Раздел: Хабарҳо
Таваллуди навзоде, ки аҳолии Тоҷикистонро ба 10 миллион оварда расонд.
Қадрдонии ғолибони даври ноҳиявии озмуни ҷумҳуриявии «Илм-фурӯғи маърифат»
Дар толори Муассисаи таҳсилоти миёнаи умумии рақами 8-уми ноҳияи Исмоили Сомонии шаҳри Душанбе маросими қадрдонии ғолибони даври ноҳиявии озмуни ҷумҳуриявии «Илм-фурӯғи маърифат» дар ноҳияи Исмоили Сомонӣ баргузор гардид. Дар ин ҳамоиш намояндагони Мақомоти иҷроияи ҳокимияти давлатии ноҳияи Исмоили Сомонӣ ва омӯзгорону ғолибони озмун ширкат намуданд. Дар даври дуввум дар ноҳияи Исмоили Сомонӣ 400 довталаб ширкат варзида, аз миёни онҳо 74 нафар аз рӯи наминатсияҳо ғолиб дониста шуданд. Дар як вақт ба ғолибон аз ҷониби масъулин диплом ва туҳфаҳои пулӣ супорида шуд.
Ифтитоҳи маркази омӯзишии шоҳмот дар пойтахти кишвар
Ба муносибати Рӯзи байналмиллалии шоҳмот бо ибтикори Федератсияи шоҳмоти Тоҷикистон дар шаҳри Душанбе маркази шоҳмот ба истифода дода шуд. Тавре иттилоъ дода шуд, марказ бо дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Президенти Кумитаи миллии олимпии Тоҷикистон муҳтарам Эмомалӣ Раҳмон таъсис ёфта, дар он наврасону ҷавонон имкон доранд ба варзиши зеҳнӣ машғул шаванд. Феълан дастаи мунтахаби шоҳмоти Тоҷикистон ба Олимпиадаи байналмиллалии шоҳмот, ки 28 июл дар Ҳиндустон оғоз мегардад, омодагӣ мебинанд. Дар Олимпиада иштироки 187 дастаи мардон ва 162 дастаи бонувон дар назар аст.
Маросими ҷамъбастӣ басти сеюм дар Истироҳатгоҳ
Дар истироҳатгоҳи солимгардонии кӯдакону наврасон ба номи «20 солагии Истиқлолияти давлатии ҶТ» воқеъ дар ноҳияи Ҷаббор Расулов маросими пӯшидашавии басти сеюми истироҳат баргузор гардид. Дар маросими пӯшидашавии истирохатгоҳ кӯдакону наврасон бо парчами давлатӣ, қадамзанон ба идгоҳ ҳозир шуданд ва бо садо додани суруди миллӣ сарварони гурӯҳҳо ба роҳбари истироҳатгоҳ гузориш доданд. Қайд карда шуд, ки дар Истироҳатгоҳ беш аз 300 нафар хонандагон аз минтақаҳои мухталифи кишварамон истироҳату фароғат намуданд.
Риояи қоидаҳои оббозӣ
Дар доираи нақша чорабиниҳои Раёсати ВКД дар ш. Душанбе дар ҳамкорӣ бо Раёсати ҳолатҳои фавқулода ва дигар сохторҳои марбута бо мақсади пешгирии ғарқшавии кӯдакону наврасон ва ҷавонон амалиётҳои санҷишӣ дар ҳудуди пойтахт гузаронида шуд. Дар рафти санҷиш муайян карда шуд, ки бештари кӯдакону наврасон ва ҷавонон дар ҷойҳои хатарнок ва ба талабот ҷавобгӯ набуда ба оббозӣ машғул шуда, оддитарин қоидаи шиновариро риоя намекунанд ва ғарқшавӣ дар ин маконҳо аз эҳтимол дур нест. Зимни амалиёт нисбати волидони онҳо протаколҳои маъмурӣ тартиб дода шуд.
Оғози басти 3-юми истироҳат дар истироҳатгоҳҳои беруназшаҳрӣ.
