Дар МТМУ №16 ш. Душанбе омӯзиши забонҳои хориҷӣ дар сатҳи зарурӣ ба роҳ монда шуда, омӯзгорони соҳибтаҷриба ҷалб гардидаанд. Тибқи маълумот 8 нафар хонандаи таълимгоҳ дар олимпиада аз фанни забони русӣ ва зиёда аз 15 нафари дигар аз фанни забони англисӣ дар озмуну олимпиадаҳои мухталиф ширкат варзида ба дастовардҳои назаррас ноил шудаанд. Дар Муассиса 3458 хонанда ба таълиму тадрис фаро гирифта шудааст.
Раздел: Хабарҳо
Таълиму тарбия дар Кӯдакистонҳо.
Таълиму тарбияи то мактабӣ заминаи муҳимтарини ташаккули шахсият ва таҳкурсии устувори омӯзиш буда, ҳамчун баёнгари самти дастовардҳои кӯдакон дар фаъолияти ояндаи онҳо мебошад. Дар марҳилаи ҳозира омода намудани кӯдакон ба мактаб масъалаи муҳим ба шумор меравад ва дурнамоии рушди мактаб аз бисёр ҷиҳат ба ҳамин масъала вобаста аст. Машғулияти мазкуреро, ки мураббиёни Кӯдакистони рақами 12- уми ш. Душанбе доир намуданд, дар он кӯдакон фаъолнокии хешро дар қироати шеър, сурудхонӣ ва ташкили бозиҳои гуногуни варзишӣ нишон доданд. Мақсади асосии барнома ин мусоидат кардан ба рушди ҳаматарафаи кӯдакони синни томактабӣ, омӯхтани муносибатҳо ва роҳҳои нави корбарӣ бо мураббиён, падару модарон ва кӯдакон, маълумотнокии мураббиён оид ба тайёр кардани кӯдакон ва ҷалби пурраи аҳли ҷомеа ба мактаб мебошад.
«ҲУНАР БЕҲТАР АЗ ЗАР БУВАД». Дар Душанбе Фестивали ҳунармандон доир карда мешавад.
ДУШАНБЕ, 12.04.2023. /АМИТ «Ховар»/. Бо қарори Раиси шаҳри Душанбе муҳтарам Рустами Эмомалӣ нақшаи чорабиниҳо оид ба омодагӣ ва баргузории даври дуюми Фестивали ҳунармандони Тоҷикистон ва намоиши ҳунарҳои мардумӣ таҳти унвони «Ҳунар беҳтар аз зар бувад» тасдиқ гардид. Дар ин хусус ба АМИТ «Ховар» дар шуъбаи иттилоотии дастгоҳи Раиси шаҳри Душанбе хабар доданд.
Фесивал бо мақсади иҷрои Нақшаи баргузории фестивал, намоиш, ид, озмунҳои анъана ва ҳунарҳои мардумӣ ва ҷашну солгардҳо дар Ҷумҳурии Тоҷикистон барои соли 2023, ки бо Амри Президенти Ҷумҳурии Тоҷикистон аз 3 январи соли 2023 тасдиқ гардидааст, ба роҳ монда мешавад.
Тибқи қарори мазкур, Раиси шаҳри Душанбе масъулинро вазифадор намуданд, ки ҷиҳати дар сатҳи баланди ташкилӣ ва ғоявӣ баргузор кардани Фестивали ҳунарҳои мардумӣ таҳти унвони «Ҳунар беҳтар аз зар бувад» тадбирҳои дахлдор андешанд.
Идомаи Фестивали ҷумҳуриявии «Ҳафтаи китоби кӯдакону наврасони Тоҷикистон».
Рӯзи 4-уми Фестивали ҷумҳуриявии «Ҳафтаи китоби кӯдакону наврасони Тоҷикистон» дар МТМУ №122 ш. Душанбе бо иштироки аҳли адаб, китобдорону омӯзгорон ва хонандагон дар сатҳи хуб ҷараён гирифт. Маҳфили адабӣ-фарҳангиро шоираи ширинкалом Шаҳрияи Аҳтамзод ифтитоҳ бахшида, доир ба нақши китоб дар таълиму тарбияи насли наврас сухан гуфт. Дар идомаи Фестивал хонандагон дар васфи китоб суханони пандомез ва ибратомӯзро аз эҷодиёти адибон ва мутафаккирони бузург пешниҳоди аҳли нишаст гардониданд.
Ҷамъбастёбии даври шаҳрии озмуни «Шоҳномахонӣ».
