Раздел: Хабарҳо

ДУШАНБЕ, 22.08.2023. /АМИТ «Ховар»/. Дар асоси дастуру ҳидоятҳои Асосгузори сулҳу ваҳдати миллӣ — Пешвои миллат, Президенти мамлакат  муҳтарам Эмомалӣ Раҳмон ва Қонуни Ҷумҳурии Тоҷикистон «Дар бораи имтиёз ба омӯзгорони ҷавон» дар вилояти Хатлон ба 16 нафар омӯзгор Сертификати замини наздиҳавлигӣ тақдим шуд. Дар ин хусус АМИТ «Ховар» бо истинод ба Раёсати маорифи вилояти Хатлон иттилоъ медиҳад.

Идома

ДУШАНБЕ, 22.08.2023. /АМИТ «Ховар»/. Хонандаи синфи 9-и Муассисаи таҳсилоти миёнаи умумии №21-и ноҳияи Шоҳмансури шаҳри Душанбе Марям Абдураҳимова дар Чемпионати ҷаҳон оид ба таэквондо ИТФ, ки дар шаҳри Остонаи Ҷумҳурии Қазоқистон идома дорад, соҳиби медали тилло гардид. Дар ин хусус ба АМИТ «Ховар» сардори Раёсати муассисаҳои таҳсилоти томактабӣ ва миёнаи умумии Сарраёсати маорифи шаҳри Душанбе Асомиддин Бобозода хабар дод.

Дар мусобиқаи мазкур 900 нафар варзишгар аз 45 давлати дунё байни ҳам рақобат доранд. Ҷумҳурии Тоҷикистонро дар ин мусобиқаи ҷаҳонӣ 24 варзишгар намояндагӣ менамоянд.

Хонандаи пойтахт дар рӯзҳои аввали мусобиқа ба ҳамаи рақибонаш ғолиб омада, сазовори медали тилло гардид.

Ёдовар мешавем, ки мусобиқа 19 август оғоз шуда, то 27 август идома меёбад.

То оғози соли нави таҳсили 2023-2024 рўзҳои ба шумор боқӣ мондааст. Аз ин рӯ ҳамасола Вазорати маориф ва илми ҶТ барои таъмини мактаббачагон бо китобҳои дарсӣ чораю тадбирҳои мушаххас меандешад. Аз ҷумла, тибқи дархости раёсату шуъбаҳои  маорифи шаҳру навоҳии мамлакат барои  соли таҳсили равон 82 номгӯӣ китобҳои дарсӣ бо теъдоди умумии 4 миллиону 167 ҳазор нусха ба  нақша гирифта шудааст, ки айни замон дар нимсолаи аввали  соли ҷорӣ дар раёсат ва шуъбаҳои маорифи шаҳру ноҳияҳои ҷумҳурӣ 89 номгўӣ китобҳои дарсӣ ба миқдори 3 миллиону 475 ҳазору 750 нусха таъмин карда шуд, ки ин 51 фоизи эҳтиёҷотро ташкил медиҳад. Мувофиқи иттилои масъулин дар самти норасоии китобҳои дарсӣ барои синфҳои 7 аз фанни  забони англисӣ 27 ҳазору 521 нусха, боз фанни мазкур барои синфҳои 8-ум 18 ҳазору 898 нусха, инчунин  забони англисӣ барои синфи 915 ҳазору 455-нусха, «Физика» барои синфи 9-ум 11 ҳазору 831 нусха  ва тарбияи ҷисмонӣ барои синфҳои 1-4  125 ҳазор нусха дар умум 198 ҳазору 705 нусха китоб норасоӣ дошта,  аз рўи имконият нашри онҳо ба роҳ монда шудааст.

Бо ибтикори Мақомоти иҷроияи ҳокимияти давлатии шаҳри Душанбе ба ифтихори соли таҳсили нави мактаббачагон  ва таъмини хонандагон бо ашёи хониш ва сару либоси мактабӣ дар 4-ноҳияи пойтахт аз санаи 1-уми июли соли равон ярмаркаҳои  мактабӣ таъсис дода шудааст. Дар бозори «Меҳргон»-и шаҳри Душанбе чунин ярмарка таъсис дода шуд.Тавре маълум гардид, дар ин макон ашёҳои хониш  ва сару либоси мактабӣ пешниҳоди харидорон гардонида шудаанд. Қисми зиёди  асбобҳои хониш ва сару либос аз  корхонаҳои ватанӣ дастрас гардидааст. Арзиши сару либоси мактабӣ аз 180 то 350 сомонӣ, дафтар аз 50 дирам то 3 сомонӣ, ручка аз 1 то 5 сомонӣ муқаррар карда шудааст. Ҳамзамон чунин ярмаркаҳо дар бозори «Ховарон»-и ноҳияи Шоҳмансур ва дар бозорҳои «Панҷшер» ва «Корвон»"-и шаҳри Душанбе таъсис дода шудааст. Ярмаркаҳои мазкур то санаи  10-уми сентябри соли равон амал мекунанд.

