Автор: ТВБ

Истироҳатгоҳи Зимчуруд.

ДУШАНБЕ, 28.06.2023. /АМИТ «Ховар»/. Тавре қаблан иттилоъ додем, чанде пеш бахшида ба Ҷашни 35-солагии Истиқлоли давлатии Ҷумҳурии Тоҷикистон дар ноҳияи Ховалинг бинои Осорхонаи таърихӣ — кишваршиносӣ мавриди баҳрабардорӣ қарор дода шуд. Иншоот дар масоҳати 144 метри мураббаъ бунёд гардида, бо мавриди истифода қарор гирифтани он 7 нафар бо ҷойи кор таъмин шуданд, хабар медиҳад мухбири минтақавии АМИТ «Ховар».

Осорхона аз ду ошёна иборат буда, шуъбаҳои асри санг, асри биринҷ, асрҳои миёна, шаҳри Мунки бостонӣ ва дигар давраҳои таърихиро дар бар мегирад.

Дар ошёнаи якуми бино гӯшаи асарҳои таърихии Пешвои миллат муҳтарам Эмомалӣ Раҳмон бо номи «Президенти мо», бозёфтҳои ҷамъовардаи кормандони осорхона ва гурӯҳи кории бостоншиносони Академияи миллии илмҳои Тоҷикистон ташкил гардида, осори таърихию фарҳангӣ аз ҳаёти гузаштаи тамоми ҳудуди ноҳияи Ховалинг дар қабати дуюми иншоот ба намоиш гузошта шудааст.

Ҳар як гӯшаи осорхона вобаста ба таъриху тамаддуни миллати тоҷик дорои бозёфт ва ёдгориҳое мебошад, ки ҳар бинандаро бо гузаштаи пурифтихори ниёгони тоҷик ошно месозанд.

Дар Осорхонаи таърихӣ — кишваршиносии ноҳияи Ховалинг зиёда аз 4 ҳазор нигораи бозгӯкунандаи тамоми давраҳои таърихӣ, аз ҷумла 2 ҳазор осори заргарӣ, кулолгарӣ, оҳангарӣ, мисгарӣ, шишапораҳо, сафолоти гуногуни рӯзғордорӣ, зарфҳо, бозёфтҳои асбобҳои сангӣ ва дигар ёдгориҳо аз шаҳри Мунки бостонӣ ҷамъоварӣ гардидааст.

Имрӯзҳо беш аз 10 нафар унвонҷӯи дохилию хориҷӣ дар ин осорхона ба корҳои илмию тадқиқотӣ машғул мебошанд. Бинои осорхона бо истифода аз унсурҳои хоси миллию таърихӣ бо иқдоми сокинон ва соҳибкорони маҳаллӣ бунёд ёфта, тасвирҳои таърихии он аз соҳибтамаддун, соҳибкасб, соҳибтахассус ва ҳунарманд будани миллати тоҷик дарак медиҳанд.

ДУШАНБЕ, 28.06.2023. /АМИТ «Ховар»/. Ба ифтихори 35 – солагии Истиқлоли давлатии Ҷумҳурии Тоҷикистон ва ба хотири гиромидошти Қаҳрамони Тоҷикистон, устод Мирзо Турсунзода нашриёти «Адиб» китоби рӯзноманигор, муҳаррир ва тарҷумон Раҷабалӣ Қудратзодаро бо номи «Фарзанди Осиё» мунташир намуд, хабар медиҳад мухбири АМИТ «Ховар».

Китоб, ки аз силсилаи мақолаҳои пурмазмуни муаллиф иборат аст, мероси адабии шоири маҳбубу зиндаёдро барҳақ чун сарвати гаронбаҳои миллати тамаддунсози тоҷик ва ҷузъи эътирофшудаи фарҳанги ҷаҳонӣ арзёбӣ намудааст. Ин комилан дуруст аст, асарҳои устоди каломи бадеъ Мирзо Турсунзода ба 60 забони халқҳои ҷаҳон тарҷума шуда, борҳо бознашр гардидаанд.

