Мавсими нуҳумин лоиҳаи бошукуҳи футбол барои кӯдакон таҳти унвони «Футбол ба назди шумо меояд» миёни дастаҳои деҳаю маҳаллаҳои ҳудуди пойтахт ба анҷом расид. Дар маросими ҷамъбастии лоиҳа, ки дар варзишгоҳи «Душанбе-Арена» доир шуд, роҳбарияти ФФТ ва лигаи футболи кӯдакону наврасони кишвар, сармураббии тими миллӣ Петр Сегрт ширкат намуданд. Мавриди зикр аст, ки лоиҳаи «Футбол ба назди шумо меояд» дар ду марҳила дар се категорияи синну сол 7, 9 ва 11-сола сурат гирифта, 23000 кӯдакро ба футбол ҷалб намуд. Дар марҳилаи ниҳоии мусобиқот 16 даста дар ҳар як синну сол бо ҳам нерӯ санҷида пас аз ду моҳи рақобатҳо ғолибон муайян шуданд.
Раздел: Хабарҳо
Бозгашти муваффақонаи хонандагони тоҷик аз олимпиадаи байналмилалӣ.
Аз 31-уми июл то 7-уми августи соли ҷорӣ дар Донишгоҳи Брунели шаҳри Лондони Бритониёи Кабир Олимпиадаи байналмилалии «TeenEagle» аз фанни забони англисӣ доир гардид, ки дар он 76 нафар хонандагони муассисаҳои таҳсилоти умумии Ҷумҳурии Тоҷикистон иштирок намуда, сазовори 31 ҷойи ифтихорӣ: 3 медали тилло, 12 медали нуқра ва 16 медали биринҷӣ гардиданд. Аз ҷумла, медали тилло ва шоҳҷоизаи олимпиада насиби хонандаи мо Фирўза Абдуллоева гардид. Ёдовар мешавем, ки олимпиада аз рӯи 4 бахш ва 2 категорияи синнусолӣ «ИГЛЕТС» ( синфҳои 5-8 ) ва «ИГЛС» ( синфҳои 9-12 ) баргузор гардида, дар он зиёда аз 400 нафар хонанда аз 27 кишвари дунё иштирок намуд. Бозгашти хонандагони тоҷикро дар Фурудгоҳи байналмилалии шаҳри Душанбе, масъулин ва падару модарон самимона истиқбол гирифтанд.
Ғолибият дар олимпиадаи байналмилалӣ.
Дар шаҳри Тошканди Ҷумҳурии Узбекистон олимпиадаи байналмилалӣ аз фанни математика баргузор гардид. Дар натиҷа ба муҳассилини Литсей барои хонандагони болаёқати ш. Душанбе Мирзоҷалил Одиназода, Қосим Сайдуллоев ва Фазлиддин Сафаров муяссар гашт, то сазовори мақомҳои 1-ум, 2-юм ва 3-юм гарданд.
Мусобиқаи 12-уми байналмилалӣ оид ба теннис ҷамъбаст гардид.
Дар мусобиқаи 12-уми байналмилалӣ оид ба теннис миёни наврасони то 16-сола барои дарёфти Ҷоми Президенти Ҷумҳурии Тоҷикистон аз рўи намуди инфиродӣ дар миёни писарон ду ҷои аввалро варзишгарони Тоҷикистон ишғол намуданд. Сомон Амонов сазовори медали тилло ва Фарҳод Ғайратзода сазовори медали нуқра шуданд. Миёни духтарон ду ҷои аввал насиби намояндагони Қазоқистон шуд. Ҷои аввалро Данаия Амангажиева, ҷои дуюмро София Сафиулина сазовор шуданд. Медали биринҷиро варзишгари мо Аниса Яҳёева ба даст овард.
Оғози ярмаркаи фурӯши либос ва лавозимоти мактабӣ.
Дар шаҳри Душанбе ярмаркаи фурӯши либос ва лавозимоти мактабӣ оғоз гардид, ки он то 31 август идома меёбад. Ярмарка бо ташаббуси мақомоти иҷроияи ҳокимияти давлатии шаҳри Душанбе роҳандозӣ шуд. Дар ярмаркаи мазкур қариб аз 20 корхонаву тавлидгоҳҳои истеҳсолии пойтахт ва соҳибкорони ватанӣ намудҳои муайяни сару либос ва лавозимоти мактабиро пешниҳод менамоянд. Яке аз чунин ярмарка дар маркази савдои «Панҷшер» -и н. Фирдавсии пойтахт таъсис дода шуд.
