Дар Муассисаи томактабии рақами 128-уми ноҳияи Фирдавсии шаҳри Душанбе даври ноҳиявии озмуни «Мураббии сол-2023» баргузор гардид. Дар ин озмун ғолибони марҳилаи якум ширкат варзида, аз рӯйи шартҳои пешниҳодшуда донишу малакаи худро нишон доданд. Гуфта шуд, ки даври аввали озмуни мазкур дар Муассисаҳои томактабии ноҳия гузаронида шуда, аз миёни онҳо 19 нафар беҳтарин дониста шуданд ва ба марҳилаи ноҳиявӣ роҳ ёфтаанд. Хотиррасон менамоем, ки даври ноҳиявии озмуни «Мураббии сол-2023» дар ноҳияи Фирдавсии пойтахтро ҳайати ҳакамон пурра баҳогузорӣ карда, рафти он 1 рӯз идома меёбад ва беҳтаринҳо ба даври шаҳрӣ роҳхат мегиранд.
Раздел: Хабарҳо
Пагоҳ хонандагони синфҳои 1-уми муассисаҳои таҳсилоти умумии Тоҷикистон ба таътили тобистона мебароянд.
ДУШАНБЕ, 25.05.2023 /АМИТ «Ховар»/. Имрӯз дар Тоҷикистон машғулияти таълимӣ дар муассисаҳои таҳсилоти умумӣ, новобаста аз шакли ташкилию ҳуқуқӣ барои хонандагони синфи 1-ум ба анҷом мерасад. Дар ин хусус ба АМИТ «Ховар» котиби матбуоти Вазорати маориф ва илми Ҷумҳурии Тоҷикистон Наврӯзи Мирзо хабар дод.
Машғулияти таълимӣ барои хонандагони синфҳои 2-11 1 июни соли 2023 ба анҷом мерасад.
Тибқи иттилои манбаъ, бо мақсади анҷом ёфтани соли таҳсили 2022-2023 фармоиши Вазири маориф ва илми Ҷумҳурии Тоҷикистон «Оид ба анҷоми соли таҳсили 2022-2023, аттестатсияи аз синф ба синф гузаронидан ва хатм дар муассисаҳои таҳсилоти умумии Ҷумҳурии Тоҷикистон» ба тасвиб расид.
Аттестатсияи аз синф ба синф гузаронидани хонандагони синфҳои 4-8 ва 10-и муассисаҳои таҳсилоти умумӣ (рӯзона) аз 3 то 10 июн, инчунин аттестатсияи хатми синфҳои 9-и муассисаҳои таҳсилотӣ аз 3 то 15 июн ва аттестатсияи хатми синфҳои 11-и муассисаҳои таҳсилоти умумӣ аз 3 то 20 июн гузаронида мешавад.
Оғози даври ноҳиявии озмуни ҷумҳуриявии «Мураббии сол-2023».
Дар Муассисаи томактабии рақами 1-уми ноҳияи Шоҳмансури шаҳри Душанбе даври ноҳиявии озмуни Мураббии сол-2023 баргузор гардид. Довталабони озмун аз 10 Муассисаи томактабии ҳудуди ноҳияи Шоҳмансури шаҳри Душанбе ширкат варзида, дар назди ҳакамони озмун аз рӯи 10 шарти пешниҳодшуда, аз ҷумла намоиши дастовардҳои довталабон, ҳисоботи эҷодӣ, донистани ҳуқуқҳои меъёрии соҳаи маориф, маҳорати сухандонию суханварии довталаб, донистани муаммоҳои педагогӣ ва психологӣ, кор бо технологияи муосир, машғулият дар гуруҳ дониш ва маҳорати худро санҷиданд. Озмуни мазкур пас аз натиҷагирӣ ва саволу ҷавоб бо довталабон аз ҷониби аъзои ҳакамон ҷамъбаст гардида, ғолиб ба даври шаҳрии озмуни ҷумҳуриявии «Мураббии сол-2023» роҳхат мегирад.
Рӯзи Дави миллӣ.
