28 сентябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати иштирок дар Вохӯрии якуми сарони давлатҳои “Осиёи Марказӣ ва Ҷумҳурии Федеративии Олмон” вориди шаҳри Берлин шуданд.

Дар назар аст, ки зимни ин сафар Сарвари давлат муҳтарам Эмомалӣ Раҳмон дар Вохӯрии якуми сарони давлатҳои “Осиёи Марказӣ ва Ҷумҳурии Федеративии Олмон”, Форуми иқтисодии кишварҳои Осиёи Марказӣ ва Олмон иштирок ва суханронӣ карда, дар ҳошияи ин чорабиниҳо бо як қатор роҳбарони воломақоми Олмон масоили ҳамкориҳои дуҷонибаи Тоҷикистону Олмон, мушкилоти ҷомеаи ҷаҳонӣ ва дигар масъалаҳои мубрамро баррасӣ намоянд.

Муроҷиатномаи Ҷамъияти саҳомии кушодаи «Барқи Тоҷик» ба муштариёни неруи барқ:

Муштариёни азиз!

Дар Ҷумҳурии Тоҷикистон об манбаи асосии истеҳсоли неруи барқ ба шумор рафта, зиёда аз 90 фоизи барқ дар неругоҳҳои барқи обӣ истеҳсол мегардад. Ҳамзамон  ҳаҷми истеҳсоли барқ ба оби дарёҳо алоқамандии зич дорад.

Ба ҳама маълум аст, ки бо фарорасии мавсими тирамоҳу зимистон бар асари сардиҳо камшавии маҷрои дарёҳо ва захираҳои об дар ҳавзаи ташаккулёбии дарёи Вахш, инчунин сол ба сол зиёд шудани талаботи соҳаҳои иҷтимоиву иқтисодии мамлакат ба неруи барқ боиси норасоии мавсимии неруи барқ мегардад. Чунин вазъият талаб менамояд, ки барои дар фасли зимистон бо барқ таъмин намудани аҳолӣ ва соҳаҳои иқтисоди миллӣ тадбирҳои иловагӣ андешида шаванд.

Ҳоло манбаи асосии захираи обу энергетикии мамлакати мо, яъне обанбори НБО-и «Норак»  то нуқтаи ниҳоӣ аз об пур шудааст. Вале ҳаҷми воқеии резиши об дар муқоиса ба соли гузашта ва ҳисоби миёнаи бисёрсола кам аст.

Вобаста ба ин, аз рӯи ҳисоби мутахассисони соҳа соли равон низ норасоии мавсимии неруи барқ пешгӯӣ шудааст ва  вазъи пешгӯишуда танзими реҷаи истифодаи   захираҳои обу энергетикиро дар низоми энергетикии мамлакат ва истифодаи сарфакоронаю самараноки неруи барқро дар корхонаҳо, ташкилоту  муассисаҳо ва  манзилҳои истиқоматӣ тақозо менамояд.

Ҳамзамон бо ин, таҷрибаи солҳои қаблӣ собит менамояд, ки ҷиҳати таъмини беҳтари барқ дар мавсими сармо анҷом додани корҳои таъмиру профилактикӣ дар таҷҳизоти шабакаҳои барқӣ ва зеристгоҳҳо яке аз масъалаҳои муҳим мебошад. Аз ин рӯ, аз ҷониби мутахассисони ҷамъиятҳои саҳомии кушодаи «Шабакаҳои интиқоли барқ» ва «Шабакаҳои тақсимоти барқ» бо мақсади ба давраи тирамоҳу зимистон пурра омода намудани иншооти энергетикӣ дар рӯзҳои нисбатан гарми фасли тирамоҳ дар якчанд зеристгоҳҳо ва хатҳои интиқоли барқ корҳои таъмир гузаронида мешаванд.

