ДУШАНБЕ, 25.09.2023. /АМИТ «Ховар»/. Чемпионати кушоди шаҳри Душанбе оид ба таэквондо WT байни писарон ва духтарон барои дарёфти «Ҷоми Раиси шаҳри Душанбе» ҷамъбаст гардид. Дар ин хусус ба АМИТ «Ховар» дар Раёсати кор бо ҷавонон ва варзиши шаҳри Душанбе хабар доданд.

Ҳадаф аз баргузории мусобиқа- рушди соҳаи варзиш дар пойтахт, ҷалби наврасону ҷавонон ба намуди варзиши таэквондо, алалхусус духтарон, инчунин самараноку мақсаднок истифода намудани иншооти варзишии пойтахт мебошад.

Мусобиқаи варзишӣ дар толори варзишии КВД «Қасри теннис»-и Мақомоти иҷроияи ҳокимияти давлатии шаҳри Душанбе бо иштироки муовини Раиси шаҳри Душанбе Дилбар Одилзода, муовини Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Сураҷ Чоршанбезода, сардори Раёсати кор бо ҷавонон ва варзиши шаҳри Душанбе Шоҳзод Раҳимзода ва дигар масъулини соҳаи варзиш доир гардид.

Мусобиқа 23-24 сентябр доир шуда, дар он варзишгарон барои дарёфти “Ҷоми Раиси шаҳри Душанбе” байни ҳам сабқат намуданд.

Дар охири мусобиқа ғолибон муайян гардиданд. Ҳамин тавр, варзишгарони дастаи Душанбе 1 бо “Ҷоми Раиси шаҳри Душанбе” ва дастаи Душанбе 2 бо медалҳои нуқра сарфароз гардонида шуданд.

ДУШАНБЕ, 25.09.2023. /АМИТ «Ховар»/. Бахшида ба 32-солагии Истиқлолияти давлатии Ҷумҳурии Тоҷикистон дар мактаби варзишии ноҳияи Ёвон Фестивали бозиҳои миллии варзишӣ таҳти унвони «Намудҳои миллии варзиш-рукни асосии фарҳанги миллӣ» доир гардид. Дар ин хусус ба АМИТ «Ховар» дар Мақомоти иҷроияи ҳокимияти давлатии ноҳияи Ёвон хабар доданд.

Фестивал бо ҷалби устодону мураббиён ва донишҷӯёну варзишгарони муассисаҳои тайёрии варзишии ноҳия доир шуда, дар он 8 намуди бозиҳои миллии варзишӣ бо тарзу усули маҳаллӣ ба маърази тамошо гузошта шуд.

Рушди варзиш, аз ҷумла намудҳои миллии варзиш дар мамлакат зери ҳидояту роҳнамоиҳои доимии Президенти Ҷумҳурии Тоҷикистон,  Пешвои миллат муҳтарам Эмомалӣ Раҳмон қарор дорад.

Ёдовар шудан ба маврид аст, ки давоми  солҳои соҳибистиқлолӣ  бозиҳои миллии варзишӣ эҳё гардида, дар гӯшаву канори Тоҷикистон бо тарзу усулҳои хоси миллӣ гузаронида мешаванд.

Ҳадаф аз баргузории фестивал- эҳё намудани бозиҳои миллии варзишӣ ва ба ин васила муаррифӣ намудани фарҳанг, тамаддун ва таърихи халқи тоҷик дар арсаи байналмилалӣ мебошад.

ДУШАНБЕ, 25.09.2023 /АМИТ «Ховар»/. Аз 24 то 29 октябр дар шаҳри Душанбе Фестивали 7-уми байналмилалии театрҳои лӯхтак «Чодари хаёл» баргузор мегардад. Дар ин фестивали байналмилалӣ театрҳои касбии лӯхтаки Иттиҳоди Давлатҳои Мустақил, аз қабили Русия, Тоҷикистон, Қазоқистон, Туркманистон, Узбекистон ва Эрон иштирок менамоянд. Дар ин хусус ба АМИТ дар Театри давлатии лӯхтаки шаҳри Душанбе иттилоъ доданд.

Ҳадафи аслии фестивал таҳкими ҳамкорӣ дар соҳаи театрҳои лӯхтак, эҳё ва рушди театри суннатии лӯхтаки тоҷик, инчунин беҳбуд бахшидан ба тарбияи эстетикии насли наврас мебошад.