ДУШАНБЕ, 21.08.2023. /АМИТ «Ховар»/. Аз оғози фаъолияти ду агрегати аввалини неругоҳи «Роғун», ки бо фишори пасти обанбори тозабунёд кор мекунанд, то имрӯз, аллакай, зиёда аз 6,4 миллиард киловатт – соат неруи барқ ба маблағи беш аз 1,5 миллиард сомонӣ истеҳсол ва ба низоми ягонаи энергетикии мамлакат интиқол дода шудааст. Дар ин хусус зимни суханронии Президенти Ҷумҳурии Тоҷикистон муҳтарам Эмомалӣ Раҳмон 10 августи соли равон  дар мулоқот  бо бунёдгарони НБО-и Роғун иттилоъ дода шуд.

«Иқтисоди миллии мо ҳар сол дар сатҳи на кам аз 7 фоиз рушд ёфта истодааст, ки боиси афзоиши талаботи солона ба неруи барқ дар ҳаҷми ду – дуюним фоиз мегардад. Аз ин лиҳоз, моро зарур аст, ки ба масъалаи истифодаи самаранок ва ҳарчи бештари захираҳои энергетикии мамлакатамон  диққати аввалиндараҷа ва доимӣ диҳем. Маҳз ба ҳамин хотир мо неругоҳи «Роғун»-ро сохтмони аср эълон кардаем»,- иброз доштанд Пешвои миллат.

Дар мулоқоти мазкур Сарвари давлат дар муҳлатҳои тасдиқшуда анҷом додани корҳои сохтмони неругоҳ ва ба истифода супоридани агрегатҳои навбатиро  таъкид намуда, супориш доданд, ки Муассисаи давлатии «Мудирияти минтақаи зериобшавандаи неругоҳи барқи обии «Роғун» якҷо бо Вазорати меҳнат, муҳоҷират ва шуғли аҳолӣ, мақомоти иҷроияи ҳокимияти давлатии шаҳру ноҳияҳои интиқолдиҳанда ва қабулкунандаи муҳоҷирон кӯчонидани аҳолиро аз минтақаи зериобшаванда дар сатҳи зарурӣ ба роҳ монанд.

«Дар ин раванд, зарур аст, ки ҷиҳати бо кор таъмин намудани шахсони кӯчонидашуда, ташкили курсҳои касбомӯзӣ барои онҳо, инчунин, ба хоҷагӣ ва оилаҳои кӯчонидашуда ҷудо намудани қитъаҳои замин барои ташкили хоҷагиҳои деҳқонӣ чораҷӯӣ карда шавад»,-тазаккур доданд Пешвои миллат.

Президенти мамлакат муҳтарам Эмомалӣ Раҳмон инчунин  ба Вазорати фарҳанг, кумитаҳои телевизион ва радио, кор бо занон ва оила, ҷавонон ва варзиш, Ҳизби Халқии Демократии Тоҷикистон, Иттифоқи нависандагон ва дигар иттифоқҳои эҷодӣ дастур доданд, ки корҳои амалиро доир ба ташкили вохӯриҳо, чорабиниҳои фарҳангиву фароғатӣ, инъикоси фаъолияти коргарону мутахассисони неругоҳи «Роғун» ва эҷоди асарҳои адабӣ оид ба фаъолияти бунёдкорони ин иншооти бузурги аср густариш диҳанд.

Дар ин зимн бояд ёдовар шуд, ки  18 августи соли равон ҳайати зиёда аз як саду ҳафтоднафараи устодону кормандони Донишгоҳи миллии Тоҷикистон, асосан аз ҳисоби занону духтарон ва ҷавонон  дар мавзеи сохтмони Неругоҳи барқи обии «Роғун» бо рафти  корҳои сохтмонӣ ва иншоти асосии неругоҳ  шинос шуданд.  Дар ҷараёни сафар аз ҷониби Донишгоҳи миллии Тоҷикистон ба китобхонаи Неругоҳи барқи обии «Роғун» 600 нусха китобу адабиёти тозанашр тақдим гардид.