Амалисозии ин тадбирҳо имкон медиҳад, ки шабакаҳои барқӣ ба давраи тирамоҳу зимистон хубтар омода шаванд ва оби сарфагардида дар мавсими сармо барои таъмини шабонарӯзии аҳолӣ бо неруи барқ истифода гардад.

Муштариёни азиз!

Ҷамъиятҳои саҳомии кушодаи «Барқи Тоҷик», «Шабакаҳои интиқоли барқ» ва «Шабакаҳои тақсимоти барқ» ба маҳдуд намудани таъминоти барқ манфиатдор нестанд. Вале захираҳои обу энергетикие, ки мо ҳоло дар ихтиёр дорем, ҳаминро талаб менамояд.

Ҳамчунин дар назар бояд дошт, ки захираҳои обу энергетикии дар рӯзҳои мусоид сарфашуда барои дар зимистон бештар бо неруи барқ таъмин намудани муштариён истифода бурда мешаванд.

Дар шаҳри Ҳисор даври сеюми Озмуни ҷумҳуриявии «Илм-фурӯғи маърифат» идома дорад, ки дар он ғолибони даври дуюм аз шаҳру ноҳияҳои Ҳисор, Турсунзода, Роғун, Ваҳдат, Шаҳринав, Рӯдакӣ, Варзоб ва Файзобод иштирок намуда, донишу малакаи худро санҷида истодаанд. Роҳбарияти шаҳри Ҳисор барои дар сатҳи баланди ташкиливу маънавӣ баргузор гардидани озмун шароити зарурӣ муҳайё намуда, дар коллеҷҳои омӯзгориву тиббӣ, Мактаби Президентӣ барои хонандагони болаёқат дар шаҳри Ҳисор, муассисаҳои таҳсилоти миёнаи умумии рақамҳои 2 ва 5 синфхонаҳои муҷаҳҳазро барои озмун омода ва пешниҳод намуданд. Даври минтақавии  Озмуни ҷумҳуриявии «Илм-фурўғи маърифат» то санаи 30-уми  сентябри соли равон  идома меёбад.

Дар Донишкадаи ҷумҳуриявии такмили ихтисос ва бозомӯзии кормандони соҳаи маориф Озмуни ҷумҳуриявии «Омўзгори соли Тоҷикистон-2023» оғоз гардид. Дар озмун 5 нафар: омӯзгори фанни математикаи муассисаи таҳсилоти миёнаи умумии №26-и ноҳияи Роштқалъа Дилдор Суҳробов, омўзгори фанни забон ва адабиёти тоҷикӣ муассисаи таҳсилоти миёнаи умумии №29-и ноҳияи Мастчоҳ Раҳима Ҳидоева, омӯзгори фанни забон ва адабиёти тоҷикӣ Литсейи №3 барои хонандагони болаёқати шаҳри Душанбе Сиратулло Зоиров, омӯзгори фанни физика ва астрономияи Мактаби Президентї барои хонандагони болаёқат дар шаҳри Кўлоб Сулаймон Абдуқаҳҳор ва омўзгори фанни химияи Гимназия — парваришгоҳи ба номи Бобоҷон Ғафурови ноҳияи Рўдакї Санавбар Абдуллозода иштирок намуда, аз рўйи ҳафт шарт ҳунару маҳорат месанҷанд. Озмуни «Омўзгори соли Тоҷикистон-2023» 3 рўз давом намуда, 29 сентябр ҷамъбаст мешавад.

28 сентябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати иштирок дар Вохӯрии сарони давлатҳои “Осиёи Марказӣ – Ҷумҳурии Федеративии Олмон” ба Ҷумҳурии Федеративии Олмон сафар карданд.

Дар фурудгоҳи байналмилалии Душанбе Президенти Ҷумҳурии Тоҷикистон муҳтарам Эмомалӣ Раҳмонро Раиси Маҷлиси миллии Маҷлиси Олии Ҷумҳурии Тоҷикистон, Раиси Маҷлиси намояндагони Маҷлиси Олии Ҷумҳурии Тоҷикистон, Сарвазири Ҷумҳурии Тоҷикистон, Роҳбари Дастгоҳи иҷроияи Президенти Ҷумҳурии Тоҷикистон ва дигар шахсони расмӣ гусел намуданд.