Дар доираи ин фестивал тамошобинон метавонанд намоишҳои театрҳои давлатҳои Русия, Тоҷикистон, Қазоқистон, Туркманистон, Узбекистон ва Эронро бубинанд.

Ғайр аз ин донишҷӯёни шуъбаи лӯхтаки Институти давлатии маданияти Туркманистон бори аввал дар фестивали «Чодари хаёл» ҳунарманмоӣ менамоянд.

Тоҷикистонро дар ин фестивал театрҳои лӯхтаки шаҳрҳои Душанбе, Бӯстон ва Бохтар намояндагӣ менамоянд.

Дар ин фестивал Театри давлатии лӯхтаки шаҳри Душанбе намоиши «Маликаи маккор», театри Бӯстон намоиши «Ҳинди тиллоӣ» ва театри Бохтар «Хари маккор»-ро ба намоиш мегузоранд.

ДУШАНБЕ, 25.09.2023. /АМИТ «Ховар»/. Имрӯз дар Донишгоҳи давлатии Бохтар ба номи Носири Хусрав даври вилоятии Озмуни ҷумҳуриявии «Илм — фурӯғи маърифат» баргузор шуд. Дар ин хусус ба АМИТ «Ховар» дар Мақомоти иҷроияи ҳокимияти давлатии вилояти Хатлон хабар доданд.

Гуфта шуд, ки ба даври вилоятӣ 1337 нафар роҳхат гирифта,  фаъолони озмун аз 25 шаҳру ноҳияи вилояти Хатлон иштирок доранд.

Озмун аз рӯйи ҳафт номинатсия гузаронида мешавад. Довталабон дар номинатсияҳои математика (арифметика, алгебра, геометрия); физика ва астрономия; химия; биология (ботаника, зоология, анатомия); география; технологияи иттилоотӣ; ихтироъкорӣ ва навоварӣ донишу маҳорат месанҷанд.

Бояд гуфт, ки озмуни мазкур таҳти cарпарастии Президенти Ҷумҳурии Тоҷикистон муҳтарам Эмомалӣ Раҳмон бо мақсади рушди тафаккури техникӣ, тарғиби ҷаҳонбинии илмӣ, дастрасӣ пайдо намудан ба техникаву технология, тавсеаи ихтироъкорӣ ва навоварӣ, пайвасти илм бо истеҳсолот, ҷалби бештари хонандагону донишҷӯён ва дигар қишрҳои ҷомеа ба омӯзиши фанҳои риёзӣ, дақиқ ва табиӣ, ҳамчунин дарёфт ва муаррифии истеъдодҳои нав дар ин самтҳо баргузор мегардад.

ДУШАНЕ, 25.09.2023 /АМИТ «Ховар»/. Аз шаҳри Ҳисор дар даври сеюми Озмуни ҷумҳуриявии ««Тоҷикон»-оинаи таърихи миллат»  27 нафар  довталаб иштирок намуда, 2 нафар бо гирифтани ҷойи дуюм ва 3 нафар ҷойи сеюм ба даври ниҳоӣ-ҷумҳуриявӣ роҳхат гирифтанд.

АМИТ «Ховар» бо истинод ба Мақомоти иҷроияи ҳокимияти давлатии шаҳри  Ҳисор иттилоъ медиҳад, ки  дар даври сеюми Озмуни ҷумҳуриявии ««Тоҷикон – оинаи таърихи миллат» 13 шаҳру навоҳии тобеи ҷумҳурӣ иштирок намуда, натиҷаҳои он аз ҷониби раиси ҳакамон- муовини директор оид ба корҳои илмӣ ва таълимӣ дар Институти таърих, бостоншиносӣ ва мардумшиносии ба номи Аҳмади Дониши Академияи миллии илмҳои Тоҷикистон Муродалӣ Иброҳимов эълон гардид.

Озмуни ҷумҳуриявии ««Тоҷикон» — оинаи таърихи миллат» соли аввал аст, ки таҳти сарпарастии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баргузор мегардад. Ҳадафи озмун дарёфти чеҳраҳои нав, наврасону ҷавонони лаёқатманд, худшиносу худогоҳ, ватандӯст ва таърихдон мебошад.

