Раздел: Хабарҳо

ДУШАНБЕ 24.08.2023. /АМИТ «Ховар»/. Дар соли нави таҳсили 2023-2024 дар шаҳри Душанбе 5 муассисаи таҳсилоти миёнаи умумӣ барои 4344 хонанда дар як баст мавриди баҳрабардорӣ қарор дода мешавад. Дар ин хусус зимни баргузории машварати августии кормандони соҳаи маорифи шаҳри Душанбе иттилоъ дода шуд.

Гуфта шуд, ки дар шаҳри Душанбе аз ҳисоби ҳамаи сарчашмаҳои маблағгузорӣ 7 муассисаи таҳсилоти томактабӣ барои 924 ҷой мавриди истифода қарор дода шудаанд.

Илова бар ин, дар доираи нақшаи чорабиниҳои таҷлили 35- солагии Истиқлолияти давлатии Ҷумҳурии Тоҷикистон бунёду навсозии 11 муассисаи таҳсилоти миёнаи умумӣ бо 11 ҳазор 396 ҷойи нишаст оғоз гардида, корҳои сохтмонӣ дар ин самт идома доранд.

Тазаккур дода шуд, ки дар айни замон дар шаҳри Душанбе 199 муассисаи таҳсилоти миёнаи умумӣ бо фарогирии 274 ҳазору 920 хонанда фаъолият доранд, ки нисбат ба соли гузашта 6 муассисаи таълимӣ ва 6518 нафар хонанда зиёд мебошад.

ДУШАНБЕ, 24.08.2023 /АМИТ «Ховар»/. Дастаи наврасони Тоҷикистон оид ба футбол дар чемпионати Ассотсиатсияи футболи Осиёи Марказӣ (CAFA-2023) (U-17), ки дар Ҳисор ҷараён дорад, дуюмин пирӯзиашро ба даст овард. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

 Дар даври сеюм наврасони мо дар як бозии душвор ҳамсолони худ аз Қирғизистонро бо ҳисоби 4:1 шикаст доданд.

Дар бозии дигар дастаи Афғонистон аз дастаи Эрон қавитар баромад – 2:1.

Даври 4

25 август (ҷумъа)

18:00 – Эрон – Қирғизистон

21:00 – Узбекистон – ТОҶИКИСТОН

Даври 5

27 август (якшанбе)

18:00 – Афғонистон – Узбекистон

21:00 – ТОҶИКИСТОН – Эрон

ДУШАНБЕ, 24.08.2023. /АМИТ «Ховар»/. Дар оғози соли таҳсили 2023-2024 дар шаҳри Душанбе 2 муассисаи таҳсилоти томактабӣ барои 350 ҷой мавриди баҳрабардорӣ қарор дода мешавад. Дар ин хусус зимни баргузории Конференсияи августии кормандони соҳаи маорифи шаҳри Душанбе таҳти унвони «Таҳсилоти рақамӣ – омили муҳими рушди соҳаи маорифи пойтахт» иттилоъ дода шуд. Дар ин хусус ба АМИТ «Ховар» сардори раёсати муассисаҳои таҳсилоти томактабӣ ва миёнаи умумии Сарраёсати маорифи шаҳри Душанбе Асомиддин Бобозода хабар дод.

Зимни он муовини Раиси шаҳри Душанбе  Дилбар Одилзода иброз дошт, ки танҳо соли 2022 дар шаҳри Душанбе аз ҳисоби ҳамаи сарчашмаҳои маблағгузорӣ 7 муассисаи таҳсилоти томактабӣ барои 924 ҷой мавриди истифода қарор дода шуд.

Илова бар ин дар доираи нақшаи чорабиниҳои таҷлили 35-солагии Истиқлолияти давлатии Ҷумҳурии Тоҷикистон бунёду навсозии 10 муассисаи таҳсилоти томактабӣ бо 2110 ҷойи нишаст оғоз гардида, корҳои сохтмонӣ дар ин самт идома доранд.

Гуфта шуд, ки дар айни замон дар шаҳри Душанбе 161 муассисаи таҳсилоти томактабӣ бо теъдоди 31 ҳазору 471 нафар тарбиягиранда фаъолият менамоянд, ки нисбат ба ҳамин давраи соли гузашта мутаносибан 11 муассисаи таҳсилоти томактабӣ ва 732 тарбиягиранда зиёд гаштааст.