Боби аввали китоб чунин зерсарлавҳа дорад: «Устод Мирзо Турсунзода аз нигоҳи Пешвои муаззами миллат». Воқеан, бузургонро бузургон зинда медоранд. Роҳбари давлати тоҷикон аз нақши барҷастаи абармардон Садриддин Айнӣ, Бобоҷон Ғафуров ва Мирзо Турсунзода дар таърихи асри ХХ – уми халқи куҳанбунёдамон мудом ёдовар мешаванд, ки ин барои насли ҷавон оинаи ибрат буда, дарси хештаншиносист.

Боби мазкур бо чунин суханони ифтихорӣ ва самимии Пешвои миллат, муҳтарам Эмомалӣ Раҳмон: — «Зиҳӣ Мирзо Турсунзода ва шеъри ҷаҳонгири ӯ», ки муҳтавои китобро ифода менамояд, ҷамъбаст мегардад.

Яке аз бобҳои дигар таҳти унвони «Се ахтари тобон» ба дӯстии устод Мирзо Турсунзода бо ду адиби забардасти дигар – Расул Ғамзатов ва Чингиз Айтматов бахшида шудааст.

Дар муқоваи китоб акси устод ҷой гирифта, дар қисми болои акси шоири ширинкалом кабӯтари сафед, кабӯтари сулҳ парафшонӣ дорад, ки худ як рамзи зебо ва таъкид бар он аст, ки Мирзо Турсунзода қосиди хастанопазири сулҳу ваҳдату дӯстӣ ва ҳамзисти халқҳои тамоми сайёраи мо буд.

ДУШАНБЕ, 28.06.2023. /АМИТ «Ховар»/. Дар фасли тобистон бо баланд шудани ҳарорати ҳаво хатари афзоиши ҳаргуна бемориҳои сироятӣ ба вуҷуд меояд. Имрӯзҳо бештар дар байни кӯдакону наврасон гирифторшавӣ ба бемории дарунравӣ мушоҳида мегардад. Барои пешгирии худу фарзандон аз ин беморӣ чӣ бояд кард? Мухбири АМИТ «Ховар» бо ин савол ба мутахассиси Маркази ҷумҳуриявии ташаккули тарзи ҳаёти солим Таманно Файзуллоева муроҷиат намуд.

Ба гуфтаи табиб, ҳарорати баланди фасли тобистон боиси афзудани бемориҳои дарунравӣ байни кӯдакон ва наврасон гардида метавонад. Зеро дар натиҷаи гармии баланд кӯдакон обу нӯшокиҳои на ҳама вақт ҷӯшонидашуда, инчунин баъзан меваю сабзавоти гуногунро ношуста истеъмол мекунанд.

«Гармо метавонад ба кӯдакони хурдсол таъсири бештар расонад. Зеро ҷисми кӯдакон бисёртар аз об иборат аст ва дар рӯзҳои гарм мубодила ва мувозинати оби организми онҳо метавонад вайрон шавад. Аз ин рӯ, аз ҳамаи падару модарон хоҳиш карда мешавад, ки кӯдакони худро эҳтиёт кунанд ва рӯзона нагузоранд, то онҳо зиёд дар зери шуъои сўзони офтоб гашту гузор намоянд. Онҳоро мебояд дар ҷойҳои салқин, аз ҷумла, сояи зери дарахтон, назди кӯл ва ё ҳавзҳои хонаҳои худ нигоҳ доранд, ки таъсири гармо ба узвҳои дарунӣ зиёд набошад. Бахусус, ба кӯдакон тез – тез нӯшонидани об тавсия дода мешавад», -изҳор дошт табиб.

Бояд гуфт, ки гармии аз ҳад зиёди ҳаво ба саломатии одамон, бахусус калонсолону кӯдакон таъсири зиёд дорад. Аз ин сабаб табибон ҳангоми баланд шудани ҳарорати ҳаво ба сокинони мамлакат тавсия медиҳанд, ки дуру дароз зери шуъои сӯзони офтоб наистанд. Зеро онҳо метавонад ба бемории гармозадагӣ гирифтор шаванд. Бар асари гирифтор шудан ба ин беморӣ табъи бадани инсон баланд мешавад. Инчунин дар ҳавои гарм, зери офтоб зиёд истодан, ба сӯхтани пӯсти бадани инсон, пайдоиши обилачаҳо дар он, инчунин дарди сару дилбеҳузурӣ оварда мерасонад.

