ДУШАНБЕ, 16.05.2024. /АМИТ «Ховар»/. Ҷараёни озмоиши маҳаллии Барномаи байналмилалии арзёбии хонандагон (PISA) 2025) дар муассисаҳои таҳсилоти миёнаи умумии Ҷумҳурии Тоҷикистон мавриди санҷиш қарор дода шуд. Дар ин хусус ба АМИТ «Ховар» дар Маркази миллии тестии назди Президенти Ҷумҳурии Тоҷикистон хабар доданд.
Санҷиш аз тарафи ширкати Eductrade, коршиносони лоиҳаи Иттиҳоди Аврупо оид ба таҳсилоти миёнаи умумӣ, ҳамоҳангсозони Барномаи дастгирии таҳсилоти босифат ва намояндагони Маркази миллии тестии назди Президенти Ҷумҳурии Тоҷикистон гузаронида шуд.
Намояндагон баъди баргузории озмоиши маҳаллии арзёбии хонандагон дар Муассисаи таълимии таҳсилоти миёнаи умумии №35-и ноҳияи Шоҳмансур ба хонандагон барои иштироки фаъолонаашон дар озмоиши маҳаллии PISA 2025 сипосгузорӣ намуда, ба фаъолияти Маркази миллии тестии назди Президенти Ҷумҳурии Тоҷикистон дар ин самт баҳои баланд доданд.
Гуфта шуд, ки Тоҷикистон ҳарчанд дар озмоиш ва арзёбии асосии PISA 2025 бори аввал иштирок мекунад, вале барои татбиқи ин барнома ва арзёбии воқеии дониши хонандагон тайёрии хуб дидааст, ки ин метавонад барои баланд бардоштани сифати таҳсил дар Тоҷикистон ва беҳбуди соҳаи маориф заминаи мусоид фароҳам оварад.
Озмоиши маҳаллии PISA 2025 дар айни замон дар 71 муассисаи таълимии таҳсилоти умумии асосӣ ва миёнаи умумии интихобгардидаи шаҳри Душанбе бо иштироки хонандагони синфи 9 идома дорад. Барнома дар доираи Лоиҳаи «Кумаки Иттиҳоди Аврупо ба соҳаҳои маориф ва меҳнат дар Ҷумҳурии Тоҷикистон» аз ҷониби Маркази миллии тестии назди Президенти Ҷумҳурии Тоҷикистон амалӣ гардидааст.