Ёдовар мешавем, ки дар асоси қарори Раиси шаҳри Душанбе муҳтарам Рустами Эмомалӣ Нақшаи чорабиниҳои Мақомоти иҷроияи ҳокимияти давлатии шаҳри Душанбе оид ба амалӣ намудани «Барномаи рушди муассисаҳои томактабӣ ва таҳсилоти умумии хусусӣ дар Ҷумҳурии Тоҷикистон барои солҳои 2022-2027» дар шаҳри Душанбе тасдиқ гардидааст.

Нақшаи мазкур барои марҳилаи якум- солҳои 2023-2024 тасдиқ шуда, мақсад аз андешидани маҷмуи тадбирҳо оид ба сохтмони муассисаҳои томактабӣ ва таҳсилоти умумӣ таъмини онҳо бо таҷҳизоти муосир ва инноватсионӣ — таълимӣ мебошад

Инчунин дар доираи нақшаи мазкур аз курсҳои такмили ихтисос гузаронидани мураббиён ва омӯзгорони муассисаҳои томактабӣ ва таҳсилоти умумии хусусӣ дар назар дошта шудааст.

Тавре қаблан иттилоъ дода будем, дар ошёнаҳои якуму дуюми биноҳои баландошёнаи ҳудуди шаҳри Душанбе 45 муассисаи томактабӣ барои беш аз 7690 ҷой таъсис дода мешавад, ки дар ин самт корҳои сохтмонӣ бомаром идома доранд.

Бояд тазаккур дод, ки Ҳукумати Тоҷикистон  барои фарогирии бештари кӯдакон ба таълиму тарбияи томактабӣ, дастрасӣ ба таҳсили босифат, таъмини шарикии бахшҳои давлатӣ ва хусусӣ талош меварзад. Далели он таҳия ва тасдиқи «Барномаи рушди муассисаҳои томактабӣ ва таҳсилоти умумии хусусӣ барои солҳои 2022-2027» мебошад, ки дар доираи  он дар ду марҳила: солҳои 2022-2024 ва 2025-2027 дар маҷмуъ 134 муассисаи томактабии хусусӣ ва 114 муассисаи таҳсилоти умумии хусусӣ дар миқёси ҷумҳурӣ сохта, ба истифода дода мешаванд.

Ба иттилои Вазорати маориф ва илми Ҷумҳурии Тоҷикистон, барномаи мазкур шароит фароҳам меорад, ки дар ду марҳила: солҳои 2022-2024 ва 2025-2027 мутобиқи нақша муассисаҳои таълимии томактабии хусусӣ ва миёнаи умумии хусусӣ таъсис шуда, рақобатпазирӣ дар гирифтани таҳсили босифати томактабию умумии хусусӣ таъмин гардад

Ҳамин ҷаҳду талош аст, ки соли 2022 Тоҷикистон дар радифи 10 давлати ҷаҳон барои ҷалби кӯдакон ба муассисаҳои таҳсилоти томактабӣ дар ҷойи дуюм қарор гирифт. Матлаби мазкур дар нашрияи «Finance Inquirer» бо такя ба натиҷаи таҳқиқоти байналмилалии RGCA (Гурӯҳи тадқиқотии Осиёи Марказӣ), маълумоти ЮНИСЕФ, Бонки ҷаҳонӣ ва OECD (Ташкилоти ҳамкории иқтисодӣ ва рушд) рейтинги динамикаи ҷалби кӯдакон ба муассисаҳои таҳсилоти томактабӣ дарҷ шудааст.

Дар радифи 10 давлати ҷаҳон Узбекистон бо 59 фоизи ҷалби кӯдакон дар ҷои аввал, Тоҷикистон бо 33 фоизи ҷалби кӯдакон дар ҷои дуюм ва Беларус бо 7 фоиз дар ҷойи сеюм қарор гирифта буданд.

Гуфта мешавад, ки дар ин ҳисобот тамоюлҳои дарозмуддати таҳсилоти ибтидоии кӯдакон дар солҳои 2018-2020 шарҳу тафсир шудаанд. Тибқи  маълумоте, ки дар ин ҳисобот оварда шудааст, вазъи таълиму тарбияи томактабӣ дар аксар минтақаҳо ё рӯ ба рукуд овардааст ё ба минтақаи рушди манфӣ гузаштааст. Ин дар ҳоле мебошад, ки якчанд давлат дар ҳолати рушди назаррас қарор доранд. Ба шумори чунин кишварҳо Русия, ИМА, Британияи Кабир, Австралия, Зеландияи Нав ва амсоли он дохил мешаванд.

