистон ба  рушди ин навъи варзиш таваҷҷуҳи хоса  зоҳир мегардад. Натиҷаи ин таваҷҷуҳ аст, ки дастаи «Гулистон»-и шаҳри Гулистон дар Лигаи якуми Чемпионати Тоҷикистон оид ба футбол ҳунарнамоӣ мекунад.

Волидайни таълимгирандагон ва сокинони шаҳр аз кушодашавии Академияи футболи «Сомониён» хушҳол  буда, ба муассисони он изҳори сипос намуданд.

Имрӯзҳо дар Муассисаи таълимии рақами 53-юми шаҳри Душанбе корҳои сохтмонӣ дар сатҳи баланд идома дорад. Сохтмончиён дар 4-ошёнаи бинои таълимгоҳ ба корҳои андовакунӣ, рангу бор намудани синфхонаҳо, насб намудани фурӯзонакҳои барқӣ ва сафолакҳо, кашидани хатҳои обу барқ ва дигар корҳои сохтмонию бинокорӣ машғул мебошанд. Корҳои сохтмонӣ дар иншооти мазкур аз 2-юми марти соли 2022 шуруъ гардида, бинокорон тасмим гирифтанд, корҳоро бо сифати баланд то оғози соли таҳсили 2023-2024 ба анҷом расонида, биноро мавриди баҳрабардорӣ қарор диҳанд. Айни замон сохтмончиён толори фарҳангиро барои 500 нафар, китобхонаро барои 160 хонанда, инчунин толори варзиширо пурра сохта ба  анҷом расониданд. Иншооти мазкур аз 5 қисм ва 4 ошёна иборат буда, он барои 1200 хонанда дар як баст пешбинӣ  шудааст.

Дар Лагери истироҳативу омӯзишии «Рангинкамон» -и Маркази кӯдакон ва наврасони шаҳри Душанбе 10 маҳфил аз қабили расмкашӣ, шоҳмот, зардӯзӣ, драма, дуредгарӣ, рақс, конструктор, маҳфилҳои мусиқӣ ва  маҳфили табиатдӯстдорон фаъолият менамоянд, ки ҳамарӯза кӯдакон ҷалб мегарданд. Ҳамарӯза насли наврас ба машқи пагоҳирӯзӣ машғул шуда, бо ёрии мураббӣ машқҳои гуногуни варзиширо иҷро менамоянд. Хотиррасон менамоем, ки дар басти аввали Лагери истироҳатӣ 10 гуруҳ  фаъолият менамояд ва дар ин давр истироҳати  насли наврас 12 рӯз идома карда, дар ин муддат онҳо  бо хӯроки гарм таъмин карда мешаванд. Дар маҳфили драма дӯстдорони санъати актёрӣ нозукиҳои ин ҳунарро меомӯзанд. Ҳамзамон дар маҳфили расмкашӣ низ истироҳаткунандагон бо шавқи зиёд ба тасвири расмҳои мухталиф машғул мешаванд. Ёдовар мешавем, ки Лагери истироҳативу омӯзишии «Рангинкамон» дар чор баст фаъолият менамояд.

Дар маросими қадршиносии даври ноҳиявии озмуни ҷумхуриявииФурӯғи субҳи доноӣ китоб аст» намояндагон аз Ҳукумати ноҳияи Синои пойтахт ва ғолибони даври ноҳиявии озмуни номбурда ширкат намуданд. Нахуст масъулин суханронӣ намуда, аҳли нишаст ва ғолибонро табрику шодбош гуфта барояшон дар даврҳои оянда муваффақиятҳои беназирро таманно намуданд. Ҳамин тавр дар номинатсияи адабиёти муосир ҷои аввал насиби Мадина Назарова гардид. Дар номинатсияи хондан ва аз бар кардани  адабиёти классик Мустафо Толибзода ва аз адабиёти ҷаҳон Оиша Асророва ба гирифтани ҷойҳои якум ноил гардиданд. Дар номинатсияи эҷод дар бахши назм Сановбар Ибодова ва дар бахши наср Робия Ҳакимова сазовори ҷои аввал шуданд.

