18 октябр дар Қасри миллат Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Вазири дифоъ ва пуштибонии Неруҳои мусаллаҳи Ҷумҳурии Исломии Эрон Муҳаммад Ризо Оштиёниро ба ҳузур пазируфтанд.

Дар ҷараёни мулоқот масъалаҳои вобаста ба равобити Тоҷикистону Эрон ва дар ин зимн ҳамкориҳои ду кишвар дар соҳаи таъмини амният мавриди баррасӣ қарор гирифтанд.

Ҷонибҳо бо ишора ба шиддат гирифтани таҳдиду хатарҳои муосир  зарурати таҳкими ҳамкориҳоро дар самти муқовимат ба чунин зуҳуроти онҳо, ба монанди терроризм, ифротгароӣ, гардиши ғайриқонунии маводи мухаддир ва   ҷинояткории муташаккили фаромиллӣ таъкид намуданд.

Ду кишвар аз тавсеаи фаъолияти абзорҳои мавҷудаи ҳамкорӣ, ҳамчунин татбиқи ҳамаҷонибаи санадҳо ва мувофиқаҳои дар ин соҳа ҳосилгардида ҷонибдорӣ карданд.

ДУШАНБЕ, 18.10.2023. /АМИТ «Ховар»/. Бо қарори Раиси шаҳри Душанбе муҳтарам Рустами Эмомалӣ нақшаи чорабиниҳои Мақомоти иҷроияи ҳокимияти давлатии шаҳри Душанбе вобаста ба дар сатҳи баланд таҷлил намудани  Рӯзи Президенти Ҷумҳурии Тоҷикистон дар пойтахт тасдиқ гардид. Дар ин хусус ба АМИТ «Ховар» дар шуъбаи иттилоотии дастгоҳи Раиси шаҳри Душанбе хабар доданд.

Дар асоси қарори мазкур,   дар пойтахт баргузории конференсияҳои илмӣ-назариявӣ, барномаҳои фарҳангию фароғатӣ барои сокинону меҳмонони пойтахт, мусобиқаҳои варзишӣ ва намоиши китобҳои Пешвои миллат дар назар дошта шудааст.

Ёдовар мешавем, ки  15 апрели соли 2016 вакилони Маҷлиси намояндагони Маҷлиси Олии Ҷумҳурии Тоҷикистон пешниҳоди Ҳукумати Ҷумҳурии Тоҷикистонро дар мавриди ворид намудани илова ба Қонуни Ҷумҳурии Тоҷикистон «Дар бораи рӯзҳои ид» баррасӣ ва қабул карданд. Минбаъд дар асоси он ҳамасола 16 ноябр дар  мамлакат  Рӯзи Президенти Ҷумҳурии Тоҷикистон таҷлил мегардад.

ДУШАНБЕ, 18.10.2023. /АМИТ «Ховар»/. Дар натиҷаи андешидани тадбирҳои самарабахш ва истифодаи мақсадноки замин дар нуҳ моҳи соли равон ҳаҷми умумии истеҳсоли маҳсулоти кишоварзӣ дар вилояти Хатлон ба 25 миллиарду 48 миллион сомонӣ расонида шуда, афзоиши он нисбат ба нишондиҳандаи ҳамин давраи соли гузашта 1 миллиарду 19 миллиону 601 ҳазор сомонӣ ё 105 фоизро ташкил медиҳад. Дар ин хусус ба АМИТ «Ховар» дар Мақомоти иҷроияи ҳокимияти давлатии вилояти Хатлон хабар доданд.

Тавре иттилоъ дода шуд, дар доираи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба самараноку оқилона истифода бурдани заминҳои кишоварзӣ дар майдони 22054 гектар, аз ҷумла 11616 гектар байни боғу токзор, 5717 гектар чарогоҳ, 2109 гектар заминҳои партов ва 2612 гектар заминҳои зери сохтмони мелиоративӣ қарордошта зироати гуногуни кишоварзӣ кишт шуд, ки ба афзун гардидани ҳаҷми маҳсулоти умумии кишоварзӣ мусоидат намуд.

Фаъолияти масъулини соҳа ва кишоварзони вилояти Хатлон пеш аз ҳама, ба баланд бардоштани боздеҳи замин, яъне гирифтани ду-се ҳосил аз як қитъаи замин, афзоиш додани ҳосилнокии зироат ва рушди соҳаи тухмипарварӣ равона гардидааст.