Тавре ҳамсуҳбати мо иброз дошт, «фасли гармо ин муҳити созгор барои микроорганизмҳоеcт, ки ба гармӣ тобоваранд ва онҳо зуд афзоиш меёбанд. Ин фаслро мо, табибон фасли бемориҳои дарунравии шадиди меъдаю рӯда меномем. Чунки дар ин фасл ин бемориҳо зиёдтар авҷ мегиранд ва гирифторони он меафзоянд. Ин беморӣ бештар дар байни кӯдакони синну соли аз 1 то 5 сола ба қайд гирифта мешаванд. Сабабҳои ба чунин ҳолат расидан — ин риоя накардани қоидаҳои беҳдоштӣ ва гигиенаи шахсӣ мебошад».

Табибон ба ин назаранд, ки дар рӯзҳои гарми офтобӣ одамон бояд аз обҳои тозае истифода кунанд, ки ҷавобгӯйи меъёрҳои беҳдоштӣ бошанд.

Нӯшидани оби зиёд барои пешгирии беобшавии ҷисм мусоидат мекунад. Ҳамзамон тавсия дода мешавад, ки дар рӯзҳои гарми тобистон аз истеъмоли хӯрокҳои зуд вайроншаванда худдорӣ бояд кард. Бештар меваҳои тару тоза ва шарбатҳои мевагиро истифода кардан бамаврид хоҳад буд.

Ба гуфти мутахассиси соҳа, сабаби гирифтор шудан ба бемориҳои дарунравӣ — ин бактерияҳои чӯбчамикробҳои зараровар, стафилакокҳо, стрептококҳо, диплакокҳои дар атрофи он буда ба организми инсон ворид шуда, зарар мерасонанд ва шахсро ба бемориҳои шадиди меъдаю рӯда мубтало мекунанд.

Аломатҳои беморӣ, пеш аз ҳама ин дамиши шикам, дарди он, беҳолӣ, баландшавии ҳарорати бадан, дилбеҳузурӣ, қайкунӣ ва дарунравии тез-тез мебошад. Инчунин фишори хун паст шуда, набз тез- тез мезанад, даҳон, лабон ва пӯсти бемор хушк мешавад.

«Агар ин аломатҳо дар ҳар инсон мушоҳида шаванд, дарҳол бояд доруи регидрон истифода намуд, то оби баданро барқарор намояд»,- таъкид намуд духтур.

Ба гуфти коршинос, «бояд ҳар оила доруи регидрон дошта бошад, зеро ин дору аз ҷониби табиби оилавӣ ройгон тақсим мегардад. Тарзи истеъмоли он чунин аст: дар як литр оби ҷӯшонида, як қуттии ин доруро илова карда, даҳ дақиқа нигоҳ дошта, сипас нӯшед. Ба кӯдакони ду-сесола дар ҳар даҳ-понздаҳ дақиқа аз он як қошуқи ошхӯрӣ додан зарур аст. Калонсолон бояд дар як шабонарӯз ду литр оби ин доруро нӯшанд».

Агар дар хона ин дору дастрас набошад, пас чӣ бояд кард?

Таманно Файзуллоева дар ин хусус чунин посух дод: «Дар ҳолати набудани доруи регидрон мо дар хона бояд онро худамон омода намоем. Яъне, дар як литр оби ҷӯшонида чор қошуқ шакар, як қошуқ намак ва як қошук сода илова намуда, баъди даҳ дақиқа нӯшидан мумкин аст».

Ба тавсияи табибон, агар аломатҳои ин беморӣ аз ду рӯз зиёд идома ёбанд, ҳатман ба табибон бояд муроҷиат намуд.

«Як омили пешгирии ин беморӣ- тозагии худ ва атрофи ҷои истиқомат мебошад. Дастонро пайваста бо собун шустан зарур аст. Аз оби ҷӯшонида истифода баред, ҳоҷатхонаҳо ва партовҳоро аз назди ҷӯйбор дур кунед, бо пашшаҳо мубориза баред, меваю сабзавотро шуста, баъд истифода баред, обҳои дар зарф бударо бо сарпӯш маҳкам нигоҳ кунед. Ҳар шахс мувофиқи талаботи Маркази санитарию эпидемиологӣ бояд дар 6 моҳ як бор аз муоинаи тиббӣ гузарад»,- маслиҳат медиҳад мутахассис.