Чун анъана Дави миллӣ аз маҳаллаи Чорбоғ шурӯъ шуда то Наврӯзгоҳи пойтахтамон идома ёфт, ки дар маҷмӯъ масофа 10 км-ро дарбар гирифт. Тибқи маълумоти Кумитаи кор бо ҷавонон ва варзиши назди Ҳукумати ҶТ дар Дави миллӣ 53 ҳазору 700 нафар шаҳрвандони касбу кори гуногун ва дар марафони велосипедронӣ 1560 кас иштирок намуд. Ёдовар мешавем, ки Дави миллӣ дар асоси Фармони Президенти Ҷумҳурии Тоҷикистон аз 28 марти соли 2007 «Дар бораи Рӯзи дави миллӣ» ҳамасола якшанбеи сеюми моҳи май дар ҷумҳурӣ гузаронида мешавад. Мақсад аз баргузории мусобиқа-таҳкими тарзи ҳаёти солим, рушду инкишофи соҳаи варзиш ва оммавияти он байни аҳолӣ мебошад.
Корҳои ободонӣ дар ноҳияи Рашт.
Бунёду азнавсозии Муассисаҳои таълимиву томактабӣ дар ин минтақаи дурдасти кишвар бомаром ҷараён дошта, дар айни ҳол бештари иншоотҳо дар ҳоли анҷомёбӣ қарор доранд. Муассисаи таҳсилоти миёнаи умумии рақами 49 дар деҳаи Хуфаки ҷамоати деҳоти Қалъанаки ноҳияи Рашт ҷойгир буда, айни замон дар он 276 нафар хонанда пайи таҳсил ҳастанд. Таълимгоҳи мазкур дорои 8 синфхонаи таълимӣ буда, омӯзгорон бо истифодаи шароити мавҷудаи таълим ба хонандагон дарс мегӯянд. Корҳои сохтмонӣ дар бинои иловагии назди таълимгоҳ аз моҳи августи соли 2022 оғоз гардида, дар назар аст, ки то таҷлили ҷашни Ваҳдати миллӣ ба анҷом расад. Ҳамзамон дар доираи корҳои бунёду азнавсозии Муассисаҳои таълимӣ ва томактабӣ Муассисаи таҳсилоти миёнаи умумии рақами 61-и деҳаи Шаҳринави ҷамоати деҳоти Қалъанаки ноҳияи Рашт низ азнавсозӣ гардида истодааст. Бунёди ин таълимгоҳ низ бо дастгириҳои соҳибкорони маҳаллӣ ва мардуми деҳа амалӣ карда шуда, корҳои сохтмонӣ аз соли 2021 оғоз гардидааст ва дар назар аст, ки то оғози соли нави таҳсил ба истифода супорида шавад.
Оғози даври дуюми озмуни ҷумҳуриявии «Фурӯғи субҳи доноӣ китоб аст» дар ноҳияи Ш. Шоҳин.
Дар ноҳияи Шамсидин Шоҳини вилояти Хатлон даври ноҳиявии озмун бо иштироки беш аз 660 нафар сокинон аз рӯи 6 номинатсия баргузор шуд. Бинобар иттилоъи масъулини шуъбаи маорифи мақомоти иҷроияи ҳокимияти давлатии ноҳияи Шамсиддин Шоҳин бештари иштирокчиёни озмун маҳз хонандагони муассисаҳои таҳсилоти миёнаи умумӣ ба ҳисоб мераванд, ки аксарияти онҳо дар номинатсияи адабияти кӯдакон ва наврасон, адабиёти муосир иштирок карданд ва дар миёни онҳо ҳамзамон наврасоне иштирок доштанд, ки худро дар номинатсияи эҷоди назм санҷиданд. Дар ноҳияи Шамсиддин Шоҳин дар солҳои қаблии баргузории озмун шумораи зиёди сокинон ҳам миёни наврасон ва ҳам калонсолон ба даврҳои ҷумҳуриявӣ роҳ ёфта буданд, ки сол аз сол шавқу рағбатшон нисбат ба китобдориву китобхонӣ зиёд гардида истодааст.
Оғози даври ноҳиявии озмуни ҷумҳуриявии «Тоҷикистон-Ватани азизи ман».
