Ба муносибати 30 -солагии рӯзи таъсисёбии Қувваҳои мусаллаҳи ҶТ дар Кӯдакистони №98 -уми ноҳияи Синои пойтахт маҳфили идона бо иштироки тарбиятгирандагон ва мураббиён баргузор гардид. Дар ин тадбир масъулин суханронӣ карда, дустрӯяконро ба ин рӯзи фархунда табрику таҳният гуфта, ба ҳар яки онҳо дар зиндагӣ комёбиҳои беназирро таманно намуданд. Сипас барномаи фарҳангии тарбиятгирандагон оғоз гардид. Дустрӯякон дар даст парчамҳо бо садо додани суруди дилнишин дар васфи ватан бо иҷрои амалу машқҳои гуногун ҳунарашонро ба ҳозирин нишон доданд.
Раздел: Хабарҳо
Таҷлили рӯзи таъсисёбии Артиши миллӣ дар Муассисаҳои томактабӣ.
Дар ҷамъомад дӯструякони Кӯдакистони №124 пойтахт бо орзуҳои зиёд ба бар либоси низомӣ намудаанд, ки ин шаҳодат аз он медиҳад, ки кӯдакон низ бо ҳисси баланди ватандӯстӣ дар оянда мехоҳанд, дар ҳифзу ҳимояи марзу буми кишвар саҳмгузор бошанд. Қобили қайд аст, ки дар чорабинӣ кӯдакон бо руҳу илҳоми тоза дар васфи ватану диёри хеш порчаҳои шеърӣ қироат намуданд. Тавре мураббиёни Муассисаи мазкур иброз доштанд, мо пайваста барои пешвози санаҳои таърихии кишварамон дар кӯдакистон чорабиниҳои гуногун доир менамоем, то ин ки аз овони наврасӣ дар дили тарбиятгирандагон меҳри ватан афзун гардида, ҳимоя ва содиқона хазмат намуданро дар роҳи ватан ҳадафи асосии хеш қарор диҳанд.
Комиссияи олии аттестатсионии Тоҷикистон: «Китобҳои дарсӣ ва воситаҳои таълимӣ аз барномаи «Антиплагиат» гузаронида мешаванд».
ДУШАНБЕ, 21.02.2023. /АМИТ «Ховар»/. Комиссияи олии аттестатсионии назди Президенти Ҷумҳурии Тоҷикистон нақша дорад, ки китобҳои дарсӣ ва воситаҳои таълимиеро, ки аз ҷониби шуъбаи тахассусии комиссия зери шубҳа қарор мегиранд, аз барномаи «Антиплагиат» гузаронад. Дар ин хусус зимни нишасти матбуотӣ дар Комиссияи олии аттестатсионӣ иттилоъ дода шуд.
«Имрӯзҳо ба мушоҳида мерасад, ки дар саҳифаи аввали як китоби таълимие, ки ҳаҷман хурд аст, номи 4 муаллиф навишта шудааст. Ин амал шояд аз мантиқ берун бошад. Ва ё ҳоло муаллифоне ёфт мешаванд, ки матнҳоро аз забони русӣ тарҷума карда, худро мутарҷими матн неву муаллифи он менависанд, ки ин амалҳои онҳо, албатта, водор месозад, то ин гуна китобҳо аз санҷиш гузаронида шуда, шаффофият таъмин карда шавад»,- таъкид гардид дар нишаст.
Дар Комиссияи олии аттестатсионии Тоҷикистон барои муайян намудани асолати диссертатсияҳои воридшуда аз барномаи компютерии «Антиплагиат» васеъ истифода бурда мешавад. Ин барнома имкон дод, то ҳолатҳои зиёди асардуздӣ ошкор карда шаванд.
Масъулин тазаккур доданд, ки қаблан натиҷаҳои гуногуни санҷиши диссертатсияҳо тавассути барномаи компютерии «Антиплагиат»-и Комиссия аз як тараф ва муассисаҳои илмӣ ва таҳсилоти олии касбии мамлакат аз сӯйи дигар боиси ба миён омадани баҳсу норизоии зиёд гардида, ба мушкили ҷиддӣ табдил ёфта буд.
Комиссия дар мувофиқа бо Вазорати маориф ва илми ҷумҳурӣ ва Академияи миллии илмҳои Тоҷикистон тасмим гирифт, ки тибқи хоҳишу дархости довталабон санҷиши диссертатсия ва ё авторефератро тавассути барномаи компютерии «Антиплагиат»-и Комиссия тариқи онлайн ба роҳ монад.
Ҳоло ин раванд идома дорад ва натиҷаи асолати диссертатсияҳо назар ба солҳои пеш хеле беҳтар шудааст.
Иштироки муваффақонаи варзишгарони тоҷик дар чемпионати ҷаҳон.
Дар шаҳри Белгради кишвари Сербия чемпионати ҷаҳон оид ба муҳорибаҳои омехта доир гардид. Дар натиҷа ба дастаи мунтахаби Тоҷикистон муяссар шуд,то ба гирифтани 4 медали тилло, 2 нишони нуқра ва шаш ҷоизаи биринҷӣ мушарраф гардад. Аз ҷумла,Манижа Самадова, Отабек Раҷабов унвони қаҳрамониро ба даст оварданд. Ба иқрори масъулин иштироки муҳорибачиёни тоҷик дар муқоиса ба соли гузашта дар чемпионати ҷаҳон беҳтар буд. Зеро соли қаблӣ варзишгарони мо соҳиби 7 медали гуногун гашта буданд. Имсол шумораи медалҳо ба 20 адад расид, ки аз он 4-тоаш медали тилло аст.