Набояд фаромуш сохт, ки дар пеш моро рӯзҳои гармтарини фасли тобистон интизор аст, дар ҳолати беэҳтиётӣ кардан метавон ба ҳар гуна бемориҳо дучор шуд. Пас, эҳтиёт нисфи ҳаёт!

ДУШАНБЕ, 29.06.2023. /АМИТ «Ховар»/. Дар шаҳри Душанбе  Фестивали  яхмос, дӯғоб, шарбати мева ва обҳои ташнагишикан  доир мегардад. Дар ин хусус қарори Раиси шаҳри Душанбе аз 24 июни соли 2023 ба тавсиб расид.

Тавре АМИТ «Ховар» бо истинод ба  Мақомоти иҷроияи ҳокимияти давлатии шаҳри Душанбе хабар медиҳад, ҳайати Комиссия, харҷнома ва нақшаи чорабиниҳо оид ба омодагӣ ва баргузории Фестивали мазкур дар пойтахт тасдиқ гардид.

Барои баргузор намудани Фестивали мазкур Сарраёсати молияи шаҳри Душанбе аз ҳисоби Фонди захиравии Раиси шаҳри Душанбе маблағ  ҷудо менамояд.

Ёдовар мешавем, ки  тибқи «Ҷадвали баргузории фестивал, намоиш, ид, озмунҳои анъана ва ҳунарҳои мардумӣ ва ҷашну солгардҳо дар Ҷумҳурии Тоҷикистон барои соли 2023» шанбе якуми моҳи июл дар Тоҷикистон Фестивали  яхмос, дӯғоб, шарбати мева ва обҳои ташнагишикан, инчунин Озмуни қаннодӣ ва ҳалвопазӣ доир мегардад.

Соҳаи тандурустӣ низ дар замони соҳибистиқлолӣ рушд намуда, дар ин замина имкониятҳои нав ба вуҷуд омаданд. Бунёди Марказҳои саломатӣ ва таъмин  бо таҷҳизоту лабараторияҳои муосир гувоҳи он аст, ки соҳаи тандурустӣ яке аз самтҳои муҳими ҷомеа дониста мешавад. Дар шаҳри Нораки  вилояти Хатлон ба ин самт таваҷҷуҳи хоса зоҳир гардида, баҳри ҳифзи саломатии аҳолӣ тамоми тадбирҳо андешида мешавад. Зимни суҳбат масъулини Муассисаҳои кӯмаки аввалияи тиббию санитарии шаҳр иброз доштанд, ки айни замон дар сохтори Муассиса 15 бунгоҳи тиббӣ фаъолият дорад ва тибқи нақша сохтмону азнавсозии 2 бунгоҳи дигар дар деҳотҳои  шаҳр ҷараён дорад. Инчунин дар ин давра Муассиса бо 4 адад мошини ёрии таъҷилӣ таъмин карда шуд, ки ин ҳам дастгирӣ ва таваҷҷуҳи бевосита ба соҳаи тандурустӣ мебошад.

Мусобиқаи кушодаи шаҳрӣ оид ба муҳорибаи ғайрикасбии унифайт дар толори барҳавои Крокус фитнес баргузор гардид. Дар маросими ифтитоҳи сабқат  қайд карда шуд, ки соҳаи варзиш дар даврони соҳибистиқлолӣ рушду нумуъ ёфта ширкати варзишгарони ватанӣ дар мусобиқаҳои бурунмарзӣ ҳам бештар гардид. Бо мақсади фароҳам овардани машқу тамринҳо сол ба сол бунёди иншооти варзишӣ низ вусъати тозаро касб кардааст. Яке аз чунин толорҳо, толори Крокус фитнес мебошад. Мусобиқаи кушодаи шаҳрӣ  дастаҳоро аз шаҳри Душанбе ва ноҳияи Ёвон ҷамъ овард. Аслан дар мусобиқаи мазкур ғолибону љоизадорони мусобиқаҳои шаҳрӣ, ноҳиявӣ ва вилоятӣ  ширкат варзиданд. Дар натиҷа Мирамин Набиев, Сабрина Раҳимова, Муҳаммадшукур Солеҳов, Мунис Талбаков,Умар Саидов ғолиб омаданд.