Имсол дар бахши ҷамъиятӣ ва хоҷагиҳои деҳқонӣ дар майдони 350391 гектар зироати кишоварзӣ кишт шуд, ки нисбат ба ҳамин давраи соли гузашта дар маҷмуъ 1845 гектар зиёд мебошад.

ДУШАНБЕ, 18.10.2023 /АМИТ «Ховар»/. Бо дастури Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз ба мардуми аз заминларза зарардидаи Афғонистон кумаки башардӯстона фиристода мешавад, хабар медиҳад АМИТ «Ховар».

Кумаки башардӯстона аз либосу пойафзоли зимистона, маводи хӯрокворӣ, масолеҳи сохтмонӣ, хайма, ҷилди хобу рӯйпӯшҳои зимистона, оби нӯшокӣ ва дигар ашёи барои зиндагӣ зарурӣ иборат буда, қариб 3 ҳазору 300 тоннаро ташкил медиҳад

Кумаки башардӯстона ба мардуми аз офати табиӣ  зарардидаи Афғонистон тавассути 130 мошини боркашонӣ ба Афғонистон интиқол дода мешавад ва он намунаи олии ғамхориҳо ва дастгириҳои пайвастаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз мардуми давлати ҳамсояи Тоҷикистон ба ҳисоб меравад.

ДУШАНБЕ, 16.10.2023. /АМИТ «Ховар»/. Мақомоти иҷроияи ҳокимияти давлатии шаҳри Душанбе бо мақсади тоза нигоҳ доштани ҳавои атмосфера ва коҳиш додани партовҳои саноатию нақлиётӣ ҳамасола тадбирҳои экологӣ амалӣ менамояд. Махсусан амалӣ гардидани ташаббуси «Тозагии ҳаво» аз ҷониби Сарраёсати ҳифзи муҳити зист дар шаҳри Душанбе дар ҳамкорӣ бо шуъбаи Раёсати экологӣ ва сайёҳии Вазорати корҳои дохилии Ҷумҳурии Тоҷикистон дар шаҳри Душанбе хеле манфиатбахш буда, чунин ибтикор имкон медиҳад, ки ихроҷи партовҳо аз воситаҳои нақлиёт ба шиддат кам шавад. Дар ин хусус котиби матбуоти Сарраёсати ҳифзи муҳити зист дар шаҳри Душанбе Саидаҳмади Акрампур ба хабарнигори АМИТ «Ховар» Субҳониддини Маҳмуд иттилоъ дод.

Идома

ДУШАНБЕ, 16.10.2023 /АМИТ «Ховар»/. Имрӯз дар Муассисаи давлатии «Тоҷикфилм» таҳти унвони «Шаҳри ман-хонаи ман» намоиши аксҳои филмбардор ва аксбардори шинохта Заур Дахте баргузор шуд, хабар медиҳад АМИТ «Ховар».

Намоиш дар доираи Синоҷашнвораи якуми байналмилалии Душанбе «Тоҷи Сомон» баргузор шуда, дар он 100 акс ба маърази тамошо гузошта шуд, ки Душанбеи имрӯзаро таҷассум менамоянд.

Заур Дахте, ки дар гузашта наворбардори филмҳо буд, аввалин намоиши аксҳояшро соли 2003 дар шаҳри Душанбе баргузор намудааст. Аз он сол то ҳоло намоиши аксҳои Заур Дахте дар 14 давлати дунё баргузор шудаанд.

Дар намоиш инчунин китоби «Устураи фарҳанг ва ҳунари тоҷик» рӯнамоӣ шуд, ки он достони зиндагӣ ва корномаи Заур Дахтеро бозгӯ аст.

Ҳамзамон дар намоиш «Дарси устод ва шогирд» баргузор шуда, иштирокчиён доир ба санъати аксбардорӣ барои худ маълумоти муфид бардоштанд.

Заур Дахте соли 1936 ба дунё омада, соли 1958 дар студияи «Тоҷикфилм» ба кор оғоз намудааст. Аввалин филми бардоштаи ӯ «Вохӯрӣ дар масҷиди кӯҳна» буда, баъдан филмҳои машҳури «Рустам ва Сӯҳроб», «Одам пӯсташро иваз мекунад», «Чаҳор нафар аз Чорсанг» ва даҳҳо филми дигарро наворбардорӣ намудааст.