Дар ин сафар Президенти Ҷумҳурии Тоҷикистон муҳтарам Эмомалӣ Раҳмонро Вазири корҳои хориҷӣ, ёрдамчиёни Президенти Ҷумҳурии Тоҷикистон оид ба масъалаҳои робитаҳои хориҷӣ ва оид ба масъалаҳои иқтисодӣ, вазирони саноат ва технологияҳои нав, молия ва дигар шахсони расмӣ ҳамроҳӣ мекунанд.

ДУШАНБЕ, 27.09.2023. /АМИТ «Ховар»/. Дар мақомоти корҳои дохилии Вилояти Мухтори Кӯҳистони Бадахшон «Рӯзи мактаб» эълон гардид ва тамоми кормандони ба муассисаҳои таълимӣ вобастагардида ба мактабҳои таҳсилоти миёнаи умумии шаҳру ноҳияҳои вилоят ва Коллеҷи тиббии шаҳри Хоруғ рафта, бо муҳассилин вохӯрию суҳбат намуданд. Дар ин хусус АМИТ «Ховар» бо истинод ба Раёсати Вазорати корҳои дохилӣ дар Вилояти Мухтори Кӯҳистони Бадахшон иттилоъ медиҳад.

Чорабиниҳои мазкур дар доираи таъмини иҷрои қонунҳои Ҷумҳурии Тоҷикистон «Дар бораи тарбияи ватандӯстӣ» ва «Дар бораи масъулияти падару модар дар таълиму тарбияи фарзанд» амалӣ  шуда, ба баланд бардоштани ҳисси ватандӯстӣ, худшиносӣ ва ҳувияти миллӣ, ҳифзи арзишу муқаддасоти миллӣ, ҳамзамон ба самти пешгирии содиршавии кирдорҳои зиддиҳуқуқӣ дар байни ноболиғону ҷавонон ва баланд бардоштани савияи ҳуқуқии ин табақаи ояндасози ҷомеа равона шудаанд.

Зимни баргузории мулоқоту суҳбатҳо дар тамоми муассисаҳои таълимии шаҳру ноҳияҳои Вилояти Мухтори Кӯҳистони Бадахшон кормандони милитсия доир ба масъалаҳои тарғиби тарзи ҳаёти солим, омӯзиши илмҳои муосир, соҳибкасб гардидану дар оянда ба нафъи мардуми мамлакат хизмат намудан, дурӣ ҷустан аз оворагардию беҳудагардӣ, арзиши олӣ доштани муқаддасоти Ватан ва ҳимояи марзу буми аҷдодӣ сухан гуфтанд.

Ҳамзамон кормандони шуъбаи Бозрасии давлатии автомобилии Раёсати Вазорати корҳои дохилӣ дар Вилояти Мухтори Кӯҳистони Бадахшон дар муассисаҳои таълимӣ бо хонандагони синфҳои ибтидоӣ дар мавзуъҳои риояи Қоидаҳои ҳаракат дар роҳ ва озмунҳои “Чароғаки роҳнамо”тадбирҳои профилактикӣ доир намуданд.

Дар зимн аз муассисаҳои таълимӣ, волидайн ва аҳли ҷомеа даъват шуд, ки нисбат ба ояндаи ноболиғону ҷавонон, ки қишри ояндасози миллату давлат ба шумор мераванд, бетараф набуда, баҳри ояндаи дурахшони онҳо кӯшиш ба харҷ диҳанд.

ДУШАНБЕ, 27.09.2023 /АМИТ «Ховар»/. 25 сентябр дар Муассисаи давлатии таълимии «Мактаби Президентӣ барои хонандагони болаёқат» дар шаҳри Бӯстон даври вилоятии Озмуни ҷумҳуриявии «Илм — фурӯғи маърифат» оғоз гардид, хабар медиҳад АМИТ «Ховар» бо истинод ба Хадамоти матбуоти Раиси вилояти Суғд.