ДУШАНБЕ, 20.06.2023 /АМИТ «Ховар»/. Дар рӯзҳои таътили тобистона Театри давлатии ҷумҳуриявии «Лӯхтак»-и шаҳри Душанбе тасмим гирифтааст, ки ба истироҳатгоҳҳо сафар намуда, намоишҳои гуногун, аз ҷумла «Чӯҷаи тиллоӣ», «Бутчаи шодмонӣ» ва «Маликаи бадбахт» — ро пешкаши тамошобинон намояд. Дар ин хусус ба мухбири АМИТ «Ховар» роҳбари бадеии театри мазкур Наргис Розиқзода иттилоъ додааст.

Ҳунармандони театр барои кӯдакон инчунин намоиш-консертҳо ташкил мекунанд, мактаббачагон метавонанд бо қаҳрамонони саҳнаҳо аз наздик шинос шуда, хушҳолӣ кунанд.

«Чӣ тавре маълум аст, намоиш-консертҳо ба наврасон шодию сурур ва лаҳзаҳои зиёди хотирмон мебахшад. Мактаббачагон ва кӯдакони хурдсол тамошобинони хеле нозуканд, онҳо махсусан зуд ба эҳсосот дода мешаванд. Намоишномаҳои Театри лӯхтак ба онҳо хушҳолӣ бахшида, барояшон аҳамияти тарбиявӣ ва маърифатӣ доранд. Ин намоишномаҳо тавассути каҳрамонҳои асар ба кӯдакон дар бораи дӯстӣ, меҳрубонӣ, ростқавлӣ, меҳнатдӯстӣ қисса намуда, онҳоро ба роҳи дурусти зиндагӣ ҳидоят месозанд», — гуфт Наргис Розиқзода.

Айни замон дар Театри давлатии ҷумҳуриявии «Лӯхтак»-и шаҳри Душанбе мавсими 38 — уми интихобӣ баргузор гашта истодааст. Ба гуфтаи роҳбари бадеии Театри лӯхтак, имсол ҳунармандони театр пешниҳоди намоишҳои бисёр ва сафарҳоро ба нақша гирифтаанд.

«Имсол мо 3 намоиши навро ба саҳна гузоштем, ду спектакл ба анҷом расид, сеюмӣ то охири мавсими театрӣ – то охири моҳи июн идома хоҳад кард. Дар олами лӯхтакҳо усулҳои гуногун мавҷуданд, ҳоло мо аз шоу — барномаҳо истифода мебарем — инҳо рақамҳои консертӣ мебошанд, ки бо лӯхтакҳо доир мегарданд. Мо кӯшиш мекунем, ки дар бораи дустӣ, мехрубонӣ, садоқат ва вафодорӣ намоишҳоро ба саҳна гузорем, бинобар ин ба театри мо кӯдакон ва падару модарони онҳо бо камоли мамнуният меоянд. Мо саъй мекунем, ки асарҳоро бо ду забон намоиш диҳем ва дар таътили зимистона бо мактаббачагон кор кунем. Моҳи феврал мо намоиши нави «Саргузашти харгӯш»-ро омода кардем. Муаллифи ин асар Шамсӣ Қиёмов мебошад. Ба тамошобинон намоишнома, достони табибон, дӯстӣ, баробарӣ хеле писанд омад», — гуфт номбурда.

Ҳамсуҳбати мо илова кард, ки «моҳи март ҳунармандони театр бо намоишномаи «Маликаи нозанин» дар Бухоро сафари ҳунарӣ доштанд. Намоиш ба ду забон: тоҷикӣ ва русӣ баргузор гардида буд. Дар ҷашни Наврӯз мо ин намоишномаро ба кӯдакону наврасони Бухоро ва атрофи он пешкаш намудем. Ҳоло дар театри мо 12 нафарҳунармандони дорои таҷрибаи калон фаъолият мекунанд. Студияи бачагонаи «Исмоил» соли 1996 таъсис ёфтааст. Дар студия фарзандони оилаҳои камтаъмин таҳсил мекунанд. Мо ба кӯдакон ҳунармандӣ, сурудхонӣ, рақс, лӯхтакбозиро меомӯзем. Маҳорати актёриро ба онҳо устодони пуртаҷрибаи санъат меомўзонанд. Ҳама машғулиятҳо пас аз дарс дар театр доир мешаванд».

Бояд гуфт, ки Театри лӯхтак аввалин театри бачагона мебошад.