ДУШАНБЕ, 16.10.2023 /АМИТ «Ховар»/. Имрӯз дар Тоҷикистон Рӯзи кинои тоҷик маҳсуб мешавад. Дар робита ба ин имрӯз, 16 октябр дар Театри давлатии академии опера ва балети ба номи Садриддин Айнӣ бахшида ба Рӯзи кинои тоҷик маросими ифтитоҳи Синамоҷашнвораи якуми байналмилалии Душанбе «Тоҷи Сомон» таҳти шиори «Таърихи рушди тоҷикон» доир гардид. Дар ин хусус мухбири АМИТ «Ховар» иттилоъ медиҳад.

Дар маросими ифтитоҳи он муовини Сарвазири Ҷумҳурии Тоҷикистон Матлубахон Сатториён, муовини Раиси шаҳри Душанбе Дилбар Одилзода, намояндагони Дастгоҳи иҷроияи Президенти Ҷумҳурии Тоҷикистон, меҳмонон аз хориҷи мамлакат, роҳбарият ва намояндагони Муассисаи давлатии «Тоҷикфилм» ва дигар вазорату идораҳои мамлакат иштирок намуданд.

Парчами синамоҷашнвора ҳамчун рамзи ифтитоҳи ин ҷашнвораи бузург бо иштироки давлатҳои иштирокчӣ барафрохта шуд.

Бояд гуфт, ки бори аввал дар замони соҳибистиқлолии Ҷумҳурии Тоҷикистон дар шаҳри Душанбе чунин синамоҷашнвора баргузор мешавад.

Дар синамоҷашнвора меҳмонони зиёде аз давлатҳои Русия, Узбекистон, Молдова, Озарбойҷон, Чин, Фаронса, Ҳиндустон, Покистон, Қазоқистон ва ғайра иштирок доранд.

Ёдовар мешавем, ки дар робита ба баргузории Синамоҷашнвораи байналмилалӣ бо назардошти таҷрибаи синамоҷашнвораҳои байналмилаливу минтақавӣ  дар Муассисаи давлатии «Тоҷикфилм» Комиссияи интихоби филмҳо  таъсис ёфт. Он дар муддати як моҳ филмҳои пешниҳодшуда аз давлатҳои Русия, Эрон, Покистон, Ҳиндустон, Маҷористон, Узбекистон, Қазоқистон, Туркманистон, Озарбойҷон, Арманистон, Канада, Туркия, Ҷумҳурии Мардумии Чин, Беларус, Молдова, Фаронса ва Тоҷикистонро барои озмунҳои Синамоҷашнвора мавриди баррасӣ  қарор дод.

Ҳамин тавр, аз байни 200 дархости пешниҳодшуда 70 филм мавриди омӯзиш ва тамошо қарор гирифта, 18 филми ҳунарии пурра ва 8 филми ҳунарии кӯтоҳ барои иштирок ва рақобат дар  озмунҳои синамоҷашнвора сазовор дониста шуданд. Барои баҳодиҳӣ ва муайян намудани ғолибон ҳакамони байналмилалӣ даъват шудаанд.

Кори ҳакамони байналмилалии Синамоҷашнвора аз ду гурӯҳ: ҳакамии озмуни филмҳои ҳунарии пурра ва ҳакамии озмуни филмҳои ҳунарии  кӯтоҳ  иборат буда,  бо қарори Кумитаи тадорукот  ҳайати ҳакамон бо шумули   муътабартарин филмсозон, мунаққидон, пажуҳишгарони фарҳанги  синамоӣ  ва намояндагони санъати синамо таъсис дода шуд.

Ба гурӯҳи ҳакамони филмҳои ҳунарии пурра 5 нафар ва ҳакамони  филмҳои ҳунарии кӯтоҳ 4 нафар  ҷалб гардидаанд.

Бояд гуфт, ки ҷоизаҳои Синамоҷашнвора аз Шоҳҷоиза барои беҳтарин филми ҳунарӣ,  Ҷоизаи «Беҳтарин коргардон», Ҷоизаи «Беҳтарин наворбардор», Ҷоизаи «Беҳтарин нақши мардона», Ҷоизаи «Беҳтарин нақши занона», Ҷоизаи «Беҳтарин филми ҳунарии кӯтоҳ», Ҷоизаи махсуси ҳакамон, Ҷоизаи таваҷҷуҳи тамошобин ва  Ҷоизаи махсуси Раиси шаҳри Душанбе «Барои саҳми муносиб дар рушди кинематография» иборат мебошанд.