Дар толори фарҳангии Муассисаи давлатии «Маркази кўдакон ва наврасони шаҳри Душанбе» бо иштироки намояндагони Сарраёсати маорифи шаҳри Душанбе ва маъмурияти Муассиса маросими ҷамъбаст ва ҳавасмандгардонии ғолибони даври шаҳрии озмуни ҷумҳуриявии «Шоҳномахонӣ» баргузор гардид. Озмун тибқи Низомномаи тасдиқгардида аз рўйи 4 номинатсия гузаронида шуд. Баъди хулосабарории ҳайати ҳакамон ғолибони даври шаҳрӣ муайян гардиданд.
Ғолибон дар вазъияти тантанавӣ бо Диплом ва туҳфаҳои хотиравии Сарраёсати маорифи шаҳри Душанбе қадрдонӣ гардонида шуданд.
Дар номинатсияи «Композитсияи беҳтарин»-мавзеи назди Муҷассамаи Исмоили Сомонии шаҳри Душанбе сазовори ҷойи якум гардид.
ДУШАНБЕ, 06.04.2023. /АМИТ «Ховар»/. Дар озмуни шаҳрии гулҳо — «Сайри гули лола», ки маросими ҷоизасупории он 28 марти соли 2023 дар Майдони Истиқлоли шаҳри Душанбе барпо гардид, дар номинатсияи «Боғи беҳтарин» — Боғи ба номи Аҳмади Дониш ва дар номинатсияи «Композитсияи беҳтарин» — мавзеи назди Муҷассамаи Исмоили Сомонии пойтахт ҷойҳои якумро сазовор гаштанд, иттилоъ дод муовини Раиси ноҳияи Исмоили Сомонии шаҳри Душанбе Наргис Шарифзода зимни суҳбат ба хабарнигори АМИТ «Ховар».
Номбурда изҳор дошт, ки «тибқи қарори дахлдори Раиси шаҳри Душанбе муҳтарам Рустами Эмомалӣ озмуни шаҳрии гулҳо- «Сайри гули лола» бо мақсади вусъат бахшидан ба корҳои ободонию созандагӣ дар пойтахт дар сатҳи баланди ташкилӣ баргузор шуд. Барои муайян намудани ғолибони он ҳайати гурӯҳи кории шаҳрӣ таъсис ёфта, Сарраёсати молияи шаҳри Душанбе аз ҳисоби маблағҳои барои мақоми пойтахти Ҷумҳурии Тоҷикистон пешбинишуда ҷиҳати мукофотонидани ғолибони озмуни шаҳрӣ аз рӯи панҷ номинатсия 112 550 сомонӣ ҷудо намуд. Ғолибони ҳамаи номинатсияҳои озмун барои ишғоли ҷойҳо бо Дипломҳои дараҷаи 1, 2, 3 ва маблағи пулӣ мутаносибан ба андозаи 10000, 7000 ва 5000 сомонӣ қадрдонӣ карда шуданд».
««Озмуни ҷумҳуриявии гулҳо — «Сайри гули лола» мувофиқи Амри Президенти Ҷумҳурии Тоҷикистон аз 13 декабри соли 2018 давоми солҳои 2019-2023 дар тамоми ҷумҳурӣ гузаронида мешавад. Ҳадаф аз баргузории он, пеш аз ҳама, баланд бардоштани сатҳи донишу маърифат, фарҳангу ҷаҳонбинӣ, бедор намудани завқи зебоипарастӣ дар зеҳни ҳар сокини мамлакат, ободу зебо намудани ҳар хона, кӯча, маҳалла, деҳа, деҳот, шаҳрак, ноҳия, шаҳр, вилоят ва ҷумҳурӣ мебошад», — тазаккур дод номбурда.
Ҳамсуҳбати мо ёдовар шуд, ки мисли солҳои пешин ободкорони ноҳияи Исмоили Сомонии пойтахт дар ин озмун пешсафӣ нишон дода, дар чанд номинатсия ба гирифтани ҷойҳои аввал сазовор гаштанд.
«Имсол Рўзи пойтахти Ҷумҳурии Тоҷикистон-шаҳри Душанбе, ки ҳамасола шанбеи сеюми моҳи апрел таҷлил мегардад, ба 15 апрел рост омадааст. Бо мақсади дар сатҳи баланди ташкилӣ таҷлил намудани Рўзи пойтахт дар ноҳияи мо корҳои ободонию сабзазоркунӣ вусъат гирифта, дар кўчаю хиёбонҳо ва ҳудуди боғҳои фарҳангию фароғатӣ шинонидани гулҳои мавсимӣ идома дорад»,-илова кард Наргис Шарифзода.