Саломати неъмати олии ҷудонопазири инсон буда, хусусан ба воя расонидани насли солим дар пешравии давлат нақши муҳим дорад зеро яке аз омилҳои ҳифзи саломатии кӯдак ин беҳтар намудани ғизои кӯдакон ва тозаю озода нигоҳ доштани муҳити зист ба ҳисоб меравад. Бо ин мақсад тақсимоти ғилофаки витамини «А» дар Кӯдакистон №12-уми ноҳияи Исмоили Сомонии пойтахт аз тарафи  Маркази саломатии №13-уми шаҳри Душанбе ба кӯдакони аз синни 1 то 5 сола  гузаронида шуд.Ба иттилои масъулин тақсимоти  витамини «А» аз 1 июн шуруъ шуда то 10 июни  соли ҷорӣ дар 33 минтақаи кишвар  идома меёбад. Тибқи иттилои Созмони  умумиҷаҳонии тандурустӣ  аз сабаби норасоии витамини «А» дар ҷаҳон аз 250 то 500 ҳазор кӯдак биноияшонро аз даст медиҳанд. Витамини «А» дар як сол ба кӯдакон ду маротиба гузаронида мешавад.

ДУШАНБЕ, 05.06.2023 /АМИТ «Ховар»/. Дар Тоҷикистон ҳарорати ҳаво дар водиҳо аз 40 дараҷа боло меравад, иттилоъ доданд ба мухбири АМИТ «Ховар» дар Агентии обуҳавошиносии Ҷумҳурии Тоҷикистон.

Баландшавии ҳарорат дар минтақаҳои баландкўҳ ба обшавии барф, пиряхҳо ва зиёд шудани ҳаҷми об дар рӯдхонаҳо оварда мерасонад, ки ин метавонад сабаби фаромадани сел, ярч ва сангрезиҳо гардад.

Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон аз шаҳрвандон ва меҳмонони мамлакат дар ин рӯзҳо хоҳиш менамояд, ки махсусан ҳангоми истифода аз роҳҳои кӯҳӣ ниҳоят эҳтиёткор бошанд.

Дар баробари баланд шудани ҳарорати ҳаво, ҳангоми истироҳат ва шиноварӣ эҳтиёткор будан ва дар назди дарёҳо, каналҳо, хавзҳо ва обанборҳо қоидаҳои бехатариро риоя кардан лозим аст. Риоя накардани қоидаҳои бехатарӣ боиси оқибатҳои вазнин мегардад.

Барои пешгирии ҳодисаҳои ғарқшавӣ кӯдакон ва калонсолон бояд як қатор қоидаҳои оддиро қатъиян риоя кунанд. Масалан, пас аз 1,5 — 2 соати истеъмоли ғизо шино кардан мумкин аст, оббозӣ кардан дар оби кушод дар ҳарорати оби аз +15 дараҷа паст тавсия дода намешавад, зеро аз зарбаи оби хунук аз ҳушравӣ ё марг имконпазир аст. Аксар вақт дар ҳолати аз ҳад зиёд гарм будани бадан пеш аз шиноварӣ якбора ба оби хунук даромадан ба ҳолати беҳушӣ оварда мерасонад.

Дар ҷойҳое, ки алафҳо ва лойҳо мавҷуданд, набояд шино кард.

Дар ҳолати мастӣ ба об даромадан ва оббозӣ кардан, дар болои матрасҳои резинӣ, бозичаҳои пуфшаванда шино намудан қатъиян манъ аст. Воситаҳои дастисоз ҳатто барои оббозони моҳир хеле хатарнок мебошад. Илова бар ин, ҳатто шамоли суст метавонад онҳоро аз соҳил дур кунад.