Ёдовар мешавем, ки Синамоҷашнвораи якуми байналмилалии Душанбе — «Тоҷи Сомон» таҳти шиори «Таърихи рушди тоҷикон» дар Душанбе то 19 октябр идома меёбад.

Дар МТМУ №64 н. Рӯдакӣ маҳфили фарҳангӣ-маърифатӣ  бо иштироки нависандаи халқии Тоҷикистон,барандаи ҷоизаи ба номи Абӯабдулло Рӯдакӣ Кароматуллоҳи Мирзо доир гардид. Хонандагону омӯзгорони таълимгоҳ адибро самимона истиқбол гирифтанд. Муҳассилин доир ба зиндагинома ва асарҳои нависанда, аз ҷумла романи «Дар орзӯи падар» «Марги бегуноҳ» маълумот доданд. Дар як гӯшаи маҷлисгоҳ асарҳои адиб низ ба намоиш гузошта шуда буд. Дар навбати худ нависанда роҷеъ ба фаъолияти эҷодии худ қиссаҳои ҷолиб баён намуд. Бо ташаббуси  роҳбарияти таълимгоҳ чунин чорабиниҳои маърифатӣ пайваста  ташкилу роҳандозӣ карда мешавад.

Бо ташаббуси Мақомоти иҷроияи ҳокимияти давлатии шаҳри Душанбе маросими љоизасупории ғолибони даври шаҳрии озмунҳои ҷумҳуриявии «Тоҷикон»-оинаи таърихи миллат» ва «Илм-фурӯғи маърифат» баргузор гардид. Барои ишғоли ҷойи 3-юм дар даври шаҳри Озмуни ҷумҳуриявии «Тољикон»-оинаи таърихи миллат» 12 нафар ғолибон бо диплом, љоиза ва мукофотпулӣ дар ҳаҷми 15 ҳазор сомонӣ, ҷойи дуюм-8 нафар бо диплом, ҷоиза ва мукофотпулӣ дар ҳаҷми 20 ҳазор сомонӣ ва 4 нафар гирандаи ҷойи якум бо диплом, ҷоиза ва мукофотпулӣ дар ҳаҷми 25 ҳазор сомонї қадрдонӣ гардиданд.

Дар идома 66 нафар ғолибони ҷойи сеюми даври шаҳрии Озмуни ҷумҳуриявии «Илм-фурӯғи маърифат» аз рӯйи 7 номинатсия бо диплом, ҷоиза ва мукофотпулӣ дар ҳаҷми 10 ҳазор сомонӣ, ҷойи дуюм  44  нафар бо диплом, ҷоиза ва мукофотпулӣ дар ҳаљми 15 ҳазор сомонӣ ва 22 нафар ҷойи якум бо диплом, ҷоиза ва мукофотпулӣ дар ҳаҷми 20 ҳазор сомонӣ қадрдонӣ шуданд.

Дар Боғи фарҳангию фароғатии ба номи Абулқосим Фирдавсии шаҳри Душанбе Иди Меҳргон- мероси пурарзиши аҷдодон ва яке аз рукнҳои муҳими худшиносиву ҳувияти миллии мо бо шукуҳу шаҳомати хосса таҷлил гардид. Дар ин рӯз ҳамчунин Фестивал-намоиши маҳсулот ва техникаи кишоварзї, Фестивали занбӯрпарварон, намоиш ва фурӯши асал, Фестивал-намоиш ва фурӯши шолӣ ва биринҷ доир гардид. Ҳамоиш бо ташаббуси  Вазорати кишоварзии Ҷумҳурии Тоҷикистон ва Мақомоти   иҷроияи ҳокимияти давлатии шаҳри Душанбе ташкил гардид. Дар ҷашни Меҳргон инчунин намоиш ва фурӯши навъҳои гуногуни асали занбӯрпарварони вилоятҳои Суғду Хатлон ва ноҳияҳои тобеи ҷумҳурӣ доир гардид Дар ҷамъбасти намоиш ба кишоварзони фаъол аз ҷониби Вазорати кишоварзии мамлакат Ифтихорнома ва туҳфаҳо тақдим гардиданд.