Бадминтон яке аз риштаҳои маъмулу машҳури соҳаи варзиш мебошад. Ин риштаи варзиш дар ноҳияи Кӯшониён сол то сол рушд карда, имрӯзҳо зиёда аз 80 нафар наврасону ҷавонони ноҳия ба ин намуди варзиш бо майлу рағбати беандоза машғуланд. Дар муассисаи таълимии рақами 14-и ҷамоати деҳоти Заргари ноҳия толори махсус барои гузаронидани тамрини риштаи бадминтон ва мусобиқаҳо муҳайё буда, мураббиёни мактаби варзишии ноҳия бо гуруҳҳои махсуси бадминтонбоз дар вақтҳои муайяншуда машқу тамрин мекунанд. Аз рӯи ин намуди варзиш дастпарварони муассисаи давлатии мактаби варзишии ноҳия дар мусобиқа ва чемпионатҳои Осиёи Марказӣ ва Авруосиё фаъолона ширкат варзида, 3 нафар ба гирифтани ҷойҳои дуюм ва сеюм мушарраф гаштаанд.
Раздел: Хабарҳо
«Матбуоти миллӣ-тарғибгари арзишҳои истиқлоли давлатӣ»
Бо ташаббуси шуъбаи матбуоти даврии Муассисаи давлатии Китобхонаи миллии Тоҷикистон таҳти унвони «Матбуоти миллӣ-тарғибгари арзишҳои истиқлоли давлатӣ» ҳамоиши илмӣ-оммавӣ доир карда шуд. Дар ҳамоиши мазкур муҳаққиқони соҳа ва рӯзноманигорону омӯзгорони факултетҳои журналистика иштирок намуданд. Тазаккур дода шуд, ки матбуот дар воқеъ яке аз рукнҳои муҳими сиёсӣ, фарҳангӣ, иқтисодӣ, иҷтимоӣ ва маънавии ҷомеа мебошад. Он агар бо риояи усулҳои неки рӯзноманигорӣ нашр шавад, дар таҳкими асолати миллӣ, пояи давлатдорӣ, худшиносии ҷомеа ва ҷаҳонбинии мардум нақши амиқ мебозад. Дар анҷоми ҳамоиш барои ҳамкории судманд ба як зумра роҳбарони воситаҳои ахбори омма аз ҷониби роҳбарияти Китобхонаи миллӣ ифтихорнома тақдим гардид.
Роҳандозии озмуни «Кадбонуи беҳтарин».
Дар МТМУ №40 ш. Душанбе бо мақсади эҳё намудани суннатҳои фарҳанги миллӣ озмуни ҷумҳуриявии «Кадбонуи беҳтарин» баргузор гардид. Омӯзгорону хонандагони синфҳои 8 то 11 бо дастовардҳои ҳунари пазандагӣ тайёр кардани хӯрокҳои мухталифи миллӣ ва хӯришу дигар анвои хӯрданӣ ва таомҳои гуногуни миллӣ ширкат намуда, маҳорату малакаи кадбонугии хешро манзури иштирокдорон ва аъзои ҳакамони озмун намуданд. Аъзои ҳакамони ин тадбири маърифатӣ ба ҳунару маҳорати духтарон аҳсан хонда, дар вақти натиҷагирии озмун ба ҳар иштирокдор баҳои сазовор пешниҳод намуданд. Мақсад аз баргузор намудани озмун, баланд бардоштани маърифати хонадорӣ ва омода намудани духтарон ба ҳаёти мустақилона маҳсуб меёбад.
Ҷалби кӯдакону наврасон ба ҳунаромӯзӣ.
Дар Маркази кӯдакон ва наврасони ноҳияи Исмоили Сомонии пойтахт омӯзиши забонҳои хориҷӣ, аз ҷумла забонҳои русию англисӣ ба роҳ монда шудааст, ки ин машғулиятҳоро омӯзгорони ботаҷриба ва донандаи забонҳои хориҷӣ мегузаронанд. Дар маркази мазкур насли наврас ба омӯзиш ҳунарҳои зардӯзӣ, бофандагӣ, навохтани асбобҳои мусиқӣ ва дигар касбҳо фаро гирифта шудаанд, ки онро бо ёрии омӯзгорони сохибтахассус аз худ менамоянд. Ба маҳфили мусиқӣ бошад бештар писарон рақбат доранд.
Ифтитоҳи Марказҳои таълимӣ дар ДМТ.
Дар Факултети молия ва иқтисодии Донишгоҳи миллии Тоҷикистон бо ташаббуси Раёсати ин Муассисаи олӣ марказҳои машваратии масъалаҳои сайёҳӣ,молия ва суғурта, гумрук, сармоягузорӣ,бонкию қарзӣ,андозбандӣ ифтитоҳ гардид.Дар маросими ифтитоҳ масъулини ДМТ ва омўзгорону донишҷўён иштирок доштанд. Марказҳои зикршуда, бо шароити замони муосир дар пояи кафедраҳои Факултети мазкур ба истифода дода шуда,заминаи мусоидро барои баргузор намудани корҳои илмӣ,таҳқиқотӣ,анҷом додани таҷрибаомўзиҳои илмӣ-тадқиқотӣ, дастрасӣ пайдо намудан ба маводҳои омории Кумитаву вазоратҳои дахлдор,шиносоӣ пайдо намудан бо адабиётҳои муосири илмӣ-иқтисодӣ фароҳам овард.