Дар ҳолате, ки ногаҳон дохили оби маҷрояш тез шудед, ба муқобили мавҷ ҳаракат накунед, зеро қувват сарф мешавад: дар ин ҳолат аз ҳама беҳтараш бо ҷараёни об шино намуда, тадриҷан ба соҳил бароед. Ҳеҷ гоҳ кӯдаконро бе назорат нагузоред.

Дар давраи гармо, тавре ки дар зимистон масунияти бадан заиф мешавад, организм ба дастгирӣ ниёз дорад. Чунин тағирёбии ҳарорат боиси бемориҳои гуногун мегардад. Кондитсионерҳо моро аз гармӣ наҷот медиҳанд, зиндагии моро осонтар мекунанд, аммо бояд дар хотир дошт, ки тағирёбии ногаҳонии ҳарорат метавонад ба кори системаи дилу рагҳо таъсир расонад. Ғайр аз ин, доимо дар зери кондитсионер будан, эҳтимоли шамол хӯрдан ё мубталои дигар бемориҳо шуданро дорад. Барои пешгирӣ кардани ин, шумо бояд дар як рӯз як маротиба витамини C-ро истеъмол кунед, он масунияти баданро баланд мебардорад. Чой бо лимӯ, шарбати он бо пудина, афшураҳои табиӣ ё афлесун, компотҳои мевагӣ хеле фоиданоканд.

Бисёр нафарон дар ҳавои гарм бемадориро ҳис мекунанд, онҳо гӯиё худро маҷбур мекунанд, ки ҳаракат кунанд, ингуна ҳаво барои бештари одамон на танҳо нороҳат, балки хатарнок аст. Дар ин рўзҳо хатари зарбаи офтобӣ ва камобии организм аз ҳарвақта зиёдтар аст. Донистан ва риояи қоидаҳои рафтор дар ҳавои гарм муҳим мебошад.

Дар ҳавои гарм, махсусан кӯдакони хурдсол, пиронсолон, беморон, инчунин онҳое, ки вазни зиёдатӣ доранд ё дору мехӯранд, нигоҳубин кардан лозим аст. Дар рӯзҳои гарм либоси сабуку озоди аз матоъҳои табиӣ духташуда пўшидан, ҳатман кулоҳи сабук ба сар кардан ва бо худ об гирифтан лозим аст. Инчунин дар рӯзҳои гарм тавсия дода мешавад, ки бе зарурат, махсусан дар давраи фаъолнокии максималии офтоб, яъне аз соати 11 то 17 ба кӯча набароед.

Тавре табибон тасдиқ кардаанд, дар ҳавои гарм ғизоҳои равғанин, бирён ва ширинро аз анвои хӯрокҳо истисно кардан лозим аст. Рӯйхат бояд аз хӯрокҳои сабук, сабзавот, меваҳо, моҳии судак ё пухта, мурғ, шӯрбоҳо, аз қабили дӯғоб иборат бошад.

Шумо инчунин бояд қоидаҳои гигиенаи санитариро дар хотир дошта бошед, сабзавот ва меваҳоро бо оби равон тоза шуста бошед. Барои муҳофизат кардани пӯстатон аз таъсири зараровари офтоб ҳамеша аз малҳамҳои муҳофизатӣ истифода баред. Офтоб хеле зуд пигментатсияи пӯст, доғҳо ва хоришакҳоро ба вуҷуд меорад. Ҳангоми зери нури бевоситаи офтоб будан аз кўлоҳ ё чатр истифода бояд бурд. Агар дар гармо ногаҳон беҳолӣ, дилбеҳузурӣ, баланд шудани набзи дилро ҳис кунед, пас фавран ба ҷои салқин рафта нишинед, тугмаҳои либосатонро кушода, об нӯшед. Агар ин ҳолати ногувор дар давоми 5-7 дақиқа бартараф нашавад, пас фавран ёрии таъҷилиро даъват кунед.