Дар таърихи 14 июл кӯдакону наврасони 4 ноҳияи шаҳри Душанбе барои истироҳату фароғат ба басти 3-юми истироҳатгоҳҳои беруназшаҳрӣ гусел карда шуданд. Дар 4 истироҳатгоҳи беруназшаҳрӣ, аз ҷумла «Шарора» -и ноҳияи Исмоили Сомонӣ 180 нафар, дар истироҳатгоҳи «Зимчуруд» -и ноҳияи Шоҳмансур 250 нафар, дар истироҳатгоҳи «Гулхан» -и ноҳияи Сино -200 нафар, дар истироҳатгоҳи «Орзу» -и ноҳияи Фирдавсӣ 200 нафар кӯдакону наврасон ба истироҳату фароғат фаро гирифта шуданд.
Оғози нишасти матбуотии Вазорату муассисаҳои таълимӣ дар нимсолаи аввали соли 2022
Дар соли равон 1874 нафар донишҷӯён, аз ҷумла, аз факултети тиббӣ 1164 нафар, педиатрӣ 96 нафар, стоматологӣ 166 нафар, фармасевтӣ 63 нафар ва аз тиббӣ-профилактикӣ 29 нафар имтиҳонҳои хатмро бо муваффақият супориданд. Аз теъдоди умумии хатмкунандагон 253 нафар тибқи квотаи Президентӣ таҳсил намуда, 356 нафарашонро донишҷӯёни хориҷӣ ташкил медиҳад. Ин нуқта дар нишасти матбуотии Донишгоҳи тиббӣ ба номи Абуалӣ ибни Сино қайд карда шуд. Иброз гардид, ки Донишгоҳи мазкур бо 61 муассисаҳои таълимию илмӣ ва ташкилотҳои хориҷӣ шартномаи ҳамкорӣ бастааст. Дар нимсолаи аввал 2 созишномаи дуҷониба тамдид ва 6 созишномаи дуҷониба бо муассисаҳои таълимию илмии Федератсияи Русия, Ҷумҳурии Қазоқистон ва Корея ба имзо расидааст.
Иштироки фаъолонаи боксчиён дар Ҷумҳурии Қазоқистон
Ду варзишгари наврас Асламҷон Қурбонов дар вазни 54 кг ва Давлаталии Нуралӣ дар вазни 42 кг дар қатори дигар наврасони мунтахаби Тоҷикистон оид ба бокс, ба мусобиқаи байналмиллалӣ барои дарёфти Ҷоми мураббии собиқ Иттиҳоди Шӯравӣ Алимқул Буркитбаев, ки дар шаҳри Алмаатои Ҷумҳурии Қазоқистон баргузор гардид сафарбар шуданд. Ин ду варзишгар тавонистанд, ки дар ин мусобиқаи байналмиллалӣ бар ҳамаи рақибон ғолиб омада сазовори мақоми аввал шаванд. Ҷоизадорони мусобиқаи мазкурро дӯстону пайвандон дар Маркази ҷавонони шаҳри Кӯлоб бо хушнудӣ истиқбол намуданд.
Омодагӣ ба озмуни ҷумҳуриявии «Фуруғи субҳи доноӣ китоб аст»
Дар Китобхонаи миллии Тоҷикистон зери унвони «60 рӯзи таътил дар китобхона» ҳамоиш баргузор гардид. Ҳамоиш ба озмуни ҷумҳуриявии «Фуруғи субҳи доноӣ китоб аст» бахшида шуда, дар он иштирокчиёни озмун, кормандони Китобхонаи миллӣ, раиси Кумитаи кор бо ҷавонон ва варзиши назди Ҳукумати ҶТ, муовини раиси Иттифоқи нависандагони Тоҷикистон - Равшани Муқимҷӯ ширкат варзиданд. Ҳозирин оид ба муҳтавои озмуни мазкур суханронӣ намуда, наврасону ҷавонон ва иштирокчиёни ҷамъомадро таъкид намуданд, ки ба озмун хуб тайёрӣ дида ҷойҳои намоёнро сазовор шаванд.