Таҷлили Рӯзи Модар дар Литсейи № 3 ш. Душанбе.
Дар Литсейи №3 барои хонандагони болаёқати шаҳри Душанбе маҳфили идона ба ифтихори Рӯзи Модар бо иштироки хонандагон ва омӯзгорони таълимгоҳ баргузор гардид. Дар маҳфили мазкур хонандагон доир ба қадру манзалати модар шеърҳоро аз ашъори шоирони классик ва муосири тоҷик баҳри ҳозирин қироъат намуданд. Ҳамзамон таълимгирандагон бо иҷро намудани саҳначаҳои тарбиявї таъби аҳли нишастро болида намуданд.
Оғози даври сеюми олимпиадаҳои «Spelling bee» ва шоҳмот.
Дар Муассисаи давлатии таълимии Литсейи барои хонандагони болаёқат дар шаҳри Душанбе даври сеюми олимпиадаи «Spelling bee» ва олимпиада оид ба шоҳмот байни хонандагони муассисаҳои таҳсилоти миёнаи умумии шаҳру ноҳияҳои тобеи ҷумҳурӣ баргузор гардид.Дар даври минтақавии олимпиадаҳои мазкур 178 нафар хонанда аз 13 муассисаҳои таҳсилоти миёнаи умумӣ ва инчунин аз муассисаҳои типпи нав иштирок намуданд. Бояд гуфт, ки дар олимпиадаи «Spelling bee» 85 нафар довталаб аз муассисаҳои таҳсилоти миёнаи умумӣ ва аз Гимназияву Литсей байни худ рақобати зеҳнӣ намуданд. Дар олимпиадаи шоҳмот 93 нафар хонанда аз 13 шаҳру ноҳияҳои тобеи ҷумҳурӣ ширкат варзиданд.
«Нақши занон дар хизмати давлатӣ».
Дар Академияи идоракунии давлатии назди Президенти ҶТ бахшида ба Рӯзи Модар ҳамоиш дар мавзӯи «Нақши занон дар хизмати давлатӣ» баргузор гардид. Дар ин чорабинӣ фаъолзанон ва омӯзгорону донишҷӯёни Академияи мазкур иштирок ва дар мавзӯъҳои зан,модар, роҳбар, Зан ва Ваҳдат, суханронӣ намуданд. Тавре қайд гардид,имрӯз нақши занон дар баробари мардон дар сохторҳои гуногуни кишвар назаррас буда, дар рушду пешрафти давлат ҳиссаи муносиби хешро гузошта истодаанд.Айни замон шумораи умумии хизматчиёни давлатӣ 25 фоиз, аз ҷумла аз шумораи кадрҳои роҳбарикунанда қариб 20 фоизро занону духтарон ташкил медиҳанд.
Таҷлили рӯзи Модар дар Муассисаҳои томактабӣ.
Дар Муассисаи томактабии №112 ноҳияи Синои пойтахт бахшида ба Рӯзи Модар маҳфили адабӣ-фарҳангӣ баргузор гардид. Тадбири мазкур бо иштироки тарбиятгирандагон ва модарону мураббияҳо ҷараён гирифт. Хурдсолон бо лафзи ширини хеш дар васфи модар, «Ватан», «Баҳор» шеърҳо қироат намуданд. Инчунин дар бораи қадру манзалати модар саҳначаи тарбиявӣ низ иҷро карда шуд. Аз ҷониби дустрӯякон рақсҳои мавзун иҷро гардид, ки ба ҳозирин писанд омад.
Ғолибони мусобиқаи кушоди ҷумҳуриявӣ оид ба бокс муайян гардиданд.
Дар Муассисаи давлатии «Қасри теннис ва маҷмааи обӣ» -и шаҳри Душанбе Мусобиқаи кушоди ҷумҳуриявӣ оид ба бокс байни калонсолон ( мардон ва бонувон ) баргузор гардид. Мусобиқаи кушоди ҷумҳуриявӣ оид ба бокс нахустин сабқати расмӣ дар мавсими нав маҳсуб ёфта, тўли 3 рўз идома кард. Дар натиҷа миёни бонувон Миҷгона Самадова, Шоира Зулқайнарова, Нигора Олимова, Мавлуда Абдуллозода, Гулафзо Қақназарова дар вазнҳои худ чемпион шуданд. Байни мардон Шаббос Неъматуллоев, Меҳрон Шафиев, Баҳодур Усмонов, Меҳроб Ҳамидов , Меҳроҷ Зоидов, Воҳид Асроров, Бахтовар Сагизов, Некрӯз Салимов зафар ёфтанд.