Инчунин барои болидахотирии коргарону сохтмончиёни Неругоҳи барқи обии «Роғун» аз ҷониби дастаи ҳунарии «Наврӯз» — и назди Донишгоҳи миллии Тоҷикистон барномаи рангини фарҳангӣ- фароғатӣ пешниҳод шуд.

Ин тадбири роҳбарияти Донишгоҳи миллии Тоҷикистон боиси руҳбаландии коргарону сохтмончиёни иншооти азими гидроэнергетикии мамлакат-НБО «Роғун» гардида, умеду боварии онҳоро дар партави дастуру ҳидоятҳо ва роҳнамоиҳои Пешвои муаззами миллат муҳтарам Эмомалӣ Раҳмон  ба ояндаи боз ҳам дурахшони Тоҷикистон афзун менамояд.

Ҳамин гуна иқдомро дар пайравӣ ба Донишгоҳи миллии Тоҷикистон дигар ташкилоту муассисаҳои   мамлакат  метавонанд барои ҳайати кормандон  амалӣ намуда, бо рафти корҳои сохтмони дар неругоҳ ва шукӯҳу шаҳомоти ин иншооти нодири гидроэнергетикӣ аз наздик шинос шаванд.

Ёдовар мешавем, ки баъди ба даст овардани Истиқлоли давлатии Ҷумҳурии Тоҷикистон, маҳз бо ташаббус ва дастгирии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сохтмони НБО –и «Роғун» – иншооти бузурги стратегӣ шуруъ гардид.

29 октябри соли 2016 бо иштироки Пешвои миллат муҳтарам Эмомалӣ Раҳмон бунёди сарбанди НБО-и  «Роғун» оғоз гардида буд. Ҳамон рӯз Роҳбари давлат паси чанбари булдозер нишаста, яку ним соат бо пеш кардани сангу шағал маҷрои дарёи Вахшро бастанд ва ба бунёди сарбанди ин неругоҳи азими аср ҳусни оғоз бахшиданд.

Бояд тазаккур дод, ки НБО –и «Роғун», пуриқтидортарин иншооти силсилаи неругоҳҳои дарёи Вахш аст, ки аз 6 агрегат иборат буда, тавоноии ҳар кадоми он 600 мегаваттро ташкил медиҳад ва бо иқтидори 3600 мегаватт (беш аз 17 миллиард киловатт-соат) калонтарин неругоҳи барқи обӣ дар минтақа хоҳад буд.

Ҳак бар ҷониби  Шоири халқии Тоҷикистон, барандаи Ҷоизаи давлатии ба номи Рӯдакӣ Камол Насрулло дар як шеъри ба ин иншооти азими аср бахшидааш гуфтааст:

Роғун — сафо, Роғун — вафо, Роғун- бақои мо бувад,

Армони чандинасра, уммеди ниёи мо бувад!

ДУШАНБЕ, 21.08.2023 /АМИТ «Ховар»/. 21 август Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ ба ноҳияи Хайдиени шаҳри Пекин ташриф оварда, бо фаълояти Маркази намоишиву озмоишии  «Шаҳри ҳушманд» шинос шуданд.

Зимни шиносоӣ иттилоъ дода шуд, ки «Шаҳри ҳушманд» аз дастовардҳои имрӯзаи ҷаҳонӣ ба ҳисоб рафта, дар муътадилгардонии кори низоми нақлиётӣ, истифодаи самарабахши захираҳои энергетикӣ, содагардонии равандҳои идоракунӣ, баланд бардоштани сатҳи бехатарӣ, иштироки шаҳрвандон дар ҳаёти шаҳр, беҳбуди муҳити созгор ва сатҳи зиндагӣ метавонад нақши назаррас дошта бошад.

Имрӯз кишвари Чин бо истифода аз технологияҳои пешрафтаи мониторинг, коркарди маълумотҳои калон ва зеҳни сунъӣ дар самти содда  кардани низоми  идоракунии шаҳрҳо ва ҷойҳои ҷамъиятӣ ва  пешбурди ташаббусҳо оид ба шаҳрҳои ҳушманд мавқеи пешсафиро дар ҷаҳон касб намудааст.

ДУШАНБЕ, 22.08.2023 /АМИТ «Ховар»/. Дар ҷаҳони муосир масоили ҳифзи муҳити зисти солим ҳамчун заминаи асосии таъмини ҳаёти шоистаи наслҳои ояндаи инсоният яке аз муаммоҳои мубраму ҳалталаби сатҳи байналмилалӣ  ба ҳисоб меравад. Дар робита ба ин, дар фазои муносибатҳои экологӣ проблемаҳои мавҷуда вобаста ба самтҳои алоҳида тасниф гардидаанд.