Озмун аз рӯйи ҳафт номинатсия — математика (арифметика, алгебра, геометрия), физика ва астрономия, химия, биология (ботаника, зоология, анатомия), география ва технологияи иттилоотӣ, ихтироъкорӣ ва навоварӣ баргузор мегардад.

Дар маросими ифтитоҳи даври вилоятии озмун иброз гардид, ки бо Амри Президенти Ҷумҳурии Тоҷикистон муҳтарам Эмомалӣ Раҳмон баргузории ҳамасолаи ин озмун иқдоми наҷибе аст, ки суннати неки ниёгон — омӯзиши илмро эҳё намуда, дар тарбияи ҷавонони хештаншиносу худогоҳ ва ҳамқадами замони муосир нақши муассир мегузорад.

Дар таърихи навини Тоҷикистони соҳибистиқлол баргузории Озмуни ҷумҳуриявии «Илм – фурӯғи маърифат» дар самти илмҳои дақиқу риёзӣ ва табиӣ дар чунин сатҳ таҷрибаи нахустин буда, баргузорӣ ва сатҳу сифати он давра ба давра ташаккул меёбад.

Тайи ду соли охир озмун завқи муҳассилини муассисаҳои таълимӣ ва пажуҳишгарону муҳаққиқон ва ихтироъкоронро ба омӯзиши фанҳои риёзӣ, дақиқ ва табиӣ бедор намуда, барои ихтироъкориву навоварӣ заминаи мусоид фароҳам сохт. Далели ин гуфтаҳо иштироки фаъолона ва густардаи хонандагону донишҷӯён ва муҳаққиқон аз тамоми гӯшаву канори ҷумҳурӣ аст.

Аз ҷумла, дар даври ҷумҳуриявии озмун соли 2021 беш аз 320 нафар ва соли 2022 376 нафар довталабон аз рӯи ҳафт номинатсия иштирок намуда, беҳтаринҳо сазовори ҷойҳои ифтихорӣ гардиданд.

Соли равон даври аввали Озмуни ҷумҳуриявии «Илм — фурӯғи маърифат» бо иштироки 42 ҳазору 718 нафар довталаб дар муассисаҳои таълимӣ ва шаҳраку деҳоти вилояти Суғд дар сатҳи баланд гузаронда шуд.

Дар даври дуюми озмун 8 ҳазору 729 нафар иштирок намуда, ба даври сеюм — вилоятӣ 1 ҳазору 222 нафар роҳхат гирифтанд. Аз онҳо 955 хонандаи муассисаҳои таълимӣ, 186 донишҷӯи муассисаҳои таҳсилоти миёна ва олии касбӣ (бакалавр, магистр) ва докторанти муассисаҳои таҳсилоти олӣ ва илмӣ, 30 нафар омӯзгори ҳамаи зинаҳои таҳсил, ходимони илмию адабӣ ва намояндагони касбу кори гуногун ҳастанд.

Барои баҳогузории холисона ва муайян намудани ғолибони даври вилоятӣ ҳайати ҳакамони босалоҳият аз ҳисоби адибон, докторону профессорони донишгоҳҳои ҷумҳурӣ, масъулини Вазорати маориф ва илми Ҷумҳурии Тоҷикистон, намояндагони сохторҳои дахлдори мақомоти иҷроияи ҳокимияти давлатии вилоят доварӣ, беҳтаринҳоро интихоб ва ба даври ҷумҳуриявӣ пешниҳод менамоянд.

ДУШАНБЕ, 27.09.2023. /АМИТ «Ховар»/. Дар Донишкадаи ҷумҳуриявии такмили ихтисос ва бозомӯзии кормандони соҳаи маориф имрӯз Озмуни ҷумҳуриявии «Омӯзгори соли Тоҷикистон — 2023» оғоз гардид. Дар ин хусус ба АМИТ «Ховар» дар маркази матбуоти Вазорати маориф ва илми Ҷумҳурии Тоҷикистон хабар доданд.