ДУШАНБЕ, 24.08.2023. /АМИТ «Ховар»/. Раиси вилояти Хатлон Давлаталӣ Саид бо иҷрокунандаи вазифаи Намояндаи ЮНИСЕФ дар Тоҷикистон хонум Эри Двиведи мулоқот намуд.

 Дар ин хусус ба АМИТ «Ховар» дар мақомоти мазкур хабар доданд.

Раиси вилоят оид ба ҳамкорӣ бо шарикони рушд дар соҳаҳои мухталифи иҷтимоӣ иброз дошт, ки бо дастгирии Ҳукумати Ҷумҳурии Тоҷикистон ва Хазинаи кӯдакони СММ (UNICEF) дар Тоҷикистон лоиҳаҳои зиёде дар соҳаҳои иҷтимоии вилояти Хатлон амалӣ шуда, қисмате дар ҳоли амалишавӣ қарор доранд. Амалишавии барномаҳои рушди тандурустӣ барои ҳифзи саломатии модару кӯдак ва Лоиҳаи «Мактаби бехатар: Пешгирии зӯроварӣ нисбат ба кӯдакон бо таваҷҷуҳ ба духтарон дар оила, мактаб ва ҷомеа» идома дошта, дар доираи онҳо корҳои назаррас баҳри баланд бардоштани некуаҳволии сокинони шаҳру ноҳияҳои вилоят ба анҷом расонида шуданд.

Дар доираи лоиҳаҳои дигари худ ЮНИСЕФ дар самти амалӣ гардонидани некуаҳолии оилаҳои камбизоат ва баланд бардоштани устувории иқтисодӣ ва густариши татбиқи ҳуқуқҳои онҳо тадбирҳои зарурӣ андешида истодааст.

Тазаккур дода шуд, ки дар вилоят мушкилот дар соҳаҳои иҷтимоӣ, аз ҷумла маорифу тандурустӣ зиёд буда, ба дастгирии шарикони рушд ниёз доранд. Хусусан камбудиҳо дар самти норасоии синфхонаҳо, дар сатҳи нокифоя қарор доштани хизматрасонии беморхонаҳо ва норасоии боғҷаҳои томактабӣ ба назар мерасанд.

Иброз гардид, ки Намояндагии ЮНИСЕФ дар Тоҷикистон дар амалисозӣ ва мониторинги барномаҳои рушди маҳал, бахусус шаҳру ноҳияҳо таҷрибаи хуб дорад. Дар ин самт зарур аст, ки ҳамкории Намояндагии ЮНИСЕФ бо Мақомоти иҷроияи ҳокимияти давлатии вилояти Хатлон вобаста ба амалишавии механизмҳои банақшагирии стратегӣ дар сатҳи маҳал ба роҳ монда шавад.

Намояндагони шарикони рушд иброз намуданд, ки ҳадаф аз фаъолият дар ин самт омода намудани кадрҳои ҷавобгӯ ба талаботи муосир мебошад. Инчунин вобаста ба ғизои солими модару кӯдак барномаи алоҳида фаъолият менамояд, ки натиҷаи хуб ба бор овардааст.

Ҳамзамон барои ҳамкорӣ ва мусоидат дар  рушди соҳаи маориф ташкилот имконияти фарох дорад. Давоми соли гузашта дар ин самт корҳои зиёде анҷом дода шуда, якчанд нақшаҳои дигар тарҳрезӣ шудаанд, ки давоми соли равон амалӣ мегарданд.

Раиси вилоят ва намояндагони шарикони рушд изҳори умедворӣ намуданд, ки дар доираи ҳамкорӣ ба беҳтар намудани вазъи некуаҳволии сокинон ва ҳалли мушкилоти ҷойдоштаи соҳаҳо мусоидат менамоянд.

ДУШАНБЕ, 24.08.2023. /АМИТ «Ховар»/. Бо мақсади омодагӣ ба соли нави хониши 2023-2024 дар заминаи талаботи қонунгузории Ҷумҳурии Тоҷикистон «Дар бораи маориф», таҳким бахшидани раванди таълиму тарбия дар ҷомеа ва бо дарназардошти таҷдиди сохтор Муассисаи давлатии «Литсей барои хонандагони болаёқат дар шаҳри Хоруғ» ба фаъолият оғоз намуда, роҳбарияти нави он таъйин гардид.  Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Хоруғ хабар медиҳад.