ДУШАНБЕ, 23.09.2023 /АМИТ «Ховар»/. 21 сентябр дар Академияи идоракунии давлатии назди Президенти Ҷумҳурии Тоҷикистон бахшида ба 30-солагии Ҳизби Халқии Демократии Тоҷикистон таҳти унвони «Пешвоёни сиёсӣ ва таъсири онҳо дар ҳифзи сулҳ: саҳм дар мубориза бо терроризм ва ифротгароӣ» конференсияи байналмилалии илмӣ-амалӣ баргузор шуд. Дар ин хусус ба АМИТ «Ховар» дар ин академия хабар доданд.

Идома

ДУШАНБЕ, 23.09.2023 /АМИТ «Ховар»/. Суханронии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мубоҳисаҳои умумии Иҷлосияи 78-уми Маҷмаи Умумии Созмони Милали Муттаҳид чун дигар суханрониҳо аз минбари баланди СММ саршор аз ҳарфи саодати инсоният, рушди ҳамкорию ҳамгироии минтақавию байналмилалӣ, таъмини рушди устувори иқтисодию иҷтимоӣ, сулҳ ва амнияту оромӣ, инчунин дастҷамъию муштаракот дар ҳалли мубрамтарин мушкилоти ҷомеаи ҷаҳонӣ мебошад.

Идома

ДУШАНБЕ, 22.09.2023. /АМИТ «Ховар»/. Муассисаҳои таҳсилоти миёнаи умумии Тоҷикистон соли 2025 дар низоми арзёбии байналмилалии PISA иштирок менамоянд. Ин матлаб 21 сентябр зимни муаррифии барномаи ҷаҳонии арзёбӣ ва мониторинги сифати таҳсилот- PISA баён гардид, иттилоъ медиҳад АМИТ «Ховар».

Дар барномаи мазкур 6300 нафар хонандагон аз 150 мактаб- аз ҳар муассиса 42 нафар хонандагони синфҳои 7 ё аз 15-сола боло иштирок менамоянд. Дар доираи он дастовардҳои таҳсилии онҳо аз рӯи фаннҳои табиатшиносӣ, саводи хондан ва математика санҷида шуда, аз рӯи натиҷаи он мушкилоти асосии ҷойдошта дар самти таълими ин фанҳо муайян мешаванд.

Дар ҳамоиши мазкур, ки бо ташаббуси Маркази миллии тестии назди Президенти Ҷумҳурии Тоҷикистон доир гардид, иттилоъ дода шуд, ки барномаи мазкур дар доираи татбиқи «Бистсолаи омӯзиш ва рушди илмҳои дақиқ ва риёзӣ дар соҳаи илму маориф» барои солҳои 2020-2040 бо мақсади баланд гардидани сифати таҳсил амалӣ шудааст.

Гуфта шуд, ки иштироки Тоҷикистон дар барномаҳои PISA маротибаи аввал буда, ба қонеъ гардидани ниёзҳои афзояндаи давлатҳо барои ҷустуҷӯ ва истифодаи намунаҳои муваффақтарин ва муассиртарини сиёсат ва стратегияҳо дар соҳаи маориф тарҳрезию ба роҳ монда шудааст.

Давлатҳои гуногун бо иштирок дар пажуҳишҳои барномаи мазкур ба ҷузъи ҷомеаи ҷаҳонии низоми таҳсил табдил меёбанд, ки дорои имконияти муқоисаи натиҷаҳо ва омӯзиши таҷрибаҳои ҳамдигар мебошад.

Барнома аз ҷониби Созмони ҳамкории иқтисодӣ ва рушд (СҲИР) ба роҳ монда шуда, ҳадафи он баҳодиҳӣ ба низомҳои таҳсил мебошад.

Иттилоъ дода шуд, ки шуруъ аз соли 2000- оғози ба роҳ мондани барномаи мазкур дар он тақрибан 100 давлати ҷаҳон иштирок намудаанд.

РОҒУН, 22.09.2023 /АМИТ «Ховар»/. Бахшида ба ҷашни 35-солагии Истиқлолияти давлатӣ дар Ҷамоати деҳоти Қади Оби шаҳри Роғун муссисаи томактабӣ, бунгоҳи тиббӣ ва дар маркази шаҳр бинои Корхонаи воҳиди давлатии Бонки амонатгузории Ҷумҳурии Тоҷикистон «Амонатбонк» сохта, ба истифода дода мешаванд. Дар ин хусус ба хабарнигори АМИТ «Ховар» Субҳониддини Маҳмуд масъулини Мақомоти иҷроияи ҳокимияти двлатии шаҳри Роғун иттилоъ доданд.