Озмун бо мақсади дарёфти омӯзгорони боистеъдод, навовар, эҷодкор, қадрдонии меҳнати омӯзгор ва баланд бардоштани мақому манзалати ӯ дар ҷомеа, рушди фаъолияти касбии кормандони соҳаи маориф, тарғиби таҷрибаи пешқадами омӯзгорони беҳтарини Тоҷикистон гузаронида шуда, дар ин самт аз тарафи Вазорати маориф ва илм барои дар сатҳи баланд ва шаффоф доир намудани он тамоми тадбирҳои зарурӣ андешида мешаванд.

Дар озмун 5 нафар: омӯзгори фанни математикаи муассисаи таҳсилоти миёнаи умумии №26-и ноҳияи Роштқалъа Дилдор Суҳробов, омӯзгори фанни забон ва адабиёти тоҷики муассисаи таҳсилоти миёнаи умумии №29-и ноҳияи Мастчоҳ Раҳима Ҳидоева, омӯзгори фанни забон ва адабиёти тоҷики Литсейи №3 барои хонандагони болаёқати шаҳри Душанбе Сиратулло Зоиров, омӯзгори фанни физика ва астрономияи Мактаби президентӣ барои хонандагони болаёқат дар шаҳри Кӯлоб Сулаймон Абдуқаҳҳор ва омӯзгори фанни химияи Гимназия — парваришгоҳи ба номи Бобоҷон Ғафурови ноҳияи Рӯдакӣ Санавбар Абдуллозода иштирок намуда, аз рӯйи ҳафт шарт ҳунару маҳорат месанҷанд.

Озмуни «Омӯзгори соли Тоҷикистон-2023» 3 рӯз давом намуда, 29 сентябр ҷамъбаст мешавад.

ДУШАНБЕ, 27.09.2023. /АМИТ «Ховар»/. Дар Театри давлатии академии опера ва балети ба номи Садриддин Айнӣ ва Консерваторияи миллии Тоҷикистон ба номи Талабхуҷа Сатторов даври ниҳоии Озмуни ҷумҳуриявии «Тоҷикистон-Ватани азизи ман» идома дорад. Дар ин хусус ба АМИТ «Ховар» дар маркази матбуоти Вазорати фарҳанги Ҷумҳурии Тоҷикистон хабар доданд.

Довталабон аз рӯи номинатсияҳои сарояндагӣ, композиторӣ ва навозандагӣ баромад менамоянд.

Даври ниҳоии озмун аз 25 то 30 сентябр идома ёфта,  маросими ҷоизасупорӣ ва барномаи консертӣ бо иштироки ғолибони озмун 5 октябр дар Театри давлатии академии опера ва балети ба номи С.Айнӣ баргузор мегардад.

ДУШАНБЕ, 27.09.2023 /АМИТ «Ховар»/. Дастаи мунтахаби Тоҷикистон дар Бозиҳои 19-уми Осиёӣ, ки дар шаҳри Ханжоуи Ҷумҳурии Мардумии Чин идома дорад, аз рӯи ҳисоби медалҳо бо дарназардошти сифати онҳо бо касби се медал (як тилло, як нуқра ва як биринҷӣ) дар байни 45 давлати иштироккунанда дар ҷойи 12-ум қарор дорад. Дар ин хусус ноиби президенти Кумитаи миллии олимпии Тоҷикистон Дилшод Назаров ба шореҳи варзиши АМИТ «Ховар» хабар дод.