Идомаи баргузории даври якуми озмуни ҷумҳуриявии «Тоҷикон-оинаи таърихи миллат» дар муассисаҳои таълимӣ.
Даври якуми озмун дар Литсейи №2 барои хонандагони болаёқати шаҳри Душанбе бо омодагии ҷиддии хонандагон ба таври шаффоф доир гардид.Дар ин давр беҳтарин хонандагон аз синфҳои 5 то 11, дар умум 58 нафар ширкат намуданд. Тибқи маълумот аз байни довталабон танҳо 22 нафар беҳтаринҳо ба даври ноҳиявӣ роҳхат мегиранд.
Таҷлили рӯзи таъсисёбии Артиши миллӣ.
Ҳамасола дар Муассисаҳои таълимиву томактабии шаҳру навоҳии мамлакат бахшида ба рӯзи Артиши миллии ҶТ чорабиниҳои бошукуҳ гузаронида мешавад. Бо ин мақсад дар саҳни таълимгоҳи №23 -юми ноҳияи Шоҳмансури шаҳри Душанбе ба муносибати 30 солагии рӯзи таъсисёбии Қувваҳои мусаллаҳи ҶТ чорабинии идона бо иштироки намояндагони Ҳукумати ноҳия баргузор гардид. Зимни баромад қайд гардид, ки Қувваҳои мусаллаҳ дар ҳар давру замон барои ҳар як кишвари соҳибистиқлол пояи матин, кафили бехатарӣ ва таъминкунандаи ҳаёти осоиштаи мардум ба ҳисоб меравад. Барномаи фарҳангии хонандагон ба маҳфил ҳусни тоза бахшид.
Чорабиниҳои фарҳангӣ- фароғатӣ ба ифтихори рўзи таъсисёбии Артиши миллӣ.
Дар боғҳои фарҳангӣ-фароғатии пойтахт бахшида ба рўзи таъсисёбии Артиши миллӣ чорабиниҳои фарҳангӣ ва барномаҳои тарбияи ҳарбӣ-ватандўстӣ баргузор гардид. Чорабиниҳои фарҳангӣ бо ташаббуси Вазорати мудофиаи ҶТ роҳандозӣ шуд. Дар тадбири мазкур афсарону сарбозони қисмҳои ҳарбии сохторҳои ҳарбӣ, ҷавонону сокинони пойтахт иштирок намуданд. Дар навбати хеш аҳли санъат тавонистанд, бо суруду таронаҳои Ватандўстона табъи ҳозиринро болида намоянд.
Оғози даври минтақавии олимпиадаи фаннӣ дар ш. Ҳисор.
Дар Муассисаи давлатии таълимии «Мактаби Президентӣ барои хонандагони болаёқат» дар шаҳри Ҳисор даври сеюми олимпиадаи фаннӣ аз фанҳои табиӣ-риёзӣ ва ҷамъиятӣ-гуманитарӣ байни хонандагони синфҳои 9 ва 10-и Муассисаҳои таҳсилоти миёнаи умумии шаҳру ноҳияҳои тобеи ҷумҳурӣ баргузор гардид. Дар даври минтақавии олимпиадаи мазкур 998 нафар хонанда, аз тамоми қаламрави кишвар ширкат варзиданд. Ёдовар мешавем, ки 512 нафар хонанда аз фанҳои табиӣ-риёзӣ ва 486 нафари дигар аз фанҳои ҷамъиятӣ-гуманитарӣ сатҳи донишандӯзии хешро аз рӯи 13 фанни таълимӣ санҷиданд.
Роҳандозии озмуни «Беҳтарин донандаи луғат» дар муассисаҳои таълимӣ.
Бо ибтикори шуъбаи маорифи ноҳияи Исмоили Сомонии шаҳри Душанбе бо мақсади муайян намудани сатҳи забондонии хонандагону омӯзгорони Муассисаҳои таълимӣ ва Литсейю Гимназияҳои ҳудуди ноҳияи номбаршуда, озмуни «Беҳтарин донандаи луғат» бо 3 забон - забонҳои тоҷикӣ, русӣ ва англисӣ роҳандозӣ гардид. Ин тадбири ақлонию зеҳнӣ дар толори таълимгоҳи рақами 10-уми ноҳияи мазкур доир гардида, дар он хонандагон аз синфҳои 5 то 11 ширкат варзиданд. Мавриди қайд аст, ки озмуни «Беҳтарин донандаи луғат» маротибаи аввал дар ноҳияи Исмоили Сомонии шаҳри Душанбе аз рӯи китоби «Луғати вожаҳои серистеъмоли забонҳои тоҷикӣ, русӣ ва англисӣ», ки 400 луғату калимаҳои серистеъмоли ин забонҳоро дар бар гирифтааст гузаронида шуд.
Баргузории даври якуми озмуни ҷумҳуриявии «Тоҷикон-оинаи таърихи миллат» дар Донишгоҳи миллии Тоҷикистон.
Тӯли се рӯз дар Донишгоҳи миллии Тоҷикистон даври якуми озмуни ҷумҳуриявии «Тоҷикон-оинаи таърихи миллат» идома ёфт. Дар даври муассисавӣ донишҷӯёну омӯзгорон ва кормандон аз 19 факултаи Донишгоҳ ва сохторҳои мухталифи ин макони илму маърифат фаъолона иштирок намуданд. Тибқи маълумот дар ин сабқати зеҳнӣ зиёда аз 150 довталаб ширкат варзида, назди аъзои ҳакамон дониш ва маҳорати хешро нишон доданд.