«Мо бо театрҳои Узбекистон, Қазоқистон, Туркманистон, Русия ҳамкории зич дорем. Аксар вақт коргардонҳоро аз Узбекистон ва Русия даъват мекунем, ки ба намоиш шаклҳои гуногун диҳанд, ҳунармандон аз таҷрибаи ҳамкасбони хориҷии худ омӯхта, маҳорати худро такмил диҳанд. Боиси хушнудист, ки студияи мо бори нахуст бо дастгирии Вазорати фарҳанги Тоҷикистон дар Фестивали байналмилалии театрии «Лӯхтак дар дасти кӯдакон», ки дар шаҳри Новокузнетски Федератсияи Русия баргузор гардид, иштирок намуд.

Студияи бачагонаи мо дар ин фестивал бо намоиши «Робия бо муйҳои ранга» баромад кард. Ба тамошобинон асар хеле маъқул шуд, он аз ҷониби онҳо баҳои хуб гирифт. Созмондиҳандагон хоҳиш карданд, ки ин намоишномаро соли оянда аз 1 то 5 июн бахшида ба Рӯзи байналмилалии ҳифзи кӯдакон намоиш диҳем, то ки суннат ва фарҳанги мардуми тоҷикро муаррифӣ намоем», — шарҳ дод Наргис Розиқзода.

Бояд ишора кард, ки чанде пеш ҳунармандони театр дар деҳаҳои дурдасти Кӯлоб, Шаҳритус ва Носири Хусрав тамошобинони хурдакаки худро бо намоишҳои шавқовар шод гардонданд.

САНГВОР, 20.06.2023 /АМИТ «Ховар»/. Тибқи нақшаи тасдиқшуда, дар ноҳияи Сангвор бояд аз ҷониби Ҷамъияти дорои масъулияти маҳдуди «Зарринк» сохтмони Муассисаи томактабии замонавии «Калидчаи заррин» оғоз мегардид. Аммо бо сабабҳои маълум, аз ҷумла тағйирот даровардан дар лоиҳаи он то ба ҳол сохтмони кўдакистон оғоз нагардидааст. Дар маркази ноҳияи Сангвор мушкилии набудани кӯдакистон барои қариб сад кӯдак то ҳол боқӣ мондааст. Мухбири минтақавии АМИТ «Ховар» ин мавзуъро шарҳ медиҳад.

Соли 2019 бо мақсади рушди таҳсилоти томактабӣ Ҷумҳурии Тоҷикистон, Ҳукумати мамлакат «Барномаи давлатии рушди таҳсилоти томактабӣ дар Ҷумҳурии Тоҷикистон барои солҳои 2020-2025»-ро қабул намуд, ки вобаста ба иҷрои ин барномаи давлатӣ дар шаҳру навоҳии ҷумҳурӣ даҳҳо кӯдакистонҳои наву замонавӣ мавриди баҳрабардорӣ қарор дода шуданд.

Ноҳияи Сангвор яке аз дурдастарини ноҳияҳои кӯҳистони мамлакат ба ҳисоб рафта, дар маркази он як кӯдакистон бо фарогирии 50 нафар хурдсол фаъолият дорад.

Тибқи иттилои масъулини ин кӯдакистон, имрӯзҳо барои дар муассисаи томактабии маркази ноҳия таълиму тарбия гирифтан қариб 100 нафар кӯдак дар навбат истодаанд. Онҳо аз ин шумора дар соли 2023 дар ҷойи кӯдаконе, ки барои таҳсил ба синфи якум рафтанд зиёда аз 7 нафар кӯдакони дар навбат истодаро қабул менамоянд.

Хушбахтона, барои бартараф гардидани ин мушкилии ноҳия ва амалишавии «Барномаи давлатии рушди таҳсилоти томактабӣ дар Ҷумҳурии Тоҷикистон барои солҳои 2020-2025» Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 20 сентябри соли 2021 дар идомаи сафари корӣ дар ноҳияи Сангвор ба бунёди муассисаи томактабии замонавии «Калидчаи заррин» оғози расмӣ бахшиданд.