Баргузории озмун ҷиҳати дарёфти стипендияи Раиси шаҳри Душанбе.
Дар Филиали муассисаи давлатии маркази таҳлилӣ-иттилоотии назди Сарраёсати маорифи пойтахт озмун ҷиҳати дарёфти стипендияи Раиси шаҳри Душанбе баргузор гардид. Ёдовар мешавем, ки ин иқдом бо мақсади дастгирӣ ва ҳавасманд намудани хонандагону донишҷӯёни фаъолу аълохон ва соҳибистеъдоди муассисаҳои таълимии таҳсилоти умумӣ, ибтидоӣ ва миёнаи касбии шаҳри Душанбе аз соли 2017 инҷониб роҳандозӣ мегардад. Тибқи низомнома ба довталабон аз рӯи 8 фанни таълимӣ саволномаҳо пешниҳод карда мешавад. Бояд гуфт мақомоти иҷроияи ҳокимияти давлатии шаҳри Душанбе ҳар сол барои дарёфти стипендияи Раиси шаҳри Душанбе озмун эълон менамояд.
Идомаи Фестивали ҷумҳуриявии «Ҳафтаи китоби кӯдакону наврасони Тоҷикистон».
Рӯзи 3-юми Фестивали ҷумҳуриявии «Ҳафтаи китоби кӯдакону наврасони Тоҷикистон» дар Муассисаи таҳсилоти миёнаи умумии рақами 6-уми шаҳри Душанбе бо садои фораму дилнишини карнаю сурнай оғоз ёфт. Ҷашнвораи китобро хонандагону омӯзгорони таълимгоҳи мазкур, аҳли адаб ва намояндагони Китобхонаи давлатии бачагонаи ҷумҳуриявии ба номи Мирсаид Миршакар, инчунин дигар китобдорон бо хондани шеъру порчаҳои назмӣ дар васфи китобу муаллим ва дониш, хушу хотирмон истиқбол гирифтанд. Нахуст аҳли адаб аз намоиши дастовардҳо, китобҳои тозанашр ва ҳунарҳои хонандагони муассисаи мазкур дидан намуданд.
Идомаи Фестивали ҷумҳуриявии «Ҳафтаи китоби кӯдакону наврасон».
Фестивали ҷумҳуриявии «Ҳафтаи китоби кӯдакону наврасон» дар МТМУ №50-и шаҳри Душанбе бо иштироки шоирону нависандагон, омӯзгорон, китобдорону хонандагон баргузор гардид. Дар саҳни Муассиса китобҳои тозанашри адибон ба намоиш гузошта шуда буд. Хонандагон дар бораи китоб суханҳои пурмазмунро пешниҳоди ҳозирин намуданд. Дар идомаи тадбири мазкур шоираи ширинкалом Шаҳрияи Аҳтамзод суханронӣ карда, қайд намуданд, ки воқеан дар ягон давру замон бе китоб ғизои маънавии зиндагии рангинро наметавон тасаввур намуд. Зеро миллати мо бо китоб ва китобхонӣ, заковат ва маърифатнокии худ дар ҷаҳони мутамаддин мақоми шоиста касб кардааст.
Роҳандозии даври шаҳрии озмуни «Шоҳномахонӣ».
Дар толори фарҳангии Муассисаи давлатии «Маркази кӯдакон ва наврасони шаҳри Душанбе» даври шаҳрии озмуни ҷумҳуриявии "Шоҳномахонӣ" идома ёфт. Дар рӯзи дуюм хонандагони синфҳои 9-11-и муассисаҳои таҳсилоти миёнаи умумии шаҳри Душанбе тибқи низомномаи озмун аз рӯйи номинатсияҳои қироати ифоданоку таъсирбахши порчаҳо аз рӯйи қисматҳои «Шоҳномахонӣ», дарки маънии порчаҳои азёднамуда ва шарҳу тавзеҳи байтҳои алоҳида, луғатдонӣ, тасвири расми беҳтарин аз рӯйи корномаҳои қаҳрамонҳои «Шоҳномахонӣ», намоиши саҳнача аз рӯйи достонҳои «Шоҳномахонӣ» донишу маҳорати худро пешкаши ҳайати ҳакамони озмун гардониданд.
Баъди хулосабарории ҳайати ҳакамон ғолибони озмун бо диплому ифтихорнома ва туҳфаҳои таъсиснамудаи кумитаи тадорукот қадрдонӣ карда мешаванд.