Роҳандозии мусобиқаи байналмилалии теннис барои дарёфти ҷоми Президенти ҶТ
Дар корти тобистонаи тенниси ш. Душанбе бахшида ба 31-солагии Истиқлолияти давлатии Ҷумҳурии Тоҷикистон маросими кушодашавии Мусобиқаи байналмилалии теннис миёни наврасон барои дарёфти Ҷоми Президенти Ҷумҳурии Тоҷикистон баргузор гардид. Дар Мусобиқаи 12-уми байналмилалӣ оид ба теннис миёни наврасон барои дарёфти Ҷоми Президенти Ҷумҳурии Тоҷикистон, 64 нафар варзишгарон аз Тоҷикистон, Узбекистон, Қазоқистон, Русия, Туркия, Англия, Туркманистон, Ҳиндустон, Покистон, Шриланка, ИМА, Олмон ва Исроил иштирок менамоянд.
Оғози даври дуюми озмуни ҷумҳуриявии «Тоҷикистон-ватани азизи ман»
Даври дуюми озмуни ҷумҳуриявии «Тоҷикистон-ватани азизи ман», дар Қасри фарҳанги ноҳияи Шаҳринав бо иштироки ғолибони даври аввал сурат гирифт. Яке аз довталаби ин озмун Азиз Давлатзода мебошад. Мавсуф дар озмуни мазкур дар номинатсияи сарояндагӣ дар жанри академӣ ширкат варзида, ҳунару маҳорати сарояндагии хешро дар назди ҳайати ҳакамон нишон дод. Иштирокчии дигари озмуни мазкур Абдурауф Юсуфов буда, аз руйи наминатсияи сарояндагӣ дар жанри анъанавӣ иштирок намуд.
Корҳои ободониву созандагӣ дар пойтахт.
Бино бар иттилоъи Вазорати маориф ва илми Ҷумҳурии Тоҷикистон то 1 сентябри соли равон дар пойтахт 11 Муассисаи таҳсилоти миёнаи умумӣ ба истифода дода мешаванд. Яке аз ин таълимгоҳ, Муассисаи таҳсилоти миёнаи умумии №4 мебошад, ки корҳои сохтмонӣ пурра ба анҷом расонида шуд. Бинои Муассиса аз 3 ошёна ва таҳхона иборат буда, барои 350 хонанда дар як баст пешбинӣ гардидааст.
Роҳандозии мусобиқаи кушод дар ш. Душанбе
Бо ташаббуси Муассисаи давлатии мактаби ҷумҳуриявии маҳорати олии варзишӣ оид ба намудҳои гӯштини шаҳри Душанбе мусобиқаи кушод миёни наврасон баргузор гардид. Дар мусобиқаи гӯштини тарзи озод ба ҷузъ варзишгарон аз шаҳри Душанбе, инчунин иштирокдорон аз вилоятҳои Суғду Хатлон ва шаҳру навоҳии тобеи марказ қуввасанҷӣ карданд. Дар натиҷа Умар Раҳимов, Бахтиёр Саидов, Амрулло Қаландаров, Саъдӣ Алиев, Муҳаммадюсуф Бобоев дар вазнҳои худ зафар ёфтанд.
Маросими қадршиносии озмун
Дар мактаби байналмиллалии Президентии шаҳри Душанбе маросими қадршиносии озмун миёни хатмкунандагони Муассисаҳои таҳсилоти миёнаи умумии ҷумҳурӣ барои соҳиб шудан ба аттестати аълои универсалӣ бо медали тилло ва нуқра, аттестати аълои равиявӣ бо медали тилло ва нуқра баргузор гардид. Дар натиҷа аз 45 нафари довталабони дар озмун ширкат варзида, ба 28 нафари онҳо муяссар гардид, то соҳиби аттестати аълои равиявӣ бо медали тилло ва нуқра гарданд, ки аз ин шумора 11 нафарашон хатмкунандагони Муассисаҳои таълимии ш. Душанбе мебошанд. Ёдовар мешавем, ки дар озмуни мазкур аз ш. Душанбе 21 нафар, аз вилоятҳои Суғду Хатлон 10 нафарӣ ва аз шаҳру ноҳияҳои тобеи ҷумҳурӣ 4 нафар иштирок карданд.