Даври якуми озмуни ҷумуҳуриявии «Тоҷикистон-Ватани азизи ман» дар мактаб-интернати миёнаи махсуси мусиқии ҷумхуриявии ба номи Зиёдулло Шаҳидӣ дар сатҳи баланди ташкилӣ доир шуд. Аъзои ҳакамон аз ҳисоби омӯзгорон ва аҳли санъат интихоб шуда, ба ҳар як довталаб аз руӣ асари навохтааш баҳогузорӣ намуданд. Тибқи иттилоъ дар даври ноҳиявии озмуни мазкур 60 нафар таълимгирандагони мактабҳои мусиқии ноҳияи Фирдавсӣ ва дӯстдорони санъат ширкат намуданд. Хотирасон менамоем, ки озмун бо ибтикори Мақомоти иҷроияи ҳокимияти давлатии ноҳияи Фирдавсӣ ташкил ва баргузор карда шуд.
Идомаи даври дуюми озмуни ҷумҳуриявии «Фурӯғи субҳи доноӣ китоб аст».
Дар толори таълимгоҳи рақами 90-уми ноҳияи Синои пойтахт даври дуюми озмуни ҷумҳуриявии «Фурӯғи субҳи доноӣ китоб аст» бо муваффақият идома дорад. Ба ин даври озмуни мазкур аз муассисаҳои таълимии ноҳияи Сино 1860 нафар довталаб роҳхат гирифтанд, ки онҳо аз рўи 6 номинатсия дар назди ҳайати ҳакамон ҳунару истеъдоди худро нишон доданд. Бояд гуфт, ки ба узви ҳакамони озмуни мазкур кормандони соҳаи маориф, аҳли адаб шомил шуданд ва ба ҷавобҳои иштирокчиён холисона баҳогузорӣ менамоянд. Тибқи иттилоъ пас аз натиҷагирӣ ғолибон муайян гардида, ба даври дигар роҳхат мегиранд.
Забономӯзӣ дар Муассисаҳои томактабӣ.
Омӯзиши забонҳои хориҷӣ тақозои замон аст. Ва омӯзиши он дар Муассисаҳои томактабӣ низ бояд ба таври зарурӣ ба роҳ монда шавад. Зеро кӯдакон дар синни хурдсолӣ зеҳни қавӣ дошта, зуд забонҳоро аз худ менамоянд. Масъалаи мазкур дар Муассисаи томактабии рақами 67-уми ноҳияи Шоҳмансури шаҳри Душанбе ба таври лозима ба роҳ монда шудааст. Дар ин Муассиса 8 гуруҳ фаъолият карда 290 нафар дӯстрӯяк ба таълиму тарбия фаро гирифта шудааст, ки ба онҳо 18 нафар мураббия ва омӯзгор тарбия ва тадрис медиҳанд. Дар машғулияти забони англисӣ кӯдакон фаъолона ширкат варзида, аз омӯзгори ин фан дар бораи оила, тарзи салом гуфтану одоби муоширатро омӯхтанд.
Идомаи даври ноҳиявии озмуни ҷумҳуриявии «Фурӯғи субҳи доноӣ китоб аст».
Дар МТМУ №31 ш. Душанбе даври ноҳиявии озмуни ҷумҳуриявии «Фурўғи субҳи доноӣ китоб аст» идома дорад. Тибқи иттилоъ 1200 нафар довталаб аз рўи 6 номинатсия дар ин озмун иштирок намуда, малакаву дониши хешро месанҷанд. Яке аз довталаби озмун Заррина Ҷӯрабекзода хонандаи синфи 8-и муассисаи мазкур мебошад. Мавсуф муддати се сол аст, ки дар ин озмуни шеъру шоирӣ ширкат намуда истодааст. Довталаби дигари озмун Марҷона Шарифова мебошад. Ба гуфти номбурда ҳар шахс аз китобҳои хондааш дарси одобу ахлоқ омӯхта барои хубтару хуштар гузаронидани умр камари ҳиммат мебандад, накӯкору покахлоқ ва ватандӯст тарбия ёфта ба камол мерасад.