Дар ин замина мулоқоти роҳбарияи  шаҳру вилоят ва роҳбарияти идораи маориф бо ҳайати омӯзгорони муассиса баргузор гардида, ба фаъолияти ин муассиса баъд аз таҷдид оғози расмӣ бахшида шуд. Роҳбарияти вилоят ва шаҳри Хоруғ аз роҳбарияти нави муассиса ва ҳайати омӯзгорони он даъват ба амал оварданд, ки ба фаъолияти муқаррарии худ идома бахшида, ба соли нави хониш омодагии ҷиддӣ бинанд.

Директори нави муассиса Хушбахт Давлатов вазифадор гардид, ки ба фаъолияти муассиса такони ҷиддӣ бахшида, барои баланд бардоштани сифати таълиму тарбия дар он тадбирҳои дахлдор андешад.

Ҳамин тариқ, сокинони вилоят ва шаҳри Хоруғ метавонанд ба муассиса ҳозир шуда, вобаста ба раванди таълиму тарбияи фарзандон ва омодагии онҳо ба соли нави хониш бо омӯзгорон ҳамкорӣ намоянд. Бояд гуфт, ки маблағи таълими хонандагон ва маоши ҳайати омӯзгорон бо тартиби қаблӣ нигоҳ дошта мешавад.

Дар МТМУ №14 ш. Душанбе конференсияи августии кормандони соҳаи маорифи шаҳри Душанбе таҳти унвони «Таҳсилоти рақамӣ - омили муҳими рушди соҳаи маорифи пойтахт» баргузор шуд. Зимни он муовини Раиси шаҳри Душанбе Дилбар Одилзода иброз дошт, ки танҳо соли 2022 дар шаҳри Душанбе аз ҳисоби ҳамаи сарчашмаҳои маблағгузорӣ 7 муассисаи таҳсилоти томактабӣ барои 924 ҷой мавриди истифода қарор дода шуд. Илова бар ин дар доираи нақшаи чорабиниҳои таҷлили 35-солагии Истиқлолияти давлатии Ҷумҳурии Тоҷикистон бунёду навсозии 10 муассисаи таҳсилоти томактабӣ бо 2110 ҷойи нишаст оғоз гардида, корҳои сохтмонӣ дар ин самт идома доранд. Гуфта шуд, ки дар айни замон дар шаҳри Душанбе 161 муассисаи таҳсилоти томактабӣ бо теъдоди 31 ҳазору 471 нафар тарбиягиранда фаъолият менамоянд, ки нисбат ба ҳамин давраи соли гузашта мутаносибан 11 муассисаи таҳсилоти томактабӣ ва 732 тарбиягиранда зиёд гаштааст.

То оғози соли нави таҳсили 2023- 2024 ҳамагӣ як ҳафтаи дигар боқӣ мондаасту халос. Вале, мутаассифона дар бархе аз Муассисаҳои таълимии шаҳру навоҳии мамлакат  масъулон фориғболиро пешаи худ қарор дода, омодагиро ба ин мавсими соли таҳсил кашол медиҳанд. Аз ҷумла, дар Муассисаи таълимии рақами 51-уми ноҳияи Фирдавсии шаҳри Душанбе таъмири пурраро ҳанўз аз моҳи майи соли равон оғоз карда бошанд ҳам, вале он то ҳол ба анҷом нарасидааст. Таъмири Муассисаи мазкурро фирмаи сохтмонии «Абдусаттори Ю» ба уҳда дошта, аксари  масолеҳи сохтмонӣ аз хориҷи кишвар дастрас карда шудааст. Дар давраи таътили мактаббачагон аксари  синфхонаҳо таъмир карда шуда бошанд ҳам, аммо онҳо бо асбобҳои аёнӣ пура ороиш  ва таъмин карда нашудаанд. Ба кори таъмиру тармими Муассиса бонувону хонандагон ҷалб шудаанд.

ДУШАНБЕ, 22.08.2023 /АМИТ «Ховар»/. 22 август Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар чаҳорчӯби сафари расмӣ ба Донишгоҳи забон ва фарҳанги Пекин ташриф оварданд.