Идома

СУҒД, 22.08.2023 /АМИТ «Ховар»/. 18 август муовини Сарвазири Ҷумҳурии Тоҷикистон, Раиси комиссияи Озмуни ҷумҳуриявии «Фурӯғи субҳи доноӣ китоб аст» Матлубахон Сатториён бо рафти баргузории даври сеюми озмуни мазкур дар вилояти Суғд шинос шуд.

Тавре ба мухбири минтақавии АМИТ «Ховар» Саъдулло Маҳкам дар Маркази таҳсилоти иловагии вилояти Суғд хабар доданд, даври сеюми озмун (вилоятӣ) аз 14 август дар МДТ «Мактаби Президентӣ барои хонандагони болаёқат дар шаҳри Бӯстон»-и вилояти Суғд аз рӯйи шаш номинатсия – адабиёти кӯдакону наврасон ва осори шифоҳӣ, адабиёти классикии тоҷик, адабиёти муосири тоҷик, адабиёти ҷаҳон, эҷоди назм ва эҷоди наср оғоз гардид.

Муовини Сарвазири Тоҷикистонро зимни шиносоӣ муовини Вазири маориф ва илми Ҷумҳурии Тоҷикистон Зиёдулло Абдулзода, муовини Раиси вилояти Суғд  Зайнура Азимӣ, сардори Раёсати маорифи вилоят Мадина Набизода ва дигар масъулон ҳамроҳӣ намуданд.

Дар даври сеюми озмун кӯдакону наврасон, хонандагони муассисаҳои таҳсилоти миёнаи умумӣ, донишҷӯёни муассисаҳои таҳсилоти ибтидоӣ, миёна ва олии касбӣ, докторантҳои муассисаҳои таҳсилоти олӣ ва илмӣ, омӯзгорони ҳамаи зинаҳои таҳсилот, калонсолон ва намояндагони касбу кори гуногун иштироки фаъолона доранд.

Матлубахон Сатториён ҷараёни иштирок ва раванди баҳогузории ҳайати ҳакамони озмунро аз рӯйи номинатсияҳо назорат намуд. Дар ҷараёни боздид ӯ масъулинро дастур дод, ки шаффофияти озмунро таъмин намоянд. Зеро ин озмун ҷиҳати дарёфти чеҳраҳои арзанда дар қаламрави вилоят ва ҷумҳурӣ кумак менамояд.

Тавре маълум аст, Озмуни ҷумҳуриявии «Фурӯғи субҳи доноӣ китоб аст» соли панҷум аст, ки бо сарпарастии Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон дар Ҷумҳурии Тоҷикистон миёни қишрҳои гуногуни ҷомеа бо шукуҳу шаҳомати хосса доир мегардад.

Таваҷҷуҳи хоси Пешвои миллат ба баргузории ин озмун бори дигар аз он шаҳодат медиҳад, ки нақши он дар баланд бардоштани сатҳи маънавиёти миллат, махсусан камолоти насли навраси тоҷик калон  аст.

Даври сеюми озмун то 26 август идома меёбад.

ДУШАНБЕ, 21.08.2023 /АМИТ «Ховар»/. 21 август Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ ба  Осорхонаи таърихи Ҳизби Коммунистии Чин ташриф оварда,  бо намунаи ёдгориҳо ва санадҳои таърихӣ доир ба таърихи  таъсиси ҳизб ва давраҳои ташаккули он шинос шуданд. Дар ин хусус АМИТ «Ховар» бо истинод ба Маҷлиси миллии Маҷлиси Олии Ҷумҳурии Тоҷикистон хабар медиҳад.

Осорхонаи мазкур аз соли 2021 ба фаъолият оғоз намуда, дар он беш аз 2500 акс, 3500 ҳуҷҷату санадҳои таърихӣ ва дигар нигораҳо ба маъраз гузошта шудаанд.

Осорхонаи таърихи Ҳизби Коммунистии Чин ҳудуди беш аз 147 ҳазор метри мураббаъро ишғол карда, аз осорхонаҳои калонтарин ва дорои аҳамияти миллӣ барои мардуми  Чин ба ҳисоб меравад.

Бинои асосии он дар шакли иероглифи чинии «гун», (коргарон) сохта шуда, таҷассумгари пешоҳангии  Ҳизби Коммунистии Чин дар байни  синфи коргар, мардум ва миллати Чин мебошад.