Мудири филиали №19-и  Корхонаи воҳиди давлатии Бонки амонатгузории Ҷумҳурии Тоҷикистон «Амонатбонк» дар шаҳри Роғун Зинатулло Ғафурзода иброз дошт, ки бинои мазкур аз се ошёна иборат буда, бо беҳтарин таҷҳизоти замонавии бонкдорӣ муҷаҳҳаз гардонида мешавад.  Баъди ба истифода додани бино мушкилии нарасидани ҳуҷраҳои корӣ барои кормандон ва мутахассисони бонк бартараф мешавад.

Рушди муассисаҳои томактабӣ дар шаҳри Роғун яке аз масъалаҳои  асосӣ  ба ҳисоб меравад. Аз ин рӯ  дар деҳаи Қалъаи Нав, ки дар ин ҷо зиёда аз 350 оила зиндагӣ менамоянд, сохтмони муассисаи томактабӣ оғоз шудааст.  Кӯдакистони мазкур аз ду ошёна ва 34 ҷой барои кӯдакон иборат буда, аз ҳисоби буҷети маҳаллӣ сохта мешавад.

Бо қарори Маҷлиси вакилони халқи шаҳри Роғун  нақшаи чорабиниҳои Мақомоти иҷроияи ҳокимияти давлатии шаҳри Роғун оид ба истиқболи арзандаи 35-солагии Истиқлолияти давлатии Ҷумҳурии Тоҷикистон иборат аз 110 банд таҳия ва тасдиқ шудааст. Тибқи ин қарор, муовини якум, муовинон ва роҳбари дастгоҳ дар ҷамоатҳо ва маркази шаҳр барои назорати ҷараёни корҳои сохтмонӣ вазифадор гардидаанд.

То ҷашни бузурги 35-солагии Истиқлолияти давлатӣ  38 иншоот дар маркази шаҳри Роғун ва кӯчаи 25-солагии Истиқлолият,  14 иншоот дар шаҳраки Оби Гарм, 43 иншоот  дар Ҷамоати деҳоти Қади Об ва 10 иншоот дар Ҷамоати деҳоти Сичароғ бунёд мегарданд, ки дар умум 105 иншоотро ташкил медиҳанд. Аз ин иншооти сохташаванда    8 адади он аҳамияти ҷумҳуриявӣ дошта, аз ҳисоби буҷети ҷумҳуриявӣ сохта мешаванд ва ҷараёни корҳо аз ҷониби вазорату кумитаҳои дахлдор назорат ва натиҷагирӣ мешавад. 19 иншоот аз ҳисоби буҷаи маҳалу сармояи хориҷӣ ва 78 иншооти боқимонда аз ҷониби соҳибкорон сохта мешаванд.

Бояд гуфт, ки ояндаи наздик шаҳри Роғун ба яке аз марказҳои фарҳангиву сайёҳӣ ва муаррифи маданияти баланди меҳмоннавозии тоҷикон табдил меёбад. Минбаъд таваҷҷуҳи сайёҳон ба ин мавзеъ зиёд мегардад. Бо ин мақсад бо истифода аз обҳои шифобахш ва табиати зебои шаҳри Роғун доир ба фароҳам овардани шароити муосир барои рушду ривоҷи соҳаи сайёҳӣ мунтазам тадбирҳои зарурӣ андешида мешавад.

ДУШАНБЕ, 21.09.2023. /АМИТ «Ховар»/. Имрӯз дар Муассисаи давлатии «Маркази кӯдакон ва наврасони шаҳри Душанбе» Рӯзи дарҳои кушод гузаронида шуд, ки дар он теъдоди зиёди хонандагони муассисаҳои таълимии пойтахт иштирок намуда, бо мақсади такмили дониш ва маҳорату истеъдод дар маҳфилҳои писандидаашон худро номнавис намуданд. Дар ин хусус ба АМИТ «Ховар» дар Маркази кӯдакон ва наврасони шаҳри Душанбе хабар доданд.

Дар Муассисаи давлатии «Маркази кӯдакон ва наврасони шаҳри Душанбе» зиёда 40 маҳфили забономӯзию ҳунаромӯзӣ ва бадеию варзишӣ фаъолият доранд, ки дар онҳо омӯзгорони соҳибкасбу соҳибтаҷриба машғулият мегузаронанд.

Таҳсил дар ин маҳфилҳо ройгон буда, имкон медиҳад, ки хонандагон ба забономӯзию ҳунаромӯзӣ фаро гирифта шаванд.