Иттилоъ дода шуд, ки Донишгоҳи забон ва фарҳанги Пекин яке аз қадимтарин ва бонуфузтарин муассисаи таълимии Чин ба шумор рафта, дар соли таҳсили 2022-2023 дар он 9000 донишҷӯёни хориҷӣ   аз кишварҳои гуногуни  ҷаҳон таҳсил менамоянд. Аз рӯи нишондиҳандаи шумораи донишҷӯёни хориҷӣ донишгоҳи мазкур дар Чин ҷойи аввалро ишғол менамояд.

Дар ин донишгоҳ  Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе дар маросими ифтитоҳи нимпайкараи сардафтари адабиёти классикии форсу тоҷик, Одамушшуаро Абуабдулоҳ Рӯдакӣ иштирок ва суханронӣ намуданд.

Зимни суханронии худ муҳтарам Рустами Эмомалӣ таъкид намуданд, ки пас аз ҳазорсолаҳо низ ашъори Рӯдакӣ одамонро ба таҳкими дӯстӣ байни халқҳо ва тавсеаи муколама байни тамаддунҳо даъват менамояд. Абуабдуллоҳ Рӯдакӣ дар ташаккули адабиёти Шарқ нақши калидӣ дошта, назми нотакрори ӯ ганҷинаи адабиёти ҷаҳонро ғанӣ ва пурмуҳтаво гардонидааст.

Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ ба Ҳукумати Ҷумҳурии Мардумии Чин, Ҳукумати мардумии шаҳри Пекин, инчунин ба аҳли эҷод ҷиҳати бунёди нимпайкараи Абуабдулоҳ Рӯдакӣ дар шаҳри Пекин изҳори миннатдорӣ намуданд.

Мавриди таъкид  аст, ки лоиҳаи нимпайкара дар мувофиқа бо Сафорати Тоҷикистон дар Чин ва Осорхонаи Ҷинтайи Чин аз ҷониби ҳайкалтароши маъруф Юан Сикун омода шудааст.

Дар поясанги нимпайкара бо забонҳои тоҷикӣ, чинӣ ва англисӣ сатрҳои зерини бегазанд аз ашъори устод сабт шудаанд:

То ҷаҳон буд аз сари одам фароз,

Кас набуд дар роҳи дониш бениёз

Дониш андар дил чароғи равшан аст

В-аз ҳама бад бар тани ту ҷавшан аст.

ДУШАНБЕ, 22.08.2023. /АМИТ «Ховар»/. Дар асоси дастуру ҳидоятҳои Асосгузори сулҳу ваҳдати миллӣ — Пешвои миллат, Президенти мамлакат  муҳтарам Эмомалӣ Раҳмон ва Қонуни Ҷумҳурии Тоҷикистон «Дар бораи имтиёз ба омӯзгорони ҷавон» дар вилояти Хатлон ба 16 нафар омӯзгор Сертификати замини наздиҳавлигӣ тақдим шуд. Дар ин хусус АМИТ «Ховар» бо истинод ба Раёсати маорифи вилояти Хатлон иттилоъ медиҳад.

Идома

ДУШАНБЕ, 22.08.2023. /АМИТ «Ховар»/. Хонандаи синфи 9-и Муассисаи таҳсилоти миёнаи умумии №21-и ноҳияи Шоҳмансури шаҳри Душанбе Марям Абдураҳимова дар Чемпионати ҷаҳон оид ба таэквондо ИТФ, ки дар шаҳри Остонаи Ҷумҳурии Қазоқистон идома дорад, соҳиби медали тилло гардид. Дар ин хусус ба АМИТ «Ховар» сардори Раёсати муассисаҳои таҳсилоти томактабӣ ва миёнаи умумии Сарраёсати маорифи шаҳри Душанбе Асомиддин Бобозода хабар дод.

Дар мусобиқаи мазкур 900 нафар варзишгар аз 45 давлати дунё байни ҳам рақобат доранд. Ҷумҳурии Тоҷикистонро дар ин мусобиқаи ҷаҳонӣ 24 варзишгар намояндагӣ менамоянд.

Хонандаи пойтахт дар рӯзҳои аввали мусобиқа ба ҳамаи рақибонаш ғолиб омада, сазовори медали тилло гардид.

Ёдовар мешавем, ки мусобиқа 19 август оғоз шуда, то 27 август идома меёбад.