Аз рӯи натиҷагирии мусобиқот то ҳоло варзишгарони 30 давлат медали бозиҳоро ба даст овардаанд, аз ҷумла намояндагони 14 кишвар нишони тилло гирифтаанд. Дастаи мунтахаби Чин бо касби 99 медал (56 тилло, 30 нуқра ва 13 биринҷӣ) дар ҷойи аввал аст. Дастаи мунтахаби Кореяи Ҷанубӣ бо касби 51 медал (15 тилло, 16 нуқра ва 20 биринҷӣ) дар ҷойи дуюм ва дастаи мунтахаби Ҷопон бо касби 50 медал (9 тилло, 21 нуқра ва 20 биринҷӣ) дар ҷойи сеюм қарор доранд. Ба даҳгонаи аввал инчунин дастаҳои мунтахаби Узбекистон бо касби (5-6-11), Гонконг (5-5-11), Тайланд (5-1-5), Ҳиндустон (3-4-7), Индонезия (3-1-5), Тайпейи Чин (2-3-3), ва Эрон (1-4-5) дохил мебошанд.

Инчунин пеш аз Тоҷикистон боз як давлат– Аморати Муттаҳидаи Араб (1-1-3) ҷойгир шудааст. Аз давлатҳои Осиёи Марказӣ ба ғайр аз Узбекистону Тоҷикистон Қирғизистон як медали тилло (ҷойи 14-ум), Қазоқистон 9 медал (2 нуқра ва 7 биринҷӣ, ҷойи 16-ум) ва Туркманистон 1 медали биринҷӣ (ҷойи 25-ум) гирифтаанд.

Ёдовар мешавем, ки Сомон Маҳмадбеков дар Бозиҳои 19-уми Осиёӣ дар риштаи ҷудо дар вазни то 81 кило медали тилло ба даст овард. Темур Раҳимов дар вазни +100 кило медали нуқра гирифт. Беҳрӯзи Хоҷазода дар вазни то 73 кило барандаи медали биринҷӣ шуд. Ҳамин тариқ, ҳар се медали дастаи мунтахаби Тоҷикистон дар ин бозиҳо ба варзишгарони тоҷик дар риштаи гӯштини ҷудо тааллуқ доранд.

Ба иттилои Кумитаи миллии олимпии Тоҷикистон, дар Бозиҳои 19-умин Осиёӣ, ки то 8 октябр идома меёбанд, Тоҷикистонро беш аз 100 варзишгар намояндагӣ менамоянд.

Ба барномаи бозиҳо 40 навъи варзиш (28 намуди олимпӣ ва 12 намуди ғайриолимпӣ) дохил аст. Варзишгарони тоҷик дар 18 намуд ҳунарнамоӣ менамоянд. Ба назари коршиносон, варзишгарони тоҷик боз дар риштаҳои бокс, гӯштини озод ва юнонию румӣ, ҷиу- ҷитсу, варзиши сабук, каратэ ва кураш имкони гирифтани медал доранд.

Ба варзишгарони тоҷик, ки дар Бозиҳои Осиёӣ дар Ханжоу медали тилло мегиранд, ҷоизаи Президенти Тоҷикистон ба маблағи 150 000 сомонӣ, ба барандагони медали нуқра 100 000 сомонӣ ва ба соҳибони медали биринҷӣ 50 000 сомонӣ супурда мешавад. Инчунин бо қарори Раиси шаҳри Душанбе ба онҳое, ки дар ин бозиҳо барандагони медали тилло мешаванд, хонаи сеҳуҷрагӣ, медали нуқра — дуҳуҷрагӣ ва медали биринҷӣ- манзили якҳуҷрагӣ тақдим мегардад.

Бояд гуфт, ки дастаи мунтахаби Тоҷикистон аз соли 1994 дар ин бозиҳо иштирок намуда, то ҳоло 30 медал гирифтааст, ки 5-тоаш медали тилло, 7-то медали нуқра ва 18 адад медали биринҷӣ мебошад. Се медали тиллоро Дилшод Назаров аз гурзандозӣ, як медали тиллоро Ҷаҳон Қурбонов дар бокс ва як адади дигарро Сомон Маҳмадбеков дар гӯштини ҷудо ба даст овардаанд.