Дар ин чорабинӣ ба Пешвои муаззами миллат муҳтарам Эмомалӣ Раҳмон ваъда доданд, ки кӯдакистони мазкур барои 100 нафар дӯстрӯяк бо иқдоми Ҷамъияти дорои масъулияти маҳдуди «Зарринк» бунёд карда мешавад. Фармоишгари муассисаи нави томактабӣ Мақомоти иҷроияи ҳокимияти давлатии ноҳияи Сангвор буда, лоиҳаи иншооти зебо аз ҷониби Ҷамъияти саҳҳомии кушодаи «Меъморӣ ва шаҳрсозӣ»-и шаҳри Душанбе таҳия гардидааст.

Тибқи иттилои масъулини Мақомоти иҷроияи ҳокимияти давлатии ноҳияи Сангвор, ҳарчанд ҳуҷҷатгузории замини ин муассиса ба талабот ҷавобгў буда, он бо беҳтарин лоиҳаи замонавӣ таъмин гардида бошад ҳам, мутаассифона, бо баҳонаҳои тағйирот даровардан дар лоиҳаи он сохтмони муассисаи томактабии замонавии «Калидчаи заррин» то имрӯз аз ҷониби Ҷамъияти дорои масъулияти маҳдуди «Зарринк» дар ноҳияи Сангвор оғоз нагардидааст.

Масъулини ҶДММ «Зарринк»-ро зарур аст, ки ба ғамхориҳои Пешвои муаззами миллат муҳтарам Эмомалӣ Раҳмон сазовор буда, муассисаи томактабии замонавии «Калидчаи заррин»-ро дар маркази ноҳияи Сангвор аз рўи лоиҳаи замонавии барои 100 кӯдак бунёд намуда, ба ифтихори 35-солагии Истиқлоли давлатӣ мавриди баҳрабардорӣ қарор диҳанду ба ваъдаи додаи хеш вафо намоянд.

Дар ноҳияи Сангвор айни замон се кӯдакистон бо фарогирии 150 кӯдак фаъолият дорад, ки онҳо дар ҷамоатҳои деҳоти Заршуён, Чилдара ва маркази ноҳия ҷойгир мебошанд.

Дар ноҳия талабот ба фаро гирифтани кӯдакон дар муассисаҳои томактабӣ хеле зиёд мебошад. Аз ин рӯ бо ташаббуси Мақомоти иҷроияи ҳокимияти давлатии ноҳияи Сангвор дар назди 21 муассисаи таълимӣ 21 гурӯҳи маркази инкишофи кӯдакро бо фарогирии 277 нафар хурдсолон ташкил намудаанд. Дар ин гурўҳҳо беҳтарин мураббияҳо ба хурдсолон таълиму тарбия медиҳанд.

ГУЛИСТОН, 20.06.2023. /АМИТ «Ховар»/. Дар шаҳри Гулистон аз ҷониби собиқ футболбози дастаи  мунтахаби мамлакат ва сарбони ҳозираи дастаи «Хуҷанд»-и шаҳри Хуҷанд Ҷаҳонгир Эргашев Академияи футболи «Сомониён» таъсис дода шуд. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Гулистон хабар доданд.

«Сомониён» бо чорабинии тантанавии идона дар варзишгоҳи марказии шаҳр ба фаъолият оғоз намуд. Дар кушодашавии он аъзои академия, мураббиён ва  волидайн иштирок намуданд.

Мудири шуъбаи рушди иҷтимоӣ ва робита бо ҷомеаи дастгоҳи Раиси шаҳр Фаридуншоҳ Абдуллоев  изҳор дошт, ки солҳои охир дар ҷумҳурӣ ҷиҳати рушди варзиши рақами 1-и ҷаҳон – футбол тадбирҳои муассир андешида шудааст. Натиҷаи ҳамин тадбирҳо ва барномаву ҳадафҳо буд, ки тими мунтахаби мамлакат дар таърих аввалин маротиба ба Чемпионати Осиё, ки соли 2023 дар давлати арабии Қатар баргузор мегардад, роҳхат гирифт.

Дар шаҳри Гулистон ба  рушди ин навъи варзиш таваҷҷуҳи хоса  зоҳир мегардад. Натиҷаи ин таваҷҷуҳ аст, ки дастаи «Гулистон»-и шаҳри Гулистон дар Лигаи якуми Чемпионати Тоҷикистон оид ба футбол ҳунарнамоӣ мекунад.

Волидайни таълимгирандагон ва сокинони шаҳр аз кушодашавии Академияи футболи «Сомониён» хушҳол  буда, ба муассисони он изҳори сипос намуданд.