ДУШАНБЕ, 23.10.2023. /АМИТ «Ховар»/. Дар вилояти Суғд ғолибони даври вилоятии озмунҳои ҷумҳуриявии «Илм –фурӯғи маърифат» ва ««Тоҷикон»— оинаи таърихи миллат» қадрдонӣ гардиданд. Дар ин хусус ба АМИТ «Ховар» дар Хадамоти матбуоти Раиси вилояти Суғд хабар доданд.
Тазаккур дода шуд, ки озмунҳо таҳти сарпарастии Асосгузори сулҳу ваҳдати миллӣ – Пешвои миллат, Президенти ҷумхурии Тоҷикистон муҳтарам Эмомалӣ Раҳмон доир гардида, дар баланд бардоштани сатҳи дониш ва маърифати аҳли ҷомеа нақши шоиста мегузоранд.
Гуфта шуд, ки мақомоти иҷроияи ҳокимияти давлатии вилоят дар партави дастуру ҳидоятҳои Пешвои миллат муҳтарам Эмомалӣ Раҳмон ҷиҳати дар амал татбиқ намудани барномаву ҳадафҳои бузурги давлату Ҳукумат дар самти рушди илм ва ҷалби бештари ҷавонону донишҷӯён ба илмомӯзӣ тадбирҳои зарурӣ меандешад.
Тавре таъкид гардид, даври аввали озмуни «Илм-фурӯғи маърифат» бо иштироки 42 ҳазору 718 нафар довталаб дар муассисаҳои таълимӣ ва шаҳраку деҳоти вилоят дар сатҳи баланд гузаронида шуд.
Дар даври дуюми озмун 8 ҳазору 729 нафар иштирок намуда, ба даври вилоятӣ 1 ҳазору 222 нафар роҳхат гирифтанд. Аз онҳо 955 нафар хонандаи муассисаҳои таълимӣ, 186 нафар донишҷӯи муассисаҳои таҳсилоти миёна ва олии касбӣ (бакалавр, магистр) ва докторанти муассисаҳои таҳсилоти олӣ ва илмӣ, 30 нафар омӯзгорони ҳамаи зинаҳои таҳсилот, ходимони илмию адабӣ ва намояндагони касбу кори гуногун мебошанд.
Аз рӯи натиҷаи комиссияи озмун 120 нафар ғолиби даври вилоятӣ дониста шуда, ба даври ҷумҳуриявӣ роҳхат гирифтанд.
Дар озмуни ««Тоҷикон»- оинаи таърихи миллат» 35 ҳазору 158 нафар, аз ҷумла 28 ҳазору 512 нафар хонандагони муассисаҳои таҳсилоти миёнаи умумӣ, 681 нафар хонандагони муассисаҳои таҳсилоти ибтидоии касбӣ, 2647 нафар донишҷўён, 120 нафар магистрҳо, 2983 нафар омўзгорони муассисаҳои таҳсилоти миёнаи умумӣ, 2 нафар ходимони илмию адабӣ, 151 нафар аспирантон, унвонҷўён, номзадони илм, 13 нафар докторантон, 320 нафар калонсолон ва намояндагони касбу кори гуногун иштирок намуда, ба даври дуюми озмун 5507 нафар роҳхат гирифт.
Дар даври дуюми озмун, ки давоми моҳи июн гузаронида шуд, 3923 нафар, аз ҷумла 3211 хонандаи муассисаҳои таҳсилоти миёнаи умумӣ, 76 хонандаи муассисаҳои муассисаҳои таҳсилоти ибтидоии касбӣ, 109 нафар донишҷў, 1 магистр, 395 омўзгори муассисаҳои таҳсилоти миёнаи умумӣ, 1 ходими илмию адабӣ, 1 докторант ва 121 нафар калонсолон ва намояндагони касбу кори гуногун иштирок намуда, ба даври сеюми озмун 290 нафар роҳхат гирифт.
Комиссияи даври сеюми Озмуни ҷумҳуриявии ««Тоҷикон» — оинаи таърихи миллат» дар вилоят дар байни иштирокчиён 24 нафар ғолиби озмунро муайян намуд. Мояи ифтихор аст, ки дар озмун на танҳо насли калонсол, балки нафақахӯрон низ иштирок намуда, соҳиби ҷойҳои намоён гардиданд.
Раиси вилоят ба ғолибони даври вилоятии озмунҳо диплому мукофоти пулӣ супорида, ба онҳо барои иштирок дар даври ҷумҳуриявии озмун барору комёбиҳо